Hebreos 10:1-39
10 *Moisés qelqashqan leykunaqa manami mushuq *pactunötsu kaykan, sinöqa mushuq pactupa lantuyninnölami. Tsaymi tsay leykuna nishqanno cada wata uywakunata *altarcho rupatsipäkuptinpis runakunapa shonqunkunaqa Tayta Dios munashqannötsu karqan.
2 Shonqunkuna Dios munashqanno kaptinqa jutsankunata kacharir manami uywakunata altarcho rupatsipäkunmannatsu.
3 Cada wata uywakunata rupatsirpis jutsa rurashqanta masmi yarparaykan.
4 Chïvukunapa y törukunapa yawarninqa manami pipa jutsantapis maylantsu.
5 Tsaymi kay patsaman Jesucristo shamur Tayta Diosta nirqan:“Sacrificiukunata y tsaki mikuy ofrendakunata manami munankitsu.Tsaykunata apamuptïpis manami chaskinkitsu, sinöqa lapan shonqüwan qamta cäsukunätami munanki.
6 Rupatsina sacrificiukunapis y purificación sacrificiukunapis manami munashqaykinötsu kaykan.
7 Tsaymi kayno nirqä: ‘Munashqaykita ruranäpaq listumi kaykä, Tayta Dios.Cäsukunäpaqmi röllucho qelqaraykan’ ”.*
8 Tsaymi puntata nirqan tsaki mikuykunata, rupatsina sacrificiuta, purificación sacrificiuta y wakin sacrificiukunatapis Tayta Dios mana munashqanta. Tsayno nirqan tsay sacrificiukunata rurananpaq Moisés qelqashqan leykunacho niykaptinpis.
9 Tsaypitanami nirqan shamur Tayta Dios munashqanta rurananpaq. Tsaymi tsay sacrificiukunaqa mana välinnatsu. Tsaypa trukanqa
10 Jesucristumi Tayta Dios munashqanta rurar sacrificiupaq noqantsi rayku juk kutila wanurqan. Tsaynöpami perdonashqana kar Tayta Diospa nawpancho jutsaynaqna kaykantsi.
11 Israel cürakunaqa waran waranmi uywakunata altarcho rupatsipäkun.* Tsayno rupatsiptinpis manami tsaykunawantsu runakunata Tayta Dios perdonan.
12 Jesucristumi itsanqa jutsantsikunapita perdonamänantsipaq juk kutila wanurqan. Kananqa Tayta Diospa alawqa kaq nawpanchömi jamaraykan.
13 Tsaycho jamaranqa lapan contrankunata munayninman Tayta Dios churashqanyaqmi.*
14 Jesucristo juk kutila wanuptinmi akrashqan runakuna imayyaqpis salvashqa kananpaq Tayta Dios perdonarqan.
15 Tsayno kashqantami Espíritu Santupis kayno nin:
16 “Tsay junaqkuna pasarkuptinmi paykunawan pactuta rurashaq.Tsayno rurarmi leynïkunata shonqunkunaman churashaq.Yarpayninkunamanpis leynïkunata qelqashaq.Noqa Tayta Diosmi tsayno nï.*
17 Paykuna ima jutsata rurashqantapis manami yarparäshaqnatsu”.*
18 Tsayno perdonamashpantsimi jutsantsita perdonamänantsipaq ima sacrificiutapis Tayta Dios mana munannatsu.
Qepaman mana kutikunantsipaq yätsishqan
19 Wawqi panikuna, Jesucristo yawarninta jichashqanpitami jana patsacho kaykaq Lugar Santïsimuman mana mantsakuypa yaykushun.
20 Noqantsi rayku wanurmi mushuq nänita kichapämashqantsi Lugar Santïsimuta tsaparaykaq cortïnata pasar yaykunantsipaq.*
21 Tayta Diospa wayincho Jesucristo mandaq cüra kaptinmi
22 lapan shonquntsiwan payman yärakur nawpanman yaykushun. Jutsantsikunata perdonamaptintsimi shonquntsipis maylashqana kaykan. Bautizakuptintsimi cuerpuntsipis chuya yakuwan maylashqa kaykan.*
23 Tayta Dios lapan promitimashqantsita imaypis cumplishqanta musyaykarqa qepaman mana kutikuypa Jesucristuman imaypis yärakushun.
