IREN MEHN KASUKUHL 7
Dahkot Wehin Koht?
1. Dahkot Wehin Koht?
Dahme kahrehda Sises ketin wia Nanmwarki me keieu mwahu?—MARK 1:40-42.
Wehin Koht iei koperment en nanleng ehu. E pahn wiliandi koperment teikan koaros oh ih me Koht pahn ketin doadoahngki pwe en ketin kapwaiada kupwure nanleng oh sampah. Met wia rohng mwahu ehu me Koht pahn ketin doadoahngki sapwellime Wehi ni ahl wet. Kereniong Wehin Koht pahn kaitarala anahn en aramas ong kaunda mwahu. E pahn kaminiminihpene koaros me momour nin sampah.—Wadek Daniel 2:44; Madiu 6:9, 10; 24:14.
Wehi ehu kin anahne nanmwarki men. Siohwa ketin idihada sapwellimeo, Sises Krais, pwe en wia Nanmwarkien sapwellime Wehi.—Wadek Kaudiahl 11:15.
Kilang kisin kasdo Dahkot Wehin Koht?
2. Dahme kahrehda Sises ketin wia Nanmwarki me keieu mwahu?
Sapwellimen Kohto ketin wia Nanmwarki me keieu mwahu pwehki e kin ketin kadek, tengedihong dahme pwung. (Madiu 11:28-30) E pil sapwellimaniki manaman me kak sewese aramas pwehki e pahn ketin kaunda sampah sang nanleng. Mwurin eh ketin iasada, e ketidahla nanleng oh ketidi ni palimaun en Siohwa oh ketin awiawih. (Ipru 10:12, 13) Mwuri, Koht ketikihong ih manaman en tepida kakaun.—Wadek Daniel 7:13, 14.
3. Ihs me pahn iang Sises kaunda?
Pwihn ehu me adaneki “aramas akan me sapwellimen Koht [“aramas sarawi kei,” NW]” pahn iang Sises kakaun nanleng. (Daniel 7:27) Tepin aramas sarawi ko me pilipilda iei sapwellimen Sises wahnpoaron lelepek ko. Siohwa ketin pousehlahte pilada ohl oh lih lelepek kan nin duwen aramas sarawi kei leledo met. Duwehte Sises, irail kin iasada nin duwen ngehn kei.—Wadek Sohn 14:1-3; 1 Korint 15:42-44.
Aramas depe me pahn kohdahla nanleng? Sises ketin kahdaneki irail “kisin pwihn sihpw.” (Luk 12:32) Irail pahn lelte meh 144,000. Irail pahn iang Sises kakaun sampah.—Wadek Kaudiahl 14:1.
4. Dahme wiawi ni ahnsou me Sises ketin tepida kakaun?
Wehin Koht tepida kakaun nan pahr 1914. * Dahme Sises ketin tepin wia nin duwen Nanmwarki men iei e ketin sikendihong Sehdan oh ienge ngehn saut akan nin sampah. Sehdan inenen mwakarada oh tepida kahrehda kahpwal nan sampah pwon. (Kaudiahl 12:7-10, 12) Sang ahnsowo leledo met, kahpwal kan me aramas akan ahneki kin uhdahn lalaudla. Mahwen, lehk laud, soumwahu, oh rerrer en sahpw kin wia kisehn “kilel” me kereniong Wehio pahn kaunda sampah ni unsek.—Wadek Luk 21:7, 10, 11, 31.
5. Dahme Wehin Koht kin kapwaiada met oh pahn kapwaiada ni ahnsou kohkohdo?
Pwehki doadoahk en kalohk sampah pwon, Wehin Koht kahredahr pokon kalaimwun en aramas akan sang wehi koaros en miniminpene. Aramas mpahi rar kei wiahlahr towe kan en Wehin Koht pahn kaundahn Sises. Wehin Koht pahn pere irail ni ahnsou me e pahn kasohrehla koasoandi suwed en sampah ahnsou wet. Eri, koaros me men paiekihda Wehin Koht anahne sukuhlki ren wia towe peik kan pahn kaundahn Sises.—Wadek Kaudiahl 7:9, 14, 16, 17.
Erein sounpar 1,000, Wehio pahn kapwaiada dahme Koht ketin kupwurki ong aramas akan nin tapio. Sampah pwon pahn wiahla paradais ehu. Mwurin met, Sises pahn ketin kapwurelahng Semeo Wehio. (1 Korint 15:24-26) Mie me ke ese me ke men padahkihong duwen Wehin Koht?—Wadek Melkahka 37:10, 11, 29.
^ par. 6 Me pid duwen ia duwen Paipel eh kohpada duwen pahr 1914, menlau kilang pali 248-251 en pwuhken Dahme Paipel Kak Padahkihong Kitail?
