“Diospajqa ni imapis mana atikojqa kanchu” (Lucas 1:37, Diospa Palabran).

 “Diospajka tucuy ima aticun” (Lucas 1:37, Mosoj Testamento, 1985).

 Tukuy atiyniyoj Diosqa imastachus runas nipuni ruwayta atinkumanchu, chay imasta ruwayta atin. Nipuni imapis Diosta jarkʼanmanchu nisqanta mana juntʼananpajqa.

 Griego parlaypi nisqanman jina, kay versiculoqa ajinata traducikullanmantaj: “Dios imatachus nisqanmanta ni imapis mana atikojqa kanchu”, nispa. Jehová a Diospa nisqanqa juntʼakunpuni. Chayrayku Lucas 1:37 versiculotaqa kay jinamanta traducikullanmantaj: “Diospa nisqasnenqa juntʼakunpuni” chayri “Diospajqa mana imapis mana atikojqa kanchu”, nispa. Chay jinamanta traducikusqanqa cheqallantaj, imajtinchus entiendechillanpuni Diospa tukuy ima nisqasnenqa juntʼakunantapuni. Arí Diospajqa ni imapis kanchu mana ruway atina jinaqa (Isaías 55:10, 11).

 Bibliapeqa waj ashkha versiculospipis chayman rijchʼakoj palabras oqharikullantaj. Uj kuti, Jehovaqa uj angelninnejta nerqa Abrahanpa warmin Sara onqoj rikhurinanta. Chaypachataj Saraqa viejitaña karqa, nitaj jaykʼajpis wawayojchu karqa. Diosqa chay angelnejta nerqa: “Jehová Diospajqa, ¿kanmanchu imallapis mana ruway atinaqa?”, nispa (Génesis 18:13, 14). Imastachus Dios ruwasqanpi tʼukuriytawan, Job nerqa: “Imatachá ruwayta munanki chaytaqa ruwankipuni, nitaj imapis jarkʼasunkimanchu”, nispa (Job 42:2). Jesuspa discipulosnenqa Diospa kamachiykunasninta mana juntʼayta atinankuta yuyaspa llakikorqanku. Chayrayku Jesusqa paykunata yuyaricherqa Diospajqa tukuy imapis atikusqanta (Mateo 19:25, 26). b

 Lucas 1:37 versiculopi rikhurej palabrastaqa, ángel Gabriel nerqa sipas doncella Mariaman. Gabrielqa Mariaman nerqa ‘Aswan Patapi kaj Diospa Wawanta’ nacechikunanta, ‘payman Jesús sutita churananta’, chay Wawa Diospa Gobiernonpi Rey kananta, Gobiernontaj wiñaypaj sayananta (Lucas 1:26-33; Apocalipsis 11:15).

 Mariaqa mana piwanpis casarasqachu kasqanrayku chay angelta taporqa: “¿Imaynataj chay kanmanri? Noqaqa mana ni pi qhariwanpis puñuykunirajchu”, nispa (Lucas 1:34, 35). Gabrieltaj nerqa Diospa espíritu santon payman jamunanta, ajinamantataj onqoj rikhurinanta. Chaypachataj Jesusqa cielopi uj ángel jina kausakusharqa. Jehová Diostajrí, Wawan Jesuspa kausayninta espíritu santonpa atiyninwan Mariaj wijsanman churarqa (Juan 1:14; Filipenses 2:5-7). Ajinapitaj Mariaqa uj milagronejta onqoj rikhurerqa. Gabrielqa María Diospa atiyninpi astawan creenanpaj nerqa, Familian Elisabetpis awelita kayninpi reciellanraj onqoj rikhurisqanta. Elisabetwan qosan Zacariaswanqa mana wawasniyojchu karqanku, imaraykuchus Elisabetqa mana wawata rejsiyta atejchu (Lucas 1:36). Elisabetpa wawanqa Juan Bautista karqa, Jehovataj pay runasman willananmanta ñaupajtaña willarqa (Lucas 1:10-16; 3:1-6).

 Chantá Gabrielqa ichapis Mariapi, Elisabetpi yuyaspa nerqa imatachus Lucas 1:37 nisqanta. Chay palabrastaj kay tiempomanta Jehovaj kamachisnintapis yanapallantaj, Jehová imastachus nisqanta juntʼanallanpipuni atienekunankupaj. Jehovaj nisqasninmanta ujqa kashan, kay jallpʼamanta gobiernospa cuentanmanta paypa Gobiernonta churananta nisqan. Chay Gobiernopitaj cheqan kamachej Wawan Jesucristo Rey (Daniel 2:44; 7:13, 14).

 Lucas libro imasmantachus parlashasqanta yachanaykipaj kay videota qhawariy.