Distaem tu-thri pipol nomoa showim respect. Olketa rude patient singaot lo olketa doctor; olketa kastoma lo restaurant tok kros lo olketa waiter; olketa passenger wea aot of kontrol attakim olketa flight attendant; olketa noti pikinini tok spoelem, threatenim, and attakim olketa teacher; and samfala politician involve lo corruption lo semtaem wea olketa nara politician waka hard for pruvim dat olketa gud pipol.

 Bible nao hem best ples for kasem advaes abaotem wat hem minim for showim respect. Hem explainim tu why staka pipol no garem respect distaem.

 Wei for no showim respect hem happen evriwea raonem world. Wei for garem respect hem minim man hem garem gudfala wei, hem honest, and evritaem duim wat hem acceptable.

•   Lo wanfala report from survey wea Gallup duim, olketa faendemaot dat olketa American sei lo United States, wei for garem respect hem low winim eni narataem insaed 22 years wea go pas.

•   Lo nara survey wea olketa askem winim 32,000 pipol lo 28 kantri, 65 percent sei wei for no garem respect hem worse winim enitaem bifor.

 Bible storyim finis kaen wei olsem wea iumi lukim distaem.

•   “Lo olketa last day bae hem hard tumas. Pipol bae selfish, greedy, tok praod, and bighed; olketa bae tok spoelem narawan, disobeyim parents, no tinghae, . . . no kaen, [and] raf tumas.”—2 Timothy 3:1-3, Good News Translation.

 For moa information lo hao disfala profesi hem fulfill, readim article “Did the Bible Predict the Way People Think and Act Today?”

 Lo world wea respect hem gogo daon, staka million pipol faendem dat Bible nao hem best ples for kasem advaes abaotem wat hem minim for showim respect. Advaes blo hem saed for fasin, ‘man savve depend lo hem, distaem and for olowe.’ (Psalm 111:8) Diswan hem samfala example:

•   Wat Bible sei: “Samting wea iufala laekem pipol for duim lo iufala, sem samting tu iufala mas duim lo olketa.”—Matthew 7:12.

   Mining: Iumi shud treatim olketa narawan witim kaeness and respect, olsem iumi laekem olketa narawan for treatim iumi tu.

•   Wat Bible sei: “From iufala aotem nao wei for laea, each wan lo iufala mas talem tru samting lo narawan.”—Ephesians 4:25.

   Mining: Iumi shud honest lo evriting wea iumi talem and duim.

 For moa information lo disfala topic, plis readim:

•   Wastaoa wea garem title “Stret or Rong—Hao Nao Bae Iu Savve?”

•   Article “Tolerance—How the Bible Can Help.”