Kisas bo ta puntra bo mes: ‘Si Dios sa tur kos, asta mi pensamentu- i nesesidatnan, dikon mi mester hasi orashon?’ Esei ta un bon pregunta, pasobra Hesus mes a bisa ku Dios “sa kiko boso tin mester asta promé ku boso pidié.” (Mateo 6:8) Rei David di Israel di antigwedat tabata sa esaki. El a skirbi: “Promé ku tin un palabra riba mi lenga, ya bo konosé esaki kaba, o SEÑOR.” (Salmo 139:4) Ta dikon anto nos mester hasi orashon na Dios? Pa kontestá e pregunta ei, laga nos wak kiko Beibel ta bisa tokante orashon. *

Maske Beibel ta bisa ku Yehova * sa tur kos, e ta mustra tambe ku Yehova no ta interesá simplemente den kompilá informashon tokante su sirbidónan. (Salmo 139:6; Romanonan 11:33) Su memoria ku tin un kapasidat sin límite no ta manera un kòmpiuter ku ta djis warda datonan personal. Al kontrali, Dios ta sumamente interesá den nos pensamentunan di mas profundo pasobra e ke pa nos hala serka dje. (Salmo 139:23, 24; Santiago 4:8) Pa e motibu ei, Hesus ta animá nos pa hasi orashon, aunke su Tata sa bon bon kiko nos tin mester. (Mateo 6:6-8) Mas nos papia tokante nos sintimentu- i pensamentunan ku nos Kreador, mas nos ta hala serka dje.

Tin biaha, nos no sa eksaktamente kiko pa pidi den orashon. Den e kasonan ei, Dios sí sa loke nos ta sinti i por usa su konosementu perfekto di nos situashon pa duna nos loke nos tin mester. (Romanonan 8:26, 27; Efesionan 3:20) Ora nos ripará kon Dios a yuda nos, asta si esei tin biaha no ta asina bisto na promé instante, nos ta sinti nos mas atraí na dje.

Beibel ta sigurá nos ku e Dios Todopoderoso ta kontestá orashon di su fiel sirbidónan, pero e ta bisa tambe dikon Dios no ta skucha sierto orashon. Por ehèmpel, tempu ku violensia a oumentá drástikamente den Israel di antigwedat, Dios a manda profeta Isaías bisa e hendenan: “Maske boso hasi hopi orashon, lo mi no skucha. Boso mannan ta yen di sanger.” (Isaías 1:15) Pues, esnan ku deliberadamente ta kibra Dios su lei òf ta hasi orashon ku un motibu robes no por spera ku Dios ta skucha nan orashonnan.—Proverbionan 28:9; Santiago 4:3.

En kambio, Beibel ta bisa: “Kiko ku nos pidié ku ta di akuerdo ku su boluntat, e ta tende nos.” (1 Huan 5:14) Pero esei ke men ku Dios outomátikamente ta duna nos tur loke nos pidié? No nesesariamente. Por ehèmpel, wak kiko a pasa den kaso di apòstel Pablo kende a roga Dios tres biaha pa kita “un sumpiña den karni” ku tabata pon’é sufri. (2 Korintionan 12:7, 8) Kisas e tabatin un malesa króniko di wowo. E kos ei mester tabata hopi fastioso p’e. Aunke Pablo a haña poder pa hasi milager i asta a resusitá un hende, tòg e mester a soportá su propio malesa. (Echonan 19:11, 12; 20:9, 10) Pues, Pablo no a haña e kontesta ku el a deseá, pero tòg el a keda kontentu ku Dios a dun’é forsa pa soportá e situashon.—2 Korintionan 12:9, 10.

Ta bèrdat ku Dios a kontestá orashon di algun personahe bíbliko dor di hasi un milager pa nan. (2 Reinan 20:1-7) Pero no ta den tur kaso esei tabata sosodé. Tin algun sirbidó di Dios ku a bira preokupá ora a parse ku Dios no a kontestá nan orashonnan. Rei David a puntra: “Kuantu tempu mas, o SEÑOR? Lo bo lubidá mi pa semper?” (Salmo 13:1) Pero ora e hòmber fiel ei a kòrda kuantu biaha Yehova a yud’é, el a bolbe ekspresá konfiansa den Dios. Den e mesun orashon, David a sigui bisa: “Ma mi a konfia den bo miserikòrdia.” (Salmo 13:5) Meskos ku David, Dios su sirbidónan di awendia kisas mester perseverá den orashon pa nan por mira kon Dios ta kontestá nan orashonnan.—Romanonan 12:12.

Dios ta duna nos loke nos realmente tin mester.

Ku bon motibu, mayornan amoroso no ta duna nan yunan semper loke nan ta pidi na e momento ku nan pidié. Dios tampoko no ta kontestá nos orashonnan tur ora na e manera ni na e momento ku nos ta ferwagt. Pero nos por tin konfiansa ku nos Kreador, meskos ku un tata amoroso, lo duna nos loke realmente nos tin mester na e mihó manera i na e debido tempu.—Lukas 11:11-13.

Dios por kontestá nos na un manera ku no ta asina bisto na promé instante.

Suponé ku nos ta hasi orashon pa haña alivio di un problema persistente? Si Yehova no kontestá nos orashon mesora, esei ta nifiká ku lo e no kontestá nos? Klaru ku nò! Lo ta bon pa nos wak si Dios a kontestá nos na un manera ku kisas no ta asina bisto. Podisé un bon amigu a hasi tur loke e tabata por pa yuda nos nèt na ora. (Proverbionan 17:17) Ta posibel ku Yehova a konmové e amigu ei pa yuda nos? Ademas, Dios por kontestá nos súplikanan pa yudansa mediante su Palabra. Tal bes su Palabra por duna nos e sabiduria ku nos tin mester pa trata ku un situashon difísil.—2 Timoteo 3:16, 17.

En bes di solushoná tur e problemanan di su sirbidónan, Dios hopi biaha ta duna nan e forsa pa trata ku esakinan. (2 Korintionan 4:7) Por ehèmpel, ora Hesus a roga su Tata pa kita su sufrimentu komo ku e tabatin miedu ku esaki lo a trese reproche riba Dios su nòmber, Yehova a manda un angel pa fortalesé su Yu. (Lukas 22:42, 43) Asina tambe, Dios por usa un bon amigu pa duna nos un palabra di animashon nèt ora nos tin mester di esei. (Proverbionan 12:25) Komo ku Dios sa kontestá nos orashonnan di un manera ku no ta asina bisto na promé instante, nos mester ta mas alerta pa mira kon e ta kontestá nos.

Dios ta kontestá algun orashon na e debido tempu.

Beibel ta bisa ku e Dios Todopoderoso lo yuda hende humilde “na e debido tempu.” (1 Pedro 5:6) Pues, si ta parse ku Yehova ta tarda pa kontestá nos orashonnan, esei no ta nifiká ku e no ta interesá den nos. Mas bien, komo ku nos Kreador amoroso sa kiko ta mihó pa nos, e ta tene kuenta ku esei ora e ta kontestá nos.

Por ehèmpel: Imaginá ku bo tin un yu hòmber chikí ku ta pidi bo un baiskel. Lo bo dun’é mesora? Si bo ta pensa ku e no ta sufisiente responsabel pa kore un baiskel, kisas lo bo disidí di no kumpr’é ainda. Podisé bo ta preferá di warda te ora bo mira ku lo e us’é na un manera responsabel. Asina tambe, si Dios ta haña ku e “deseonan di [nos] kurason” ta bon i nos perseverá den orashon, e lo duna nos loke nos ta pidi na e debido tempu.—Salmo 37:4.

Beibel ta animá kristiannan berdadero pa no pèrdè konfiansa den e poder di orashon. Tin hende por bisa: ‘Ya, ta fásil pa papia, ta hasi te kos.’ Esei ta bèrdat, kisas ta difísil pa warda riba Dios su kontesta si pa basta tempu kaba nos ta pasando den un problema òf ta sufriendo pa motibu di un inhustisia. Den kasonan asina, lo ta bon pa nos kòrda loke Hesus a siña nos, esta, pa hasi orashon sin entregá.

 Hesus a duna un ehèmpel di un biuda den nesesidat ku kada biaha tabata bai serka un hues inhustu pa e haña yudansa. (Lukas 18:1-3) Maske e hues a nenga di yud’é na promé instante, finalmente el a bisa den su mes: “Lo mi sòru pa e haña hustisia, ya e no ta keda bin kansa mi te ora mi no por mas.” (Lukas 18:4, 5) Segun e teksto den e idioma original, e hues a hasi kaso di e biuda pa e biuda no “dal [e] bou di su wowo,” òf figurativamente, “daña [su] reputashon.” * Si un hues inhustu mes ta yuda un biuda pober pasobra e no ke haña un mal reputashon, kuantu mas nos Dios amoroso lo perkurá pa hustisia prevalesé den kaso di esnan “ku di dia i anochi ta sklama na dje.” Ta manera Hesus a bisa: “[Dios lo] sòru pa nan haña hustisia rápidamente.”—Lukas 18:6-8.

Maske tin biaha nos por kansa di pidi yudansa, nos no mester entregá. Ora nos perseverá den orashon, nos ta demostrá ku nos realmente ta deseá pa Dios guia nos bida. Ademas, nos ta siña ku nos mester ta mas alerta pa mira kon Dios ta kontestá nos, i komo resultado nos ta hala mas serka dje. Pues, nos por tin e konfiansa ku Yehova lo kontestá nos orashonnan ku ta na armonia ku su boluntat si nos sigui pidié sin duda ku lo e skucha nos.—Lukas 11:9.