Kay yachaqanapi kay tapuykunaman kutichisun:

•  ¿Ima niytá munan piwanpis rejsinakuy?

•  ¿Wakichisqachu kashanki piwanpis rejsinakunaykipaj?

 Wakin runasqa piwanpis rejsinakunankupaj llojsinku uj rato kusirikunallankupaj. Kay yachaqanapi piwanpis llojsiy chayri rejsinakuy palabrastaqa, oqharisunchej uj qhariwan uj warmiwan uj tiempota rejsinakunankupaj llojsisqankumanta parlanapaj. Ajinata llojsinku casaraspa igualanankutachus manachus tantearinankupaj. Chaytataj mana pujllakuyta jinallachu qhawana tiyan.

 Uj tiempota piwanpis rejsinakuytawanqa, ajllanayki kanqa paywan casarakunaykitachus manachus. Chayrayku piwanpis rejsinakunaykipaj llojsinki chayqa, wakichisqa kanayki tiyan casarakunaykipaj chayri chaykamallaña novianaykichejpaj.

 Ama qonqaychu: Piwanpis llojsinaykipaj wakichisqa kasqaykita yuyanki chayqa, casarakunaykipajpis wakichisqallataj kanayki tiyan.

 Piwanpis rejsinakunaykipaj llojsinki chayqa, ichapis paywan casarakunki. Chayrayku tʼukurinayki tiyan casarakojtiyki imaynatachus casado kausaypi yanapakunaykipi. Kay tapuykunapi tʼukuriy:

•   ¿Imaynatá familiaykiwan apanakunki? Llakisqa chayri phiñasqa kashajtiyki, ¿imaynatá tatamamaykita, hermanosniykitapis parlapayanki? Casarajtiyki ajinallatataj señoraykita chayri qosaykita parlapayanki.

   Biblia niwanchej: “Qankunamanta wijchʼuychej jaya sonqo kayta, rabiakuyta, kʼajaj phiñakuyta, qhaparqachayta, sonqota nanachinapaj jina parlayta, jinallataj tukuy sajra kajtapis” (Efesios 4:31).

   Kayta tapurikuy: “¿Tatasniywan hermanosniywan ninkumanchu respetowan paykunata parlapayasqayta? Paykunawan mana de acuerdochu kajtiy, ¿paykunata sumajllawanchu parlapayani chayri phiñarpakuspachu discutini?”.

•   ¿Wajkunaj allinninkuta maskʼankichu? Casarakuspaqa imachus señoraykiman chayri qosaykiman gustasqanpi piensanayki kanqa. Ashkha kutispitaj imachus payman gustasqanta ruwanayki kanqa mana gustasojtinpis.

   Biblia niwanchej: “Sapa uj maskʼallachunpuni wajkunaj allinninta, amataj paypa allinnillantaqa” (1 Corintios 10:24).

   Kayta tapurikuy: “¿Nisqaytapunichu valechini? ¿Ima ninkutaj wajkuna noqamanta, gustusapa kasqaytachu chayri wajkunapi yuyasqaytachu ninku? ¿Ruwasqaypi yachakunchu wajkunaj allinninkuta maskʼasqay?”.

•   ¿Kʼumuykukoj sonqochu kanki? Kʼumuykukoj sonqoyoj qosa chayri warmeqa, pantasqanmanta mana wajkunatachu juchachan, manaqa sonqomantapacha “perdonariway” niyta atillan.

   Biblia niwanchej: “Tukuyninchej ashkha kutista pantanchej” (Santiago 3:2).

   Kayta tapurikuy: “¿Pantaspa chay ratochu ʼnoqapuni pantaykuniʼ nini chayri achakistachu churani? Pillapis allinta ruwanaypaj yuyaychariwajtin, ¿chay ratochu phiñarpakuni?”.

•   ¿Qolqeta gastanaykipaj sumajtachu qhawarikunki? Qolqeta mana wayrarpachillankichu chayqa, casarakuspa qosaykiwan chayri señoraykiwan mana chaymanta discutinkichejchu. Imajtinchus qhariwarmisqa qolqemanta astawan phiñanakuyta yachanku.

   Biblia niwanchej: “Mayqennillaykichejpis wasita ruwakuyta munan chayqa, ¿manachu ñaupajtaqa tiyaykukuspa qolqentaraj qhawarikun, wasinta tukuchananpaj kapunchus manachus chayta?” (Lucas 14:28).

   Kayta tapurikuy: “¿Qolqeta alcanzachikunichu chayri manukuspallapunichu kani? ¿Imaynatá rikuchini mana qolqeta gastarpallasqayta?”.

•   ¿Imaynataj Jehovawan kashanki? Jehovaj testigon kanki chayqa, uj sumaj horario kapusunan tiyan sapa semana Bibliata estudianaykipaj, reunionesmanpis rinaykipaj.

   Biblia niwanchej: “Kusisqa kanku Diosta necesitasqankuta reparakojkunaqa” (Mateo 5:3).

   Kayta tapurikuy: “¿Kallpachakunichu creeyniyta astawan sinchʼiyachinaypaj? ¿Diosta yupaychaytachu ñaupajman churani chayri waj imastachu?”.

 Ama qonqaychu: Piwanchus casarakunki chaypajqa, qan kanayki tiyan uj sumaj qosa chayri uj sumaj warmi. Payqa mana pillawanpis casaranmanchu. Chayrayku uj sumaj qosa chayri uj sumaj warmi kanaykipaj kallpachakunki chayqa, ichá pichus qan jinallataj kallpachakushan chay runa qanwan rejsinakuyta munanqa.