Humildi nunakunaqa respetakoqmi kayan. Manam allish tukuyantsu y manam wakinkunapita mas alli tratayänanta shuyaräyantsu. Tsëpa rantinqa, wakinkunapaqmi yarpachakuyan y wakinkunapitam yachakuyan.

Wakinkunaqa humildi nunakunapaq pensayan dëbil kayanqantam, peru rasumpa kaqchöqa humildi këqa yanapamantsik imatapis pantanqantsikta y llapantapis rurëta mana puëdinqantsikta cuentata qokunapaqmi.

• Wamrëkim mas amïguyoq kanqa. La epidemia del narcisismo neq librum willakun, “humildi nunaqa wakinkunawan mas juntu kanqanta, wakinkunawan fäcil-lla amïguta ruranqanta y mana reqinqan nunakunawampis fäcil-lla reqinakurinqanta”.

• Allim kawakunqa. Wamrëkita humildi këta yachatsiptikiqa, kanampis y shamoq tiempuchöpis allim kawakunqa. Trabäju asuntullaman pensarishun. Leonard Sax jutiyoq doctormi kënö nin: “Orgullösu y llapantapis rurëta puëdinqanta pensaq jövinqa, manam trabäju asuntupaq tapupäyaptin parlakuyta yachanqatsu, peru parlapaqninta humildäwan y atentu wiyaq jövinqa mas rasllam o sasllam trabäjuta tarinqa”. a

Wakinkunapita mas alli kanqanta mana pensanampaq yachatsi

BIBLIACHÖ CONSËJU: “Mana imapis këkar, imapis kanqanta pensaq nunaqa, kikintam engañakuykan” (Gälatas 6:3).

• Imëkatapis rurëta puëdinqantaqa ama pensatsitsu. “Llapan munanqëkitam ruranki”. “Rurëta munanqëkitaqa llapantam ruranki”. Animëta munar wamrankunata tsënö niyaptimpis, rasumpa kaqchöqa manam llapantaqa rurëta puëdiyanqatsu. Tsëmi wamrëkiqa puëdinqanllata ruranan, y tsënö rurarqa mas kushishqam sientikunqa.

• Imatapis allita ruranqampita felicitë. Wakinkunapita mas alli kanqanta niptikiqa, manam wamrëki humildi këta yachakunqatsu. Tsëmi imatapis allikunata ruranqampita felicitänëki.

• Internet-ta wamrëki imanö utilicëkanqanta controlë. Kanan witsan nunakunaqa imatapis rurayanqanta, rurëta yachayanqanta o imanö kayanqanta alabakurmi Internetman imëkata churayan. Y tsëqa manam humildi kanampaq yanapanqatsu.

• Perdonta mañakunampaq wamrëkita yachatsi. Wamrëki imatapis mana allita rurariptin o pantariptinqa, pantashqa kanqanta cuentata qokunampaq y perdonta mañakunampaq yachatsi.

Agradecikoq kanampaq yachatsi

BIBLIACHÖ CONSËJU: “Agradecikoq kayanqëkitapis rikätsikuyë” (Colosensis 3:15).

• Diosnintsik kamanqankunapita yachatsi. Wamrëkiqa valorananmi Diosnintsik kamanqankunata y entiendinanmi kawanantsikpaq yanapamanqantsikta. Këllaman pensarishun: vientu, yaku y mikuy mana kaptinqa manam kawëta puëdishwantsu. Tsëkunawanmi wamrëkita yachatsinëki Diosnintsik kamanqankunata respetanampaq y agradecikoq kanampaq.

• Wakinkuna imachöpis mas alli kayanqanta entienditsi. Wamrëkita entienditsi wakinkuna pëpita imachöpis mas alli kayanqanta, y tsënö kayanqampita chikipänampa rantin pëkunapita yachakunampaq yachatsi.

• Agradecikoq këta yachatsi. Wamrëkita yachatsi llapan shonqunwan “gracias” nita yachakunampaq. Agradecikoq kanqanmi yanapanqa humildi kanampaq.

Wakinkunata yanapanampaq yachatsi

BIBLIACHÖ CONSËJU: “Humildi karnin wakinkunata qamkunapita mas allitanö rikäyë, y ama biennikikunallataqa ashiyëtsu, sinöqa wakinkunapa biennintapis ashiyë” (Filipensis 2:3, 4).

• Wamrëkita yachatsi wayichö rurapakur yanapakunampaq. Wayichö yanapakunampaq mana mandarqa, kënö nikaq cuentam rurëkanki: “Qamqa wakinkunapitapis mas allim kanki, manam tsëtaqa ruranëkitsu”. Wamrëkiqa entiendinanmi manaraq pukllarnin puntataqa yanapakunanraq precisanqanta. Tsënö yanapakuptin pëpaqpis y wakinkunapaqpis alli kanqanta, kuyayänampaq kaqta y respetayänampaq kaqta entienditsi.

• Wakinkunata yanapëqa alläpa shumaq kanqanta entienditsi. Wakinkunapaq yarpachakur y yanaparqa, wamrëkiqa confiakuypaqmi kanqa. Tsëmi wamrëkiwan juntu rikäyänëki pikuna yanapayänanta wanëkäyanqanta y wamrëkita nï, imanö yanapakunampaq kaqta. Y ruranqampita animë y felicitë.