Salmos 37:1-40
(1a) David qelqashqan salmu.
37 (1b) Fiyu runakunapita ama rabyakuytsu.Paykunata ama nanaparaytsu.
2 Paykunaqa lulu qewata lukiptintsi qawshukar ushakashqannömi ushakanqa.
3 TAYTA DIOSMAN yärakur alikunata ruray.Kay patsacho kawashqaykiyaq pay munashqanno kaway.
4 TAYTA DIOSTA kushishqa sirviy.Tsayno kawaptikimi shonquyki munashqanta kamaripäshunkipaq.*
5 Lapan yarpachakushqaykita TAYTA DIOSPA makinman kachaykuy.Payman yärakuptikiqa yanapashunkimi.*
6 Tsaynöpami lapanpis tantiyakunqa ali runa kashqaykita.Tsayqa kanqa inti jeqamuptin lapanpis rikakashqannömi.
7 TAYTA DIOSMAN yärakur ama lakikuytsu.Yanapashunaykipaq mana ajayaypa shuyaray.Runa rïcuyaptin ama nanaparaytsu.Mana alita rurananpaq yarpachakuptinpis ama cäsupaytsu.
8 Lutalaqa imapitapis ama rabyakuytsu ni piñakuytsu.Rabyarqa lutantami ruranki.
9 Fiyu runakunataqa TAYTA DIOSMI ushakätsinqapaq.Payman yärakuqkunami itsanqa qoshqan nacioncho ali kawapäkunqapaq.*
10 Manapis aykaqlatanami fiyu runakunaqa ushakanqapaq.Mayjina ashirpis manami tarinkipaqtsu.
11 Ali shonqukunami itsanqa Tayta Dios qoshqan nacioncho ali kawanqapaq.Paykunaqa kushishqami kawapäkunqa.*
12 Fiyu runaqa ali runakunata wanuyparaqmi chikin.Imata ruraptinpis nanaq nawinpami rikapaykan.
13 Tsayno kawaptinmi Tayta Dios asikun.Pay musyanmi höran chayamuptin ushakätsinanpaq kashqanta.
14 Fiyu runakunaqa espädanta y flëchantami kamarikärin.Waktsakunata, humildikunata y ali runakunata wanutsinanpaqmi kamarikushqa karkaykan.
15 Jina kaqtami kikinpa espädanwan shonqunpa tuksinqa.Flëchankunatapis chipyaqmi pakir ushanqa.
16 Rïcu karpis fiyu runa kanantsipa trukanqa waktsala karpis ali runa kashqantsimi mas ali kaykan.*
17 Fiyu runakunataqa chipyaqmi TAYTA DIOS ushakätsinqa.Ali runakunatami itsanqa yanapanqa.
18 TAYTA DIOS munashqanno kawaq runakunataqa mana kachaypami cuidan.Paykuna chaskinanpaq kaq herencianqa imaypis manami ushakanqatsu.
19 Nakay shamuptinpis alimi kawapäkunqa.Muchuy kaptinpis mikuynin putsuy putsuymi kanqa.
20 Fiyu runakunaqa tsaki qewa rupar ushakashqannömi ushakanqa.TAYTA DIOSPA contran runakunaqa qoshtaynömi elqanqa.
21 Fiyu runakunaqa imata manakurpis manami kutitsintsu.Ali runakunami itsanqa kuyapäkuq kar pïmaytapis yanapan.
22 TAYTA DIOSPA bendicionninta chaskiq runakunaqa chaskishqan nacioncho alimi kawapäkunqa.Maldicionashqan kaq runakunami itsanqa ushakanqa.
23 Runa imano kawananpaqpis TAYTA DIOSMI kamakätsin.*Pay munashqanno kawananpaqmi tantiyatsin.
24 Makinwan janchararmi ishkiyta munaptinpis joqarkun.
25 Wamra kashqäpita awkinyashqäyaq manami imaypis rikashqätsu ali runa muchuqta.Tsaynöpis manami rikashqätsu wamrankunatapis manapakur puriykaqta.
26 Ali runaqa kuyapäkuq karmi muchuycho kaqkunata yanapan.Wamrankunapis yanapakuqmi karkaykan.
27 Mana alikunata ruranaykipa trukanqa alilata ruray.Tsayno kawarqa imaypis jawkalami kawankipaq.
28 Alita ruraptikiqa TAYTA DIOS kushikunmi.Pay munashqanno kawaqkunataqa imaypis manami kachantsu.Fiyu runakunatami itsanqa miraqninkunatapis ushakätsin.*
29 Ali runakunaqa Tayta Dios qoshqan nacionchömi imayyaqpis tanqa.
30 Ali runaqa shumaq tantiyakuykur ali kaqlatami parlan.Rasun kaqlatami imatapis riman.
31 Tayta Diospa leyninkunatami shonquncho yarparan.Tsaymi imaypis lutanta mana rurantsu.
32 Fiyu runaqa ali runata wanutsinan kashqami maypa aywaptinpis watqaraykan.
33 Tsayno kaptinpis wanutsinanta TAYTA DIOS manami kachapantsu.Ni jutsata jitapänanpaqpis manami kachapantsu.
34 TAYTA DIOSMAN yärakuy.Pay munashqanno imaypis kaway.Tsayno kawaptikiqa paymi yanapashunki qoshushqayki nacioncho kushishqa kawanaykipaq.Rikaykaptikimi fiyu runakunata ushakätsinqapaq.
35 Noqa rikarqämi fiyu runakuna runa mayinta maytsaychöpis munashqanta ruraykätsiqta.
36 Tsayno kaykashqanchömi ushakashqa.Paykunaqa lapanmi elqashqa.
37 Tayta Dios munashqanno kawaq runata rikar tantiyakuy.Ali kawaq runaqa kushishqami kawanqa.
38 Mana wiyakuq runakunami itsanqa chipyaq ushakanqa.Paykunaqa ushakänanpaqnami karkaykan.
39 Ali runakunataqa TAYTA DIOSMI yanapan.Paykunataqa ima nakaykunapitapis tsapanmi.*
40 Fiyu runakunapa makinpita qeshpinanpaqmi yanapan.Tsayno yanapan TAYTA DIOSMAN yärakuptinmi.
Ichic wilacuycuna
^ 37.1-4 Prov. 23.17-18; 24.19-20.
^ 37.5 Prov. 16.3.
^ 37.9 Prov. 2.21-22.
^ 37.11 Deut. 11.8-9; Sal. 25.12-13; Mat. 5.5.
^ 37.16 Prov. 15.16.
^ 37.23 Prov. 20.24.
