“Imallatapis Tataymanta sutiypi mañakojtiykichejqa, pay qosonqachej” (Juan 16:23).

Jesús nerqa jina Diosqa munan paymantapuni mañakunanchejta. Nitaj munanchu orakunanchejta santosnejta, angelesnejta chayri wañusqa familiaresninchejnejta. Jesucristoj sutinpitaj mañakunanchejta munan. Jesuspa sutinpi mañakuspaqa rikuchinchej pay noqanchejrayku imatachus ruwasqanta jatunpaj qhawasqanchejta. Jesús nerqa: “Mana pipis Tatayman chayayta atinchu, mana noqanejtaqa”, nispa (Juan 14:6).

“Sonqoykichejpi kaj chhikata payman willakuychej” (Salmo 62:8).

Jehová Diosmanta mañakushaspaqa, munasqa tatanchejwanpis parlarishasunman jina parlana. Uj libromanta leespa orakunamanta chayri kikillantapuni orakunamantaqa, Diosninchejwanqa respetowan, tukuy sonqotaj parlarina.

“Imatapis munayninman jina mañakojtinchejqa, pay uyariwanchej” (1 Juan 5:14).

Bibliapeqa niwanchej Dios imatachus noqanchejrayku ruwananta, imatatajchus ruwananchejta munasqanta. Dios mañakusqanchejta allinpaj qhawananpajqa, ‘munayninman jina mañakunanchej’ tiyan. Diospa munayninta allinta yachanapajqa Bibliata estudiananchej tiyan. Ajinamanta mañakusqanchejta uyariwasun.

Imatachus necesitasqanchejta mañakusunman. Diosmantaqa mañakusunman necesitasqanchej imasta, mikhunata, ropata chayri maypichus tiyakunanchejta. Chantapis mañakullasunmantaj sumajta imatapis ajllanapaj, pruebasta aguantanapajtaj kallpata. Chantá mañakullasunmantaj perdonanawanchejta, creeyninchejta wiñachinanta, jarkʼanawanchejtataj (Lucas 11:3, 4, 13; Santiago 1:5, 17).

Wajkunapaj mañapuna. Kʼacha tatasqa mayta kusikunku wawasninku munanakojtinku. Jehová Diospis tatanchej kasqanrayku munan purajmanta cuidanakunanchejta. Diosmanta mañakunapuni qosanchejpaj chayri warminchejpaj, wawasninchejpaj, familianchejpaj, amigosninchejpaj ima. Diospa kamachin Santiago nerqa: “Ujkuna ujkunapajtaj Diosmanta mañapuychej”, nispa (Santiago 5:16).

Agradecekuna. Bibliaqa nin Diosninchej wajkunapaj allin kʼacha imasta ruwasqanta. Payqa runaspaj ‘cielomanta parachimun, tiemponpitaj ashkhata poqochin, mikhuna patapi uywan, sonqosninkutataj kusiywan juntʼachin’ (Hechos 14:17). Jehová Dios tukuy imata noqanchejrayku ruwasqanpi piensarispaqa, payman agradecekuyta munasun. Chantapis agradecekusqanchejta rikuchillasunmantaj kamachiwasqanchejta kasukuspa (Colosenses 3:15).

Ichapis llakikusunman tukuy sonqo mañakojtinchejpis Dios mana chay ratochu uyariwasqanchejta reparaspa. Jinapis Diosqa noqanchejmanta llakikuwanchejpuni. Chayrayku kunanqa qhawarina mana uyariwasqanchejta reparaspapis, Diosmantaqa mañakunallanchejpuni kasqanta.

Kinsa paginapi Steve sutiyoj runamanta parlarerqanchej. Payqa nillanpuni: “Manachus Diosmanta mañakuyman karqa chayqa, llakisqallapunichá kashayman karqa”, nispa. Payqa Bibliamanta yachakuyta qallarerqa, chaypitaj yachakorqa mana saykʼuspa Diosmanta mañakunan kasqanta. Kunantaj Steve nin: “Diosman mayta agradecekuni amigosniy yanapawasqankumanta, munakuwasqankumanta ima. May kusisqapuni kani”, nispa.

Jennyqa yuyarqa mana Dios uyarinanpaj jinachu kasqanta. Pay nin: “Manchay llakisqa kashaspa, Diosmanta yanapata mañakorqani imajtinchus ajina kashasqayta yachanaypaj”, nispa. ¿Chayta ruway yanaparqachu? Arí. Pay nin: “Dioswan parlarisqayqa yanapawarqa imaynatachus pay qhawawan, ajinallatataj qhawakunaypaj. Repararqanitaj sonqoy juchachawajtinpis, Diosqa mana juchachawasqanta. Mana saykʼupunaypajtaj yanapawarqa. Diosmanta mañakusqayqa yanapawarqa, payta sumaj amigoyta jina, kʼacha tatayta jina, Diosniyta jinataj qhawanaypaj. Payqa noqawanpuni kashan, munasqanman jina ruwanaypaj kallpachakojtiytaj yanapawanqa”, nispa.

Isabelmantañataj parlarina. Pay onqoj kashajtin doctoresqa nerqanku wawitan malsitu nacekunanta. Chaytaj maytapuni llakicherqa. Wakin runasqa orqhochikunanta ima nerqanku. Isabel nin: “Nipuni chay llakiyta aguantanayta yuyarqani”, nispa. ¿Imatá Isabel ruwarqa? Pay nin: “Diosmanta mana saykʼuspa yanapanawanta mañakorqani”, nispa. Tiemponmantaj wawitan nacekorqa, Gerardtataj suticharqa. Payqa malsitupuni nacekorqa. Isabelqa repararqa mañakusqanta Dios uyarisqantapuni. Imajtinchus pay nin: “14 watasña pasajtinpis wawayqa Diospa bendicionnin. Waway malsitu kajtinpis, kusisqata rikuspaqa Dios mañakusqayta uyariwasqanta reparani”, nispa.

Chay nisqankoqa yuyarichiwanchej imatachus uj salmista nisqanta. Pay nerqa: ‘Tata Dios, qan uyarinki llampʼu sonqo runaspa mañakusqankuta. Qan paykunaj sonqosninkuta oqharinki, paykunata uyarinki’, nispa (Salmo 10:17). Chayrayku nisunman Diosmanta mana saykʼuspa mañakunallapuni kasqanta.

Bibliapeqa Jesús ashkha kutista mañakusqanta leesunman. Aswan rejsisqaqa padrenuestro mañakuy, mayqentachus discipulosninman yachacherqa. ¿Imatá chay mañakuymanta yachakusunman?