Juchaqa Diospa kamachiykunasninpa contranpi imatapis ruway, yuyay chayri munay. Biblia nisqanman jina, Diospa ñaupaqenpi ima sajrallatapis ruwajtinchej, chayri ima mana cheqan kajllatapis ruwajtinchej juchallishanchejña (1 Juan 3:4; 5:17). Allin kajta yachashaspa mana ruwaypis juchallataj (Santiago 4:17).

 Bibliapi “jucha” ninapaj oqharikusqan palabraqa, “pantay” niyta munan. Imaynatachus uj runa flechasta waj ladollaman chayachispa pantan, ajinallataj. Bibliaqa unay israelita soldadosmanta nin: “Paykunaqa warakʼawan rumita warakʼaspa uj chujchamanpis mana pantaspa japʼichej kanku”, nispa (Jueces 20:16). Chay versiculopi “mana pantaspa” nisqanqa, “mana juchallispa” nikullanmantaj. Chayrayku juchallikoyqa, Diospa kamachiykunasninta mana pantaspa juntʼay kashan.

 Diosqa tukuy imata ruwasqanrayku, runaspa kamachiykunata churananpaj derechoyoj (Apocalipsis 4:11). Noqanchejtaj ruwasqasninchejmanta payman cuentata qonachej kanqa (Romanos 14:12).

¿Kanchu pipis mana juchallejqa?

 Mana. Bibliaqa runasmanta nin: “Tukuyninku juchallikusqankurayku, mana taripayta atinkuchu Diospa jatun kayninta”, nispa (Romanos 3:23; 1 Reyes 8:46; Eclesiastés 7:20; 1 Juan 1:8). ¿Imajtintaj ajinari?

 Adanwan Evawanqa Diospa rijchʼayninman ruwasqa kasqankurayku, mana pantayniyoj, mana juchayojtaj karqanku (Génesis 1:27). Jinapis paykunaqa, Diosta mana kasukuspa juchallikorqanku (Génesis 3:5, 6, 17-19). Chay juchatataj tukuy wawasninkuman herenciata jina saqewarqanchej (Romanos 5:12). Chayrayku rey David jina nisunman: “Noqaqa juchayoj nacekorqani”, nispa (Salmo 51:5).

¿Tukuy juchaschu kikin kanku?

 Mana. Bibliaqa Sodoma llajtapi runasmanta nin, ‘millay sajra runas kasqankuta, millay juchastataj ruwasqankuta’. Chantá nillantaj, paykunaj juchasninkoqa “manchay jatuchaj” kasqankuta (Génesis 13:13; 18:20). ¿Imaynapí yachasunman mayqen juchaschus sinchʼipuni kasqankuta? Chaypaj kay kinsa tapuykunaman kutichina.

1.   ¿Jatun juchachu? Bibliaqa kaykuna jatun juchas kasqankuta nin: khuchichakuy jucha, santosta yupaychay, suwakuy, machaykuy, sutʼi suwa kay, runata wañuchiy, layqa kay ima. Chay juchastaqa ni imarayku ruwananchejchu tiyan (1 Corintios 6:9-11; Apocalipsis 21:8). Bibliaqa nillantaj, chay juchasqa pantaykuywan mana kikinchu kasqanta. Chayqa kanman mana piensarispalla imatapis parlarpariy chayri ruwarpariy. Chaykunata ruwaspaqa, wajkunaj sonqonkuta nanachisunman (Proverbios 12:18; Efesios 4:31, 32). Jinapis Bibliaqa niwanchej, ni mayqen juchatapis pisipajchu qhawananchej kasqanta. Imaraykuchus chayqa, aswan jatun juchapi urmachiwasunman (Mateo 5:27, 28).

2.   ¿Yachashaspachu juchallin? Wakin runasqa, Diospa kamachiykunasninta mana rejsisqankurayku juchallikunku (Hechos 17:30; 1 Timoteo 1:13). Jinapis wakenqa, imachus jucha kasqanta yachashaspa juchallikunku (Números 15:30, 31). Ni mayqen jucha allinpaj qhawasqachu kajtinpis, Bibliaqa nin yachashaspa juchallikojkunaqa ‘sajra sonqoyoj kasqankuta’ (Jeremías 16:12).

3.   ¿Sapa kutichu juchallin? Bibliaqa sutʼita niwanchej, uj kutita juchallikoyqa sapa kuti kikin juchallatapuni ruwaywan, mana kikinchu kasqanta (1 Juan 3:4-8). Wakenqa allin kajta yachashaspa juchallikullankupuni. Diosqa chay jina runasta chinkachenqa (Hebreos 10:26, 27).

 Jatun juchasta ruwajkunamanta wakenqa, juchallikusqankumanta mayta llakikunku. Rey Davidwan ajina karqa. Pay nerqa: “Pantasqasneyqa umay patata wasarishan, llasa qʼepi jina ancha llasapuni noqapajqa”, nispa (Salmo 38:4). Bibliaqa chay jinata llakikoj runasman nin: “Sajra runaqa sajra kausayninta saqechun, wajkunata ñakʼarichej runapis yuyaychakusqanta qonqachun. Jehová Diosman kutirikuchun, paytaj khuyakonqa, Diosninchejman kutirikuchun, paytaj mana michʼakuspa perdonanqa”, nispa (Isaías 55:7).