PRINCIPIO DI BIJBEL: “E plannan di hende balente siguramente ta conduci na abundancia, ma tur esnan cu tin pura, siguramente ta resulta den pobreza.”—Proverbionan 21:5.

LOKE ESAKI TA ENCERA: Ta importante pa traha un plan y pega estrictamente na dje pa bo haya bon resultado. Corda cu bo no por cumpra tur loke bo ta desea, pesey maneha bo placa bon.

LOKE BO POR HACI:

• Mantene bo mes na un budget. Traha un lista di tur bo gastonan y pone nan bou di diferente categoria, manera por ehempel cuminda, