Mi a nace na Mulhouse, noordoost di Francia, den un bario di poco recurso cu ta conoci pa su violencia. E recuerdonan cu mi tin di mi infancia ta di discusionnan violento entre famianan den e area. Den nos famia, hende homber tabata menosprecia hende muher y no tabata tene cuenta cu nan. Pa nan, hende muher mester ta den cushina y nan deber ta pa cuida nan casa y nan yiunan.

Mi infancia no tabata facil. Tempo mi tabatin dies aña, mi tata a fayece debi na alcoholismo. Cinco aña despues, un di mi ruman hombernan mas grandi a comete suicidio. Den e mesun aña ey, mi a presencia un asesinato durante un discusion den mi famia, y esey a laga mi traumatisa. Algun famia di mi a siña mi con pa uza cuchiu y revolver y con pa bringa ora mester. Mi a bira un mucha homber problematico, a pone tattoo riba henter mi curpa y a cuminsa bebe di mas.

Tempo mi tabatin 16 aña, mi tabata bebe 10 pa 15 boter di cerbes pa dia, y no a dura mucho cu mi a cuminsa uza droga. Pa mi por a cumpra esakinan, mi tabata bende resto di metal y horta cos. Cu 17 aña di edad, ya mi a bay cera. En total, nan a sentencia mi 18 biaha na castigo di prizon pa ladronicia y violencia.

Ora mi tabatin rond di 20 aña, cos a bira pio. Mi tabata huma te cu 20 sigaria di marihuana pa dia y tabata uza heroina y otro droga. Varios biaha mi a hera muri di un overdosis. Mi a cuminsa deal den droga, y pesey semper mi tabata cana arma. Un biaha, mi a purba di tira un homber, pero ta bon mes cu e bala a dal den su hespo di faha y bounce bek. Tempo mi tabatin 24 aña, mi mama a fayece, y mi a bira hasta mas agresivo. Hende cu tabata cana na pia tabata core crusa caya ora nan wak mi pasobra nan tabatin miedo di mi. Debi cu cada biaha mi tabata den pelea, hopi biaha mi tabata pasa weekend na warda di polis of na hospital pa cose mi heridanan.

Mi a casa cu 28 aña, y manera bo por imagina, mi no tabata trata mi casa cu respet. Mi tabata insult’e y batie. Nos no tabata haci nada hunto. Mi tabata pensa cu lo tabata suficiente si mi djis dun’e yen di joyas horta. Pero despues algo inespera a sosode; el a cuminsa un curso di Bijbel cu testigonan di Jehova. Despues di su prome estudio, el a stop di huma, nenga di tuma placa  horta y duna mi tur su joyas bek. Esey a haci mi furioso. Mi a prohibie di studia Bijbel, mi tabata supla huma di sigaria den su cara y tabata haci bofon di dje dilanti di tur bisiña.

Un anochi cu mi tabata pata pata burachi, sin mi por a yuda, mi a pega nos apartamento na candela. Mi casa a salba mi y nos yiu muher di cinco aña for di e candela. Ora mi wayaba a pasa, mi a sinti mi hopi culpabel. Mi a pensa cu nunca Dios lo por pordona mi. Mi a corda cu un biaha un pastoor a bisa cu mal hende ta bay fierno. Hasta mi psikiatra a bisa mi: “Tur cos a caba pa bo. Bo ta un caso perdi.”

Despues di e candela, nos a bay biba cerca e mayornan di mi casa. Ora e Testigonan a bin studia Bijbel cu mi casa, mi a puntra nan: “Dios por pordona mi pa tur mi picanan?” Nan a habri Bijbel y a lesa 1 Corintionan 6:9 te cu 11 pa mi. E texto ey ta menciona practicanan cu Dios ta odia, pero e texto ta agrega: “Esey ta loke algun di boso tabata.” E palabranan ey a sigura mi cu mi por cambia. E Testigonan a lesa 1 Juan 4:8 y a sigura mi cu Dios ta stima mi. Esey a anima mi hopi. Mi a pidi nan duna mi les di Bijbel dos biaha pa siman, y mi a cuminsa bay na e reunionnan di testigonan di Jehova. Constantemente mi tabata haci oracion na Jehova.

Dentro di un luna, mi a stop di bebe y uza droga. Pero ora mi a stop, ta comosifuera un guera a cuminsa den mi curpa. Mi a sufri di, entre otro, nachtmerrie teribel, dolor di cabes y spier. Pero na mes momento, mi a sinti cu Jehova tabata sostene mi y duna mi forsa. Mi a sinti mescos cu apostel Pablo, kende a skirbi lo siguiente tocante e yudansa cu Dios a dun’e: “Pa tur cos mi tin forsa pa medio di esun cu ta duna mi poder.” (Filipensenan 4:13) Cu tempo, mi a logra stop di huma tambe.—2 Corintionan 7:1.

Ademas di a yuda mi drecha mi bida, Bijbel a yuda mi mehora mi bida di famia tambe. Mi a cambia e manera cu mi tabata trata mi casa, y awor mi ta trat’e cu respet, mi ta papia nechi cu ne y ta bis’e “por fabor” y “danki.” Tambe mi a bira un mihor tata pa nos yiu muher. Despues di a studia Bijbel pa un aña, mi a sigui e ehempel di mi esposa: mi a dedica mi bida na Jehova y a batisa.

Mi ta sigur cu principionan di Bijbel a salba mi bida. Hasta mi famianan cu no ta Testigo ta reconoce cu si no ta pa e cambionan cu mi a haci, lo mi por a muri di un overdosis of den un pelea.

Siñansanan di Bijbel cu ta splica kico ta mi responsabilidadnan como esposo y tata a cambia mi bida di famia completamente. (Efesionan 5:25; 6:4) Nos a cuminsa haci cos hunto como famia. Y awor, mi no ta manda mi casa den cushina mas. Al contrario, mi ta contento di por yud’e como cu tur luna e ta dedica 70 ora na e trabou di predica. Y e na su turno ta contento di por yuda mi cumpli cu mi responsabilidadnan como anciano di congregacion.

E amor y misericordia di Jehova a echt haci un impacto riba mi. Mi tin e deseo fuerte pa papia tocante su cualidadnan cu tur hende cu ta ser considera caso perdi, pasobra hopi hende a pensa esey di mi. Mi sa cu Bijbel tin e poder pa yuda cualkier hende hiba un bida limpi y cu proposito. Bijbel no solamente a yuda mi stima y respeta otro hende, tanto hende homber y muher, pero tambe a yuda mi respeta mi mes.