REBECA tabata wak e paisahe yen di sero, piedra y baranca mientras cu solo tabata baha. Despues di a biaha pa simannan largo, porfin el a custumbra cu e manera cu e camel tabata move bay bin mientras e tabata sinta halto ariba su lomba. Haran, e stad caminda el a crece como mucha, tabata leu aya, cientos di kilometer den direccion noordoost. Anto kisas nunca mas lo el a mira su famia atrobe. Casi sigur e tabatin yen di pregunta na mente tocante su futuro, specialmente awor cu e tabata yegando su destinacion.

E caravana a pasa door di gran parti di Canaan caba, y awor nan tabata crusa Negev, un region hopi seco. (Genesis 24:62) Kisas Rebeca a mira carne. E region ey kisas lo tabata mucho seco pa agricultura, pero tabatin suficiente tereno pa bestia come ariba. Pero e homber di edad cu tabata gui’e tabata conoce e region ey bon. E tabata ansioso pa conta su doño e bon noticia cu e tabatin: Rebeca lo a bira esposa di Isaak. Sinembargo, Rebeca lo mester a pensa: Nunca nos no a yega di mira otro. Con mi comprometido, Isaak, lo ta? Lo e ta contento ora e mira mi? Con lo mi sinti mi ora mi mir’e? Y con mi bida lo ta den e pais aki?

Awe, den hopi parti di mundo, e custumber cu mayornan ta scoge un casa pa nan yiu por parce algo straño, pero na hopi pais esey ta normal. Sea cual sea e custumbernan di bo pais, kisas bo ta di acuerdo cu Rebeca no tabata sa kico ta sper’e. Sin duda, e tabata un mucha muher cu hopi curashi y cu gran fe, y nos mester di e dos cualidadnan aki ora nos ta pasa den cambionan den nos bida. Pero Rebeca tabatin mas cualidad remarcabel y bunita.

E cambio grandi den Rebeca su bida a sosode inespera, riba un dia manera cualkier otro dia. Rebeca a lanta den of cerca di Haran, un stad di Mesopotamia. Su mayornan tabata diferente for di mayoria di hende na Haran. Nan no tabata adora Sin, e dios di luna; nan Dios tabata Jehova.—Genesis 24:50.

Rebeca tabata un mucha muher hopi bunita. E no tabata bunita so, e tabata yen di bida y a mantene su mes moralmente limpi. Rebeca su famia tabatin suficiente placa cu nan por tabatin sirbiente, pero nan no a malcri’e ni trat’e manera un prinses. Al contrario, nan a siñ’e traha duro. Mescos cu hopi hende muher den su tempo, e tabatin algun tarea pisa pa haci. Por ehempel, atardi e tabata pone un purun riba su schouder y tabata bay na e pos pa coy awa pa su famia.—Genesis 24:11, 15, 16.

Na un di e ocasionnan ey, ora el a caba di yena su purun, un homber di edad a core bin cerca dje y a bis’e: “Pa fabor, laga mi bebe un tiki awa for di bo purun.” Aunke esaki ta un fabor chikito, e homber a pidie na un manera hopi amabel. Rebeca por a mira cu el a bin di un biahe largo. Pues, Rebeca a core baha su purun for di su schouder y a laga e homber bebe, no solamente un slok di awa sino basta awa. Rebeca a ripara tambe cu e tabatin un caravana di dies camel y cu nan baki pa bebe awa tabata bashi. Rebeca por a mira cu e homber tabata wak e cu atencion, pues e kier tabata generoso cu e homber. Pesey el a bis’e: “Lo mi saca awa pa bo camelnan tambe te ora cu nan a caba di bebe.”—Genesis 24:17-19.

 Tuma nota cu Rebeca no a djis ofrece pa duna e dies camelnan awa, sino tambe pa duna nan awa te ora nan tabata satisfecho. Si un camel tin hopi sed, e por bebe mas cu 95 liter di awa. Si tur dies camel tabatin tanto sed asina, Rebeca lo mester a traha duro pa oranan largo. Manera a resulta despues, e camelnan lo no tabatin dje tanto sed ey. * Acaso Rebeca tabata sa esey ora el a ofrece pa coy awa pa nan? No. E tabata dispuesto, hasta ansioso, pa traha mas duro cu e tabata por pa mustra hospitalidad na e homber di edad aki cu e no tabata conoce. Ta claro cu e homber a acepta e oferta aki. Despues, cu atencion el a sinta wak con bes tras bes Rebeca tabata bay bin pa saca awa cu su purun y yena den e baki di awa.—Genesis 24:20, 21.

Rebeca a laga un excelente ehempel pa nos awe. Nos ta biba den un tempo caminda egoismo ta reina tur caminda. Manera Bijbel a profetisa, hende lo “stima nan mes”, y lo no ta dispuesto pa haci extra esfuerso pa yuda otro hende. (2 Timoteo 3:1-5) Cristiannan cu kier lucha contra e tendencia ey ta haci bon di medita riba e ehempel biblico di e mucha muher di antiguedad aki cu a haci hopi esfuerso pa yuda un homber di edad.

Sin duda, Rebeca lo mester a ripara cu e homber tabata observ’e. E homber no tabata wak e na un manera inapropia, sino simplemente cu admiracion, asombro y goso. Ora Rebeca porfin a caba, e homber a dun’e algun joyas precioso como regalo. Anto el a puntra Rebeca: “Yiu di ken bo ta? Pa fabor, bisa mi, tin luga pa nos hospeda den cas di bo tata?” Ora Rebeca a cont’e ken su famia tabata, e homber a bira mas contento ainda. Kisas yen di entusiasmo, Rebeca a agrega: “Nos tin tanto yerba seco como cuminda pa bestia na abundancia, y luga pa hospeda.” Esaki tabata un gran muestra di hospitalidad ya cu tabatin mas hende cu tabata compaña e homber di edad aki. Despues, Rebeca a core bay conta su mama loke a sosode.—Genesis 24:22-28, 32.

Ta bisto cu e mayornan di Rebeca a siñ’e pa ta hospitalario. Hospitalidad ta un otro cualidad cu a bay for di moda awe. Y esey ta un otro motibo pakico nos tin cu imita e fe di e muher bondadoso aki. Pues, fe den Dios mester motiva nos pa mustra hospitalidad. Jehova ta un Dios hospitalario  pasobra e ta generoso cu tur hende, y e kier pa su sirbidornan imit’e. Ora nos mustra hospitalidad hasta na esnan cu no por debolbe nos e gesto, nos ta haci nos Tata den cielo hopi contento.—Mateo 5:44-46; 1 Pedro 4:9.

Ken e homber di edad na e pos tabata? E tabata un sirbiente di Abraham, ruman homber di welo di Rebeca. Pues, e tabata bonbini cerca Betuel, tata di Rebeca. E sirbiente aki casi sigur tabata yama Eliezer. * E anfitrion a ofrece Eliezer algo di come, pero el a nenga di come te ora e bisa e motibo di su bishita. (Genesis 24:31-33) Nos por imagina con e tabata papia yen di entusiasmo. El a caba di mira prueba palpabel cu su Dios, Jehova, tabata bendiciona su mision importante. Con asina?

Imagina con Eliezer tabata conta e motibo di su bishita, mientras e tata di Rebeca, Betuel, y e ruman homber di Rebeca, Laban, tabata scucha cu hopi atencion. Eliezer a conta nan con Jehova a bendiciona Abraham na Canaan y cu Abraham y Sara a haya un yiu homber, Isaak, cu lo a hereda tur cos. Abraham a duna su sirbiente un tarea hopi importante: E mester a bay busca un esposa pa Isaak entre e famianan di Abraham na Haran.—Genesis 24:34-38.

Abraham a pone Eliezer hura cu lo e no a tuma un esposa pa Isaak for di e muhernan di Canaan. Dicon? Pasobra e Cananeonan no tabata sirbi ni respeta Jehova Dios. Abraham tabata sa cu na Jehova su debido tempo lo el a castiga e hendenan ey pa nan maldad. Abraham no tabata kier pa su yiu stima, Isaak, tin nada di haber cu e hendenan inmoral ey. E tabata sa tambe cu su yiu lo a hunga un papel importante den cumpli cu e promesanan di Dios.—Genesis 15:16; 17:19; 24:2-4.

Eliezer a bisa su anfitrionnan cu ora el a yega na e pos na Haran, el a haci oracion y pidi pa Jehova scoge un mucha muher pa Isaak casa cu ne. Kico el a pidi? Eliezer a pidi Dios pa laga e mucha muher cu Dios kier pa Isaak casa cu ne bin na e pos. Ora Eliezer pidi e mucha muher pa dun’e poco awa pa bebe, e mucha muher lo mester ofrece pa duna tanto Eliezer como e camelnan awa. (Genesis 24:12-14) Y ken a cana bin y haci precies esey? Rebeca! Imagina bo con Rebeca lo a sintie si el a tende loke Eliezer a conta su famia.

Betuel y Laban a keda hopi conmovi cu e relato di Eliezer, y nan a bisa: “E asunto aki ta bin di SEÑOR.” Manera tabata e custumber den e tempo ey, nan a aproba pa Rebeca casa cu Isaak. (Genesis 24:50-54) Pero esey kiermen cu Rebeca no tabatin nada di bisa den e asunto aki?

Wel, algun siman prome, Eliezer a papia precies tocante esaki cu Abraham. El a bisa Abraham cu kisas e mucha muher lo no tabata dispuesto pa bay cu ne. Abraham a contest’e: “Lo bo no ta mará mas na loke bo a hura.” (Genesis 24:39, 41, BPK) Den e cas di Betuel tambe nan tabata tene cuenta cu e deseo di e mucha muher. Eliezer tabata asina contento cu el a logra cumpli cu su mision cu e siguiente mainta el a pidi si e por a bay bek Canaan cu Rebeca mesora. Pero e famia tabata kier pa Rebeca keda cu nan pa maske ta dies dia mas. Pa resolve e asunto, nan a “[yam’e] y a puntr’e personalmente.”—Genesis 24:57.

Aki tabata un momento crucial den e bida di Rebeca; e mester a tuma un decision sumamente importante. Kico lo el a bisa? Lo el a roga su tata y ruman homber pa no mand’e na un pais desconoci? Of lo el a mir’e como un privilegio pa forma parti di sucesonan cu Jehova tabata dirigi claramente? Su contesta a revela kico e tabata sinti tocante e cambio inespera, kisas dificil, aki den su bida. El a djis bisa: “Mi kier bay.”—Genesis 24:58.

Esta un actitud remarcabel! Awe, nos custumbernan relaciona cu matrimonio por ta hopi diferente, pero toch nos por siña hopi di Rebeca. E tabata mas interesa den haci e boluntad di su Dios, Jehova, cu haci loke e mes tabata kier. Ora ta trata di matrimonio, ainda e Palabra di Dios ta duna e mihor guia. Por ehempel, e ta yuda nos scoge un bon casa y bira un bon esposo of esposa. (2 Corintionan 6:14, 15; Efesionan 5:28-33) Ta sabi di nos  parti pa sigui e ehempel di Rebeca y haci cosnan manera Dios kier.

E famia di Betuel a bendiciona nan kerida Rebeca. E ora ey e cu Debora, un muher cu a cuid’e desde mucha, y algun sirbiente muher a bay cu Eliezer y e hendenan cu tabata compañ’e. (Genesis 24:59-61; 35:8) No a dura mucho cu Haran a keda leu nan tras. E biahe tabata largo, mas o menos 800 kilometer y kisas a dura tres siman. Cu tur probabilidad, e biahe ey lo no tabata mucho comodo. Rebeca a yega di mira hopi camel den su bida, pero nos no por asumi cu e tabatin experencia den biaha riba camel. Bijbel ta describi su famia como un famia di wardador di carne y no como comerciantenan cu tabata biaha cu caravana di camel. (Genesis 29:10) Hopi hende cu a subi riba un camel pa prome biaha a bisa cu e ta algo incomodo, hasta pa un buelta cortico.

En todo caso, Rebeca a enfoca riba futuro, y sin duda el a purba di haya sa mas tanto cos posibel di Isaak y su famia for di Eliezer. Purba di imagina con anochi e homber di edad tabata sinta canto di un candela y cont’e tocante e promesa cu Jehova a haci Su amigo Abraham. Dios a priminti cu for di Abraham su famia lo a bin un liña di descendencia cu lo a trece bendicion pa henter humanidad. Imagina bo con impresiona Rebeca lo a keda ora el a realisa cu e promesa di Jehova lo a cumpli pa medio di su futuro esposo, Isaak, y pues, pa medio di dje mes tambe.—Genesis 22:15-18.

Porfin e dia cu nos a describi na comienso di e articulo aki a yega. Mientras cu solo tabata baha y e caravana tabata yega Negev, Rebeca a mira un homber ta cana den cunucu y a parce cu e homber tabata medita. Rebeca a baha di biaha for di e camel, kisas sin warda pa e bestia hinca rudia pa e baha. El a puntra Eliezer: “Ta ken e homber ey cu ta cana den cunucu pa bin topa cu nos?” Ora el a tende cu tabata Isaak, el a tapa su cabes cu su velo. (Genesis 24:62-65) Dicon? Parce cu esey tabata un muestra di respet pa su futuro esposo. Pa algun hende awendia, e sumision ey por parce anticua. Pero tanto hende muher como hende homber por siña di e humildad di Rebeca. Ken lo no kier mehora den e bunita cualidad aki?

Isaak, un homber di mas o menos 40 aña, ainda tabata tristo pa motibo di morto di su mama, Sara, kende a muri un tres aña mas prome. Nos por deduci for di esey anto cu Isaak tabata un homber tierno y cariñoso. Esta un bendicion pa un homber asina haya un casa humilde, hospitalario y cu ta traha duro. Nan a bay bon cu otro? Wel, Bijbel ta pon’e na un manera simpel: “[Isaak] a stim’e.”—Genesis 24:67; 26:8.

Aunke nos ta biba casi cuater mil aña despues, no ta dificil pa admira e cualidadnan di Rebeca. Nos no por keda sin admira su curashi, gana di traha, hospitalidad y humildad. Nos tur, chikito y grandi, homber y muher, casa y soltero, ta haci bon di imita su fe.