Bo no ta haya e expresion “Regla di Oro” den Bijbel. Hopi biaha nan ta uza e expresion ey pa referi na un principio cu Hesus a siña nos. Den su Sermon Riba Sero, el a bisa: “Tur loke boso kier pa hende haci cu boso, boso tambe mester haci cu nan.” (Mateo 7:12; Lucas 6:31) Un otro manera cu nan ta uza e expresion aki ta, “no haci cu otro loke bo no kier nan haci cu bo.”—Encyclopedia of Philosophy.

•  Kico e Regla di Oro ta encera?

•  Dicon e Regla di Oro ta beneficioso?

•  Acaso e Regla di Oro ta un asunto di duna pa ricibi algo bek?

•  Con mi por aplica e Regla di Oro?

 E Regla di Oro ta anima nos pa trata otro hende manera nos lo kier pa nan trata nos. Mayoria di hende ta gusta pa otro hende trata nan na un manera respetuoso, amabel y amoroso. Pues, ta logico cu nos tambe tin cu trata otro hende di e manera ey.—Lucas 6:31.

 E Regla di Oro ta aplica na casi tur situacion. Por ehempel:

•   E por fortalece matrimonio.—Efesionan 5:28, 33.

•   E por yuda mayornan cria nan yiunan.—Efesionan 6:4.

•   E por yuda bo tin un bon relacion cu amigo, bisiña y colega di trabou.—Proverbionan 3:27, 28; Colosensenan 3:13.

 E Regla di Oro ta basa riba e mesun principio cu nos ta haya den un gran parti di e Testament Bieu. E principio aki di Hesus “ta esencia di e siñansanan di Ley [e prome cinco bukinan di Bijbel] y e Profetanan [e bukinan profetico].” (Mateo 7:12) Cu otro palabra, e Regla di Oro ta siña nos un principio importante di e Testament Bieu: Stima hende.—Romanonan 13:8-10.

 No, e cos principal cu e Regla di Oro ta enfatisa ta pa nos duna. Ora Hesus tabata papia tocante e Regla di Oro, e tabata papia di e manera cu nos mester trata hende. Pero no esey so, e tabata papia tambe di e manera cu nos mester trata nos enemigonan. (Lucas 6:27-31, 35) Pues, e Regla di Oro ta anima nos pa haci bon na tur hende.

1.  1. Sea un bon observador. Presta atencion na hende rond di bo. Por ehempel, tin un hende cu a caba di haci compras ta cargando un saco pisa? Of, bo a haya sa cu un bisiña ta den hospital? Of bo a ripara cu un colega di trabou ta desanima? Ora bo ta “busca ... interes di otro hende”, kisas bo ta haya un oportunidad pa bisa of haci algo bon cu por yuda nan.—Filipensenan 2:4.

2.  2. Sea comprensivo. Pone bo mes den sapato di otro hende. Con lo bo sinti si abo tabata den su situacion? (Romanonan 12:15) Ora bo purba compronde con e ta sinti, esey por conmove bo pa yud’e.

3.  3. Sea flexibel. No lubida cu tur hende ta diferente. Loke abo kier pa otro hende haci pa bo kisas no ta loke nan kier pa abo haci pa nan. Pues, aunke cu tin hopi cos cu bo por haci pa nan, haci loke nan ta haya cu ta mihor.—1 Corintionan 10:24.