Salmos 145:1-21
(1a) David qelqashqan alabanzami.
145 (1b) Tayta Diosnilä, mandamaq reylä, imaypis alabashaykimi.Imaypis jutikita joqarirmi yusulpalä nishayki.
2 Waran waranmi alabashayki.Imayyaqpis jutikita joqarirmi alabashayki.
3 Lapanpaq munayniyuqmi kaykanki.Alabanzakunata cantarmi adorashayki.Munayniyuq kashqaykitaqa manami tantiyayta kamäpakütsu.
4 Tsurïkunatapis milagru rurashqaykikunatami wilapäshaq.Paykunapis mantsariypaq rurashqaykikunatami tsurinkunata wilapanqa.
5 Munayniyuq y espantaypaq kashqaykita imaypis yarparaykäshaqmi.Kushikuypaq rurashqaykikunata manami qonqashaqtsu.
6 Munayniyuq kashqaykitami wilakushaq.Munaynikiwan rurashqaykikunatami pïmaypis rimapäkunqa.
7 Kuyakuq kashqaykitami maychöpis wilakärinqa.Alilata rurashqaykipitami alabapäkushunki.
8 TAYTA DIOSQA ali shonqumi y kuyapäkuqmi kaykan.Kuyakuq karmi juklaqa mana rabyakuntsu.Kuyakuyninqa manami imaypis ushakantsu.*
9 TAYTA DIOSQA pïmaypaqpis alitami ruran.Kuyarmi lapan kamashqankunata rikaykan.
10 TAYTA DIOS, lapan kamashqaykikuna alabaykuläshunki.Munashqaykino kawaqkuna adoraykuläshunki.
11 Ali mandaq kashqaykipitami rimapäkunqa.Espantaypaq rurashqaykikunatami wilakärinqa.
12 Tsaynöpami intëru kay patsachöpis musyapäkunqa munayniyuq kashqaykita.Munaynikiwan mandashqaykitami pïmaypis musyanqa.
13 Rey kashqaykiqa mana ushakaqmi kaykan.Imayyaqpis mandaqmi kankipaq.Promitishqaykitaqa imaypis cumplinkimi.Rurashqaykiqa lapanpis alimi kaykan.
14 Patsa apashqa kaqkunatapis kushirkatsinkimi*.Lakishqa kaykaqkunatapis shakyätsinkimi.*
15 Lapan kawaqkunami qamta shuyaraykäshunki hörancho mikuyta kamaripänaykipaq.
16 Kuyaparmi lapan kawaqkunapaqpis bendicionnikita churamunki.
17 TAYTA DIOS rurashqankunaqa lapanpis alimi kaykan.Kuyapäkuq kashpanmi imatapis alilata ruran.
18 Lapan shonqunwan manakuqkunapa nawpanchömi TAYTA DIOS kaykan.
19 Payta *mantsakuqkunataqa imata munashqantapis kamaripanmi.Ausiliuta manakuptinqa juklami salvan.
20 *Kuyar cäsukuqkunataqa imapitapis tsapanmi.Fiyu runakunatami itsanqa asulan.
21 Noqaqa TAYTA DIOSTAMI alabashaq.Pïmay runapis jutinta joqarishpan imaypis alabapäkutsun.
Ichic wilacuycuna
^ 145.8 Sal. 103.8; Stg. 5.11.
^ 145.14 Wakin runakunaqa desalentädukunatapis valuratsinkimi nipäkun.
^ 145.14 Sal. 146.8.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
