Kiko Ta Nifiká Ta un “Bon Samaritano”?
Loke Beibel ta bisa
Hopi bes, ta usa e ekspreshon “bon samaritano” pa deskribí un persona ku ta yuda otro hende ku ta den nesesidat. E ekspreshon ei a bini di un ilustrashon ku Hesus a konta pa mustra ku un bon próhimo ta trata otro hende ku miserikòrdia, sin importá e otro hende su nashonalidat òf kultura.
Den e artíkulo akí, nos lo kontestá e siguiente preguntanan:
Kiko ta e relato di e “bon samaritano”?
Aki ta sigui un resúmen kòrtiku di e relato ku Hesus a konta. Un hòmber hudiu tabata biaha di Herúsalèm pa Yériko. Na kaminda, nan a atak’é, maltrat’é i lag’é kasi morto.
Un saserdote hudiu a pasa banda di e hòmber ku tabata malamente heridá, pero e no a hasi nada. Despues un otro lider religioso hudiu a pasa, pero e tampoko no a para pa yuda e hòmber. Pues, niun di dos no a para pa yuda e hòmber, aunke nan tabatin e mesun nashonalidat ku e biahero.
Finalmente, un hòmber di un otro nashon a pasa. E tabata un samaritano. (Lukas 10:33; 17:16-18) E samaritano a haña duele di e hòmber i el a trata e hòmber su heridanan. Despues, el a hiba e hòmber na un posada i el a kuida e hòmber durante anochi. E siguiente dia, el a paga e doño di e posada pa kuida e hòmber i el a ofresé pa paga kualke gastu adishonal.—Lukas 10:30-35.
Dikon Hesus a konta e ilustrashon akí?
Hesus a konta un hòmber e relato akí, pasobra e hòmber ei a pensa ku hende di su mes rasa i religion so tabata su próhimo. Hesus kier a siña e hòmber un lès importante. E hòmber ei mester a komprondé ku su próhimo no tabata hende hudiu so. (Lukas 10:36, 37) E relato akí ta den Beibel pa benefisiá tur hende ku ke agradá Dios.—2 Timoteo 3:16, 17.
Ki lès nos ta siña for di e ilustrashon akí?
E ilustrashon akí ta siña nos ku un bon próhimo ta un persona ku ta demostrá kompashon ku echo. E ta un persona ku ta hasi algu pa un hende ku ta sufri, sin importá e hende su kultura, rasa òf nashonalidat. Un bon samaritano ta trata otro hende manera e ke pa otro hende trat’é.—Mateo 7:12.
Ken e samaritanonan tabata?
E samaritanonan tabata biba den un teritorio den parti nort na Hudea. Entre nan, tabatin desendiente di hende hudiu ku a kasa ku hende ku no tabata hudiu.
Ya pa e promé siglo, e samaritanonan a forma nan mes religion. Nan a aseptá e promé sinku bukinan di e Skritura Hebreo, pero en general, nan a rechasá e otro bukinan.
Den tempu di Hesus, hopi hudiu tabata despresiá e samaritanonan i nan no tabatin kontakto ku nan. (Huan 4:9) Algun hudiu tabata usa e palabra “samaritano” pa insultá hende.—Huan 8:48.
E relato di e “bon samaritano” a sosodé di bèrdat?
Beibel no ta bisa si e ilustrashon di e “bon samaritano” tabata basá riba un relato real. Sinembargo, hopi biaha Hesus tabata usa kustumber i lugá bon konosí pa asina e hendenan ku tabata skuch’é por a komprondé e lès mihó.
E relato tin hopi detaye ku ta histórikamente eksakto. Por ehèmpel:
E kaminda di Herúsalèm pa Yériko tabata 20 kilometer largu, i e tabatin un bahada steil di un kilometer. E echo ei ta kuadra ku loke e relato ta bisa, esta, ku e biaheronan ku a bai Yériko “tabata baha di Herúsalèm.”—Lukas 10:30.
E saserdotenan i e levitanan ku tabata biba na Yériko regularmente tabata biaha pa Herúsalèm riba e kaminda akí.
Hopi biaha, e ladronnan tabata skonde kantu di kaminda isolá pa ataká e biaheronan inosente ku tabata biaha nan so.
Otro Artíkulo Interesante
PREGUNTA KU BEIBEL TA KONTESTÁ
Kico e Regla di Oro Ta?
Ora Hesus a papia tocante e Regla di Oro, e tabata referi na e manera cu nos mester trata hende. Pero no esey so, sino tambe di e manera cu nos mester trata nos enemigonan.
TOKANTE NOS
Reunion di Kongregashon di Testigunan di Yehova
Haña sa unda i kon nos ta adorá Dios. Tur hende ta bon biní i no ta pasa kolèkt.