Llapantsikpam jutintsik kan. Tsëqa, ¿manatsuraq Diospapis jutin kanman? Jutintsik mana kaptinqa, ¿imanöraq piwampis reqinakushwan y amïgu tikrashwan? Tsënöllam Diosta reqinapaq y pëwan amïgu kanapaqpis jutintaraq musyanantsik.

 Bibliachöqa, Diosqa kënömi nin: “Noqaqa Jehovämi kä. Tsëmi juti” (Isaïas 42:8). Diosmi llapantsikta kamamarquntsik. Pëqa alläpa puëdeq y pëlla mandakoqmi, peru mantsanantsiktaqa manam munantsu, antis jutimpa reqinantsiktam munan (Genesis 17:1; Hëchus 4:24; 1 Pëdru 4:19).

 Wakin Bibliakunachöqa Exodu 6:3 textuchömi Diospa jutin yurin. Tsëchömi kikin Diosnintsik kënö nin: “Noqam Abrahanta, Isaacta y Jacobta atska kuti yuripurqä, y alläpa puëdeq Dios kanqätam musyatsirqä, peru jutï Jehovä ima ninan kanqantaqa manam willarqätsu”.

 Kananqa quechuachöpis cäsi llapan nunakunanam Jehovä jutita reqiyan. Wakin estudiösu nunakunaqa Yavë nirmi Diosta reqiyan, peru tsënö kaptimpis, Jehovä jutim mas reqishqaqa. Bibliachö këkaq librukunataqa cäsi pullan mastam hebreu idiömachö qellqayarqan, y tsëchömi Diospa jutin yurin. Tsë idiömachöqa derëchapita itsoqmanmi qellqayan, y Diospa jutintaqa kë chuskun letrakunawanmi qellqayan: יהוה. Kë chuskun letrakunaqa, YHWH letrakunam kayan, y Tetragrämaton nirmi reqiyan. Tetragrämaton neq palabraqa “chusku letrayoq” ninanmi.