24 Kuyanakunantsipaq y alikunata ruranantsipaq juknintsi juknintsi shakyätsinakushun.
25 Wakin wawqi panikuna juntakayta qelanaptinpis noqantsiqa ama qelanäshuntsu. Jesucristo kutimunanpaqna kashqanta musyaykarqa shakyätsinakunantsipaq imaypis juntakäshun.
26 Pipis Jesucristuta chaskikushqa kaykar jutsa ruraykunata mana kachariptinqa Tayta Dios manami perdonanqanatsu. Jesucristo noqantsi rayku wanushqa kaptinpis manami salvanqatsu.
27 Tsaypa trukanqa juiciu final junaqcho paykunata shuyaraykan bunyaypa bunyaykaq ninalami. Tsay ninaqa Tayta Diospa contrankunata lapantami ushakätsinqa.
28 *Moisés qelqashqan leykunata mana cäsukuq runata ishkay o kimsa runa careaptinqa mana kuyapaypami wanutsipäkuq.*
29 Tsayno kaykaptinqa ¿manatsuraq mas peor castiganqa Jesucristuta chaskikuykar wilakuyninta mana cäsukuqkunataqa? Paykunaqa kikin Tayta Diospa Tsurinta manakaqmanmi churarkaykan. Mushuq *pactuta rurar salvamänantsipaq jichashqan yawartapis* manakaqmanmi churarkaykan. Kuyapämaqnintsi Espíritu Santutapis fiyupami rabyanätsin.
30 Musyantsimi tsayno kaqkunapaq Tayta Dios rabyakushqanta. Payqa kaynömi nirqan:“Lutanta rurashqanpita kikïmi juzgashaq.Jutsa rurashqanman tupumi castigashaq”.*
Tsaynömi mastapis kayno nirqan:“Akrashqan runakunatapis Tayta Dios juzganqami”.*
31 Imayyaqpis kawaq Tayta Dios juzgashuptikiqa pasaypa mantsakuypaqmi kanqa.
32 Ama qonqapäkuytsu Jesucristuta chaskikärishqayki witsan tsayjina nakaykarpis qepaman mana kutikärishqaykita.
33 Wakinnikiqa runakunapa nawpanchömi ashlir ushashqa y maqar ushashqa kapäkushqanki. Wakinnikiqa maqashqa kaykaqta y ashlishqa kaykaqta yanapar shakyätsishqankimi.
34 Jesucristuta chaskikärishqanpita carcilcho wichqaraqkunatapis kuyapar yanapashqankimi. Imaykita apakäriptinpis mana lakikuypami kachaparishqanki. Tsayno kachaparishqanki jana patsacho mana ushakaq herenciata chaskinaykipaq kashqanta musyapäkushpaykimi.
35 Kananpis tsaynöla Tayta Diosman mana ajayaypa yärakäriy. Tsayno kawarmi alinnin kaq premiuta chaskipäkunkipaq.
36 Imano nakarpis Tayta Dios munashqanno kawarqa pay promitishushqaykita chaskipäkunkipaqmi.
37 Tayta Diospa palabranchöpis kaynömi niykan:“Salvador shamunanpaq ichiklanami pishiykan.
38 Munashqäno kawaq runaqa noqaman yärakamarmi kawanqa.Qepaman kutiqkunatami itsanqa rikaytapis mana munätsu”.*
39 Noqantsiqa manami qepaman kutiq runano infiernuman qaykushqa kanantsipaqtsu kaykantsi, sinöqa Jesucristuman yärakur salvashqa kanantsipaqmi.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 10.5-7 Sal. 40.6-8.
^ 10.11 Éxo. 29.38.
^ 10.12-13 Sal. 110.1.
^ 10.16 Jer. 31.33.
^ 10.17 Jer. 31.34.
^ 10.20 Lugar Santïsimuta tsaparaykaq cortïnata pasar yaykunantsipaq nirqa Tayta Diospa nawpanman chayanantsipaq kashqantami niykan.
^ 10.22 Eze. 36.25.
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 10.28 Deut. 17.6; 19.15.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 10.29 Éxo. 24.8; Heb. 13.20.
^ 10.30a Deut. 32.35.
^ 10.30b Deut. 32.36.
^ 10.37-38 Hab. 2.3-4.
