Kaypi tʼukuriy: Juliaqa espejopi may wiritapis kashanman jina qhawakun, nikuntaj: “Tulluyanay tiyan”, nispa. Tatasnin, amigasnin ima tullitulla kashasqanta nejtinkupis.

Juliaqa tulluyananpaj, kinsa kilosta uraqananpaj wakin imasta ruwananpi yuyashan. Wakin días mana mikhunantataj nin.

Julia jina yuyawaj chay, ¿imatá ruwawaj?

Allin rijchʼayniyoj kayta munasqaykeqa mana sajrachu. Bibliaqa allin rijchʼayniyoj qharismanta, warmismanta ima parlan, chaykunamanta wakintaj Sara, Raquel, Abigail, José, David ima kanku. Bibliaqa nillawanchejtaj Abisag sutiyoj warmi “ancha kʼachitapuni” kasqanta (1 Reyes 1:4).

Ashkha jovenesqa imayna rijchʼayniyojchus kasqankumanta anchata llakikunku. Chaytaj paykuna kikinpaj mana allinchu. Kaypi tʼukuriy:

• Ashkha sipaskunata tapurisqankuman jina 10 sipaskunamanta 6 nisqanku wiritas kashasqankuta, chaywanpis chay 10 sipaskunamantaqa, iskaylla wiritas kasharqanku.

• Chantá tullitu sipaskunata tapurisqankuman jina 10 sipaskunamanta 5 nisqanku wiritas kashasqankuta.

• Wakin sipaskunaqa tulluyayta munasqankurayku anorexia nisqawan onqonku, chay onqoywan kajkunaqa tullitus kaspapis wiritas kasqankuta yuyanku, chayrayku yarqhachikuspapis mana mikhunkuchu.

 Reparakusqaykiman jina anorexia onqoywan, chayri chayman rijchʼakoj onqoywan onqosqa kashanki chayqa, yanapata maskʼay. Tatasniykiwan chayri pipichus atienekusqaykiwan parlariy. Biblia nin: “Uj kawsaqeqa tukuy tiempopi munakuyniyoj, uj wawqetaj runawan khuska llakiypi sayaykunampaj”, nispa (Proverbios 17:17).

Imayna runachus sonqonchejpi kasqanchejqa allin rijchʼayniyojchus manachus kasqanchejta rikuchin. Rey Davidpa wawan Absalón, imayna rijchʼayniyojchus kasqanta qhawarina. Biblia paymanta nin:

“Mana tarikorqachu ujpis Absalón jina alajitoqa, sumaj uyarisqa runataj. Chaki puntanmanta uma puntankama ima munay juntʼasqa karqa”, nispa (2 Samuel 14:25).

Absalonqa jatunchakoj, imatapis payllapaj munaj, wasanchaj runa ima karqa. Chayrayku Bibliaqa Absalonmanta mana allintachu parlan, manaqa, wasanchaj, mana pʼenqayniyoj, mayta chejnikoj runa kasqanta ima niwanchej.

Chayrayku Biblia ajinata yuyaychawanchej:

“Mosoj runamanta pʼachawan jina pʼachalliku[ychej]”, nispa (Colosenses 3:9, 10).

“Kʼachita kasqaykichejqa ama jawallamanta kʼachanchakuypichu kachun [...]. Manachayqa, kʼachanchakuyniykichejqa sonqoykichej ukhupi kachun”, nispa (1 Pedro 3:3, 4).

Kʼachitu cuerpoyoj kayta munasqayki mana sajrachu kajtinpis imayna runachus kayta munasqayki astawan sumaj. Tiempo pasasqanman jina waj runasqa ima kʼacha kaykunasniyojchus kasqaykita astawan qhawanqanku, allin rijchʼayniyoj kasqaykita qhawanankumantaqa. Uj sipas Phylicia sutiyoj nin: “Runasqa kʼachita kasqanchejta qhawawasunman, chaywanpis imayna runachus sonqonchejpi kasqanchejta, ima kʼacha kaykunasniyojchus kasqanchejtapis astawan yuyarikonqanku”, nispa.

¿Imayna cuerpoyojchus kasqaykiwan kusisqachu kashanki?

¿Maykʼajllapis yuyarqankichu aswan allin rijchʼayniyoj kanaykipaj operachikuyta chayri pisillata mikhuyta?

Cuerpoykimanta, ¿imastaj uj jina kananta munawaj? (Marcaykuy mayqenkunamantachus llakikusqaykita).

• ÑAWISNIY

• SENQAY

• CHUJCHAY

• CUERPOY

• CEJASNIY

• COLORNIY

Ichá uj kaj, iskay kaj tapuykunaman, “arí” nispa kuticherqanki, kinsa tapuypitajrí, ichá kinsaman chayri tawaman marcaykorqanki. Wakinkunaqa ichá mana qhawakusqaykiman jinachu qhawasonqanku. Chayrayku maychus kajllata rijchʼayniykita qhawakuy (1 Samuel 16:7).