Datwan hem toktok wea wanfala international team blo pipol wea duim research talem abaotem climate change. If iu bilivim wanfala Creator hem stap wea kea abaotem olketa man, datfala toktok maet remindim iu lo staka natural process wea God wakem lo earth for planet blo iumi recover seleva.

Bat from wei wea olketa man kosim staka damage lo earth, olketa natural process hia hem no inaf nao for mekem earth savve stap for olowe. Why nao iumi savve trustim dat God bae duim samting for stretem datwan?

Lukim lo box list blo olketa scripture wea mekem iumi sure dat earth bae stap olowe and kamap gud bak moa.

• God creatim planet blo iumi. “Lo start, God creatim skae and earth.” —Genesis 1:1

• God nao ownim planet blo iumi. “[Jehovah] a seleva nao hemi onam disfala wol wetem evrisamting insaet long hem.” —Sams 24:​1, SIPB.

• God designim planet blo iumi for stap olowe. “Yu bin mekem strong faondesin blong disfala wol, an bae hemi no save muv.”—Sams 104:​5, SIPB.

• God promisim hao laef lo earth bae barava gud and planet blo iumi bae stap olowe. “Datfala tru God, Man wea wakem earth, . . . wea creatim earth no for stap nating, bat hem wakem for pipol stap lo hem.”—Isaiah 45:18.

• God promisim hao olketa human being bae stap lo planet blo iumi for olowe. “Bae olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.”—Sams 37:​29, SIPB.

God hem designim disfala earth for deal witim normal laef blo pipol evriday lo earth. Bible profesi hao Jehovah God bae finisim olketa nogud samting wea spoelem planet blo iumi lo raet taem wea hem markem.—Revelation 11:18

Bible promisim hao God bae changem disfala earth for kamap wanfala healthy and naesfala paradaes and hem bae givim evri samting wea bae mekem olketa man for hapi.—Psalm 145:16.