Kico Ta Nifica “Honra Bo Tata y Bo Mama”?
Loke Bijbel ta bisa
E mandamento pa “honra bo tata y bo mama” ta aparece diferente biaha den Bijbel. (Exodo 20:12; Deuteronomio 5:16; Mateo 15:4; Efesionan 6:2, 3) Esaki ta encera cu nos tin cu cumpli cu cuater punto importante.
Aprecia nan. Bo ta honra bo tata y bo mama ora bo ta agradecido pa tur loke nan a haci pa bo. Bo por mustra cu bo ta aprecia nan ora bo ta tene cuenta cu nan consehonan. (Proverbionan 7:1, 2; 23:26) Bijbel ta anima bo pa mira bo mayornan como bo “gloria”, esta, cu bo ta sinti bo orguyoso di nan.—Proverbionan 17:6.
Acepta nan autoridad. Bo ta honra bo tata y bo mama ora bo ta reconoce e autoridad cu Dios a duna nan, vooral ora bo ta jong. Colosensenan 3:20 ta bisa yiunan: “Obedece boso mayornan den tur cos, pasobra esaki ta agradabel den bista di Señor.” Hesus mes a obedece su mayornan di buena gana ora e tabata hoben.—Lucas 2:51.
Trata nan cu respet. (Levitico 19:3; Hebreonan 12:9) Hopi biaha esaki ta encera loke bo ta bisa y con bo ta bis’e. Ta berdad cu, tin biaha, mayornan por haci cos cu ta pone cu ta bira dificil pa respeta nan. Pero, hasta e ora ey, yiunan por honra nan mayornan ora nan evita di papia of haci cos cu ta mustra falta di respet. (Proverbionan 30:17) Bijbel ta siña cu papia malo di bo mama of tata ta un pica serio.—Mateo 15:4.
Cuida nan. Ora bo mayornan bira hende grandi, nan tin mester di yudansa practico. Bo por honra nan ora bo haci tur bo esfuerso pa ta sigur cu nan tin loke nan mester. (1 Timoteo 5:4, 8) Por ehempel, un poco prome cu Hesus a muri, el a haci areglo pa cuido di su mama.—Juan 19:25-27.
Ideanan robes encuanto honra bo tata y bo mama
Idea robes: Honra bo tata y bo mama ta nifica cu bo mester laga nan dirigi bo matrimonio.
E berdad: Bijbel ta siña cu relacion matrimonial ta bay prome cu otro relacionnan di famia. Genesis 2:24 ta bisa: “Un homber lo bandona su tata y su mama y lo uni cu su esposa.” (Mateo 19:4, 5) Claro cu parehanan casa por beneficia di conseho di nan mayornan of suegronan. (Proverbionan 23:22) Pero ta na su luga pa parehanan casa pone limite te con leu famia por tin algo di bisa den nan matrimonio.—Mateo19:6.
Idea robes: Bo tata y bo mama tin autoridad final.
E berdad: Aunke cu Dios a duna mayornan e autoridad den famia, tur autoridad humano tin limite. Nunca e ta pasa e autoridad di Dios. Por ehempel, ora un corte supremo a ordena Hesus su discipelnan pa desobedece Dios, nan a contesta: “Nos tin cu obedece Dios na prome luga, y no hende.” (Echonan 5:27-29) Mescos tambe, yiunan ta obedece nan mayornan “den union cu Señor”, esta, den tur cos cu no ta bay contra e reglanan di Dios.—Efesionan 6:1
Idea robes: Honra bo tata y bo mama ta nifica cu bo mester sigui nan creencia religioso.
E berdad: Bijbel ta anima pa analisa e cosnan cu nan ta siña bo y wak si esey ta e berdad. (Echonan 17:11; 1 Juan 4:1) Un hende cu ta haci esey por scoge finalmente un creencia diferente for di su mayornan. Bijbel ta menciona un cantidad di fiel sirbidornan di Dios cu no a sigui e religion di nan mayornan, manera Abraham, Ruth y apostel Pablo.—Josue 24:2, 14, 15; Ruth 1:15, 16; Galationan 1:14-16, 22-24.
Idea robes: Pa honra bo tata y bo mama, bo tin cu participa den rito y adoracion di antepasado.
E berdad: Bijbel ta bisa: “Ta Jehova bo Dios bo tin cu adora, y ta na e so bo tin cu rindi sirbishi sagrado.” (Lucas 4:8) Un hende cu ta adora su antepasadonan, ta desagrada Dios. Ademas, Bijbel ta siña cu “e mortonan no sa nada.” Nan no ta consciente di ningun homenahe cu hende ta haci na nan; tampoco nan no por yuda ni haci daño na e bibonan.—Eclesiastes 9:5, 10; Isaias 8:19.
You May Also Like
PREGUNTA CU BIJBEL TA CONTESTA
Kico Bijbel Ta Bisa Tocante Cuida Mayornan di Edad Avansa?
Bijbel ta menciona algun ehempel di homber y muher fiel cu a haci esey. Y Bijbel ta duna conseho practico cu por yuda esnan cu ta duna e cuido.
