Tempu mi a nase, mi mayornan tabatin un boerderij chikitu den un pueblito na Galicia, den e parti nortwèst di Spaña. Nos ta ocho ruman i ami ta esun di kuater. Nos tabatin un bida di famia felis. Den e tempu ei na Spaña, tabata normal ku por lo ménos un yu di kada famia ta drenta seminario òf konbento. Den nos famia, tres di nos a hasi esei.

Na edat di 13 aña, mi a djòin mi ruman muhé grandi na un konbento na Madrid. Einan e ambiente no tabata dushi. Amistat no tabata eksistí—solamente regla, orashon i ousteridat. Mainta trempan nos tabata bai den kapèl pa meditá, aunke hopi biaha ami no por a konsentrá bon. Despues, nos tabata kanta kantika religioso i partisipá den e sakrifisio di misa. Komo ku tur kos tabata na latin, mi no tabata komprondé kasi nada, i mi a sinti ku Dios tabata leu for di mi. Den e konbento kasi nos no tabatin mag di papia. Asta ora ami ku mi ruman tabata topa otro, e úniko kos ku nos por a bisa otro ta: “Ave María purísima.” E sùrnan tabata laga nos papia ku otro pa mei ora so despues di kome. Ki un gran diferensia for di e bida di famia felis ku mi tabatin na kas! Hopi biaha mi tabata sinti mi mi so i mi tabata yora hopi.

Aunke nunka mi a sinti ku mi tabatin un bon relashon ku Dios, tòg ku 17 aña mi a kumpli ku mi promesa di bira sùr. Eigenlijk, mi tabata djis hasi loke nan a spera di mi, pero no a dura muchu ku mi a kuminsá duda si realmente Dios a skohe ami pa hasi esaki. E sùrnan tabata bisa ku esnan ku tin e duda ei lo bai fièrnu. Tòg mi a keda ku mi duda. Mi sa ku Hesukristu no a isolá su mes, mas bien e tabata okupá ku e trabou di siña hende i yuda nan. (Mateo 4:23-25) Na edat di 20 aña, mi no a mira pakiko mi mester a sigui sirbi komo sùr. Pa mi sorpresa, e madre superiora a bisa mi ku si mi no ta sigur ku mi ke sigui sirbi komo sùr, lo ta mihó pa mi sali mas pronto posibel. P’esei, mi a disidí di sali for di e konbento. Mi ta pensa ku el a laga mi bai, pasobra e tabatin miedu ku lo mi influensiá e otronan.

 Ora mi a yega kas, mi mayornan a mustra hopi konsiderashon na mi. Pero komo ku no tabatin trabou den nos pueblo, mi a bai biba na Alemania kaminda un di mi ruman hòmbernan tabata biba. E tabata pertenesé na un grupo komunista di imigrante di Spaña. Komo ku nan tabata bringa pa derecho di trahadó i emansipashon di hende muhé, mi tabata sinti mi kómodo den nan kompania. P’esei mi a bira komunista, i despues mi a kasa ku un miembro di e grupo akí. Mi a sinti mi útil, pasobra mi tabata parti pamfleta komunista i partisipá den marchanan di protesta.

Sinembargo, ku tempu mi a bolbe sinti mi desepshoná pasobra e komunistanan ei hopi biaha no a praktiká loke nan a prediká. I na aña 1971, e dudanan ei a bira mas fuerte ora algun miembro hóben di nos grupo a kima e edifisio di embahada di Spaña na Frankfurt. Nan a hasi esaki pa protestá kontra e inhustisia ku tabata tuma lugá bou di e gobièrnu diktatorial na Spaña. Pero ami a haña ku no ta korekto pa ekspresá rabia di e forma ei.

Ora ku nos promé yu a nase, mi a bisa mi esposo ku mi ta bai stòp di asistí na e reunionnan komunista. Mi tabata sinti mi mi so pasobra ningun di mi amigunan di e grupo komunista ei a bishitá ami ku mi bebi. P’esei, mi a kuminsá puntra mi mes si bida tin propósito. A kaso ta bale la pena hasi esfuerso pa drecha mundu?

Na aña 1976, un pareha kasá ku ta Testigu di Yehova a bini na nos kas i mi a aseptá algun literatura basá riba Beibel ku nan a ofresé mi. Na e di dos bishita, mi a kuminsá bombardiá nan ku hopi pregunta tokante sufrimentu, prehuisio i inhustisia. Mi a keda sorprendí ku nan a usa Beibel pa kontestá tur mi preguntanan. Mesora mi a aseptá un estudio di Beibel.

Na prinsipio mi tabata studia djis pasobra mi tabata siña kosnan nobo. Pero, mi punto di bista a kambia ora ami ku mi esposo a kuminsá asistí na e reunionnan di Testigunan di Yehova na Salòn di Reino. Na e tempu ei, nos tabatin dos yu hòmber. Mi a apresiá mashá ku e Testigunan tabata pasa buska nos i tabata yuda nos wak e yunan durante reunion. Mi a kuminsá stima e Testigunan.

Pero asina mes, ainda mi tabatin algun duda. Mi a disidí di bishitá mi famia na Spaña. Mi tio, ku ta un pastor, a purba konvensé mi pa stòp di studia Beibel. Pero e Testigunan a usa Beibel pa kontestá mi preguntanan, meskos ku esnan na Alemania a hasi. P’esei mi a disidí ku lo mi sigui ku mi estudio di Beibel ora mi regresá Alemania. Aunke mi esposo a stòp di studia Beibel, ami sí a sigui. Na aña 1978, mi a batisá komo un Testigu di Yehova.

E konosementu eksakto di Beibel ku mi a haña a duna mi berdadero propósito den bida. Por ehèmpel, 1 Pedro 3:1-4 ta animá esposanan pa ta “sumiso” na nan esposo ku “rèspèt profundo” i pa kultivá un “spiritu suave . . . , loke ta di gran balor den bista di Dios.” E prinsipionan ei a yuda mi bira un bon esposa i mama.

Ya mi tin 35 aña komo Testigu. Mi ta sinti mi felis ku mi ta sirbi Yehova komo parti di un berdadero hermandat mundial i ku kuater di mi sinku yunan tambe ta hasi esei.