02 CAJ YACHACUY

Biblia nishganga cushichimanchimi

GALAYCACHINAPAJ

Chaychicaj runacuna nacarcaycan y laquishga carcaycan problemacunaraycur. Gampis nacaycanquichi gueshyawan o cuyashga castayquicuna wanushganpitapis laquicuycanquichi. Y chaycunapaj pasarga “¿nacarlachuraj imaypis cawacushun?” nirchi tapucunqui. Bibliapa yachachicuynincunaga cushircachimanchi.

1. ¿Imataj Biblia aunimanchi?

Biblia wilamanchi imanir mana alicuna alapa miraycan y tantiachimanchipis ichiclachona chaycuna ushacänanpaj cajta. ¡Chayga ali wilacuymi! Bibliapa aunicuynincunaga yanapäshunqui shamoj tiempucho ali cawacunayquipaj (leiriy Jeremías 29:11, 12). Canan wichanpis yanapämanchi imayca mana alicunapa pasarpis, ali cajcunaman yarpachacunapaj y cushi cushila shuyaränapaj imaycamapis cawananchipaj.

2. ¿Imataj Biblia aunimanchi shamoj tiempupaj?

Bibliaga nin: ‘Wanuy manami canganachu. Nanächicuypis, laquicuypis manami canganachu’ (leiriy Apocalipsis 21:4). Shamoj tiempuchoga muchuy, mana ali ruraycuna, gueshyacuna y wanuypis ilacangami. Cay Pachapis shumaj paraisuman ticranga, chaycho runacuna jaucala imaycamapis cawapäcunga.

3. ¿Imaraj yanapäshunqui Bibliaman yaracunayquipaj?

Lapan runacuna shuyaran mana alicuna ushacänanpaj, pero wata wata mana alicuna mirashganta ricarmi, chayman yaracärinnachu. Ichanga Biblia wilacushganta waran waran shumaj yachacurga, yanapämäshun aunicuynincuna yaracuypaj cashganta musyanapaj (Hechos 17:11). Gampis Bibliapita yachacuptiquirämi quiquiquipita canga yaracunayquipaj o manapis.

SHUMAJ YACHACURCUNAPAJ

Shamoj tiempupaj Biblia wilacushganta yachacurcushun. Nircur ricärishun chay wilacuycuna canan wichan imano runacunata yanapaycan.

4. Mana wanuypa y jaucala cawanapaj Biblia aunimanchi

Ura läducho Biblia aunicushganta jucnin jucnintami ricäriy. Y chay lapanpita, ¿maygancuna cumplicänantataj munanqui? ¿Imanir?

Aunicuycunapa läduncho caycaj textucunata leipäcuy, y caycunapita yachacäriy:

¿Imanirtaj cay textucuna cushichimanchi? ¿Cay aunicuycunaga amiguyquicunata y familiayquitapis yanapanmanchuraj?

Shamoj tiempuchoga caynomi cawashun:

PIPIS. . .	LAPAN RUNACUNA. . .
... nacanganachu, edayanganachu y wanunganachu (Isaías 25:8).	... castancuna cawarimushganta ricapäcunga (Juan 5:28, 29).
... “gueshyaycä” nenganachu (Isaías 33:24; 35:5, 6).	... sanumi cawapäcunga y mozo cashganno cangapaj (Job 33:25).
... mana alicunata mana ruranganachu (Isaías 32:16, 17).	... arushganpita sacsanancama micupäcunga y cushishga goyangapaj (Salmo 72:16; Isaías 65:21, 22).
... chiquinaconganachu ni guerrapis canganachu (Salmo 46:9).	... jauca jaucala cawapäcunga (Salmo 37:11).
... mana alicunapa pasashganta mana yarpangapänachu (Isaías 65:17).	... imaycamapis cushi cushila tiyapäcunga (Salmo 37:29).

5. Bibliaga yanapämanchi más ali cawananchipaj

Canan wichan imayca mana alicuna captinmi, runacuna laquicuycarla capäcun y juccunaga piñacärinmi. Waquincuna imanopapis calpachacärin cay munduta alchananpaj. Bibliapa aunicuynincuna imano runacunata yanapashgantami ricäriy. VIDEUTA ricapäcuy, y caycunapita yachacäriy:

VIDEO: Runacuna chiquinacunanpämi mana munargächu (4:07)

¿Imataj Rafika warmita laquichirgan?
Mana ali ruraycuna mana ushacaptinpis, ¿imanotaj Biblia Rafikata yanapargan?

Bibliapa yachachicuynincunaga yanapämanchi imayca mana alicunapa pasarpis, ali cajcunaman yarparänapaj. Leipäcuy Proverbios 17:22 y Romanos 12:12, y caycunapita yachacäriy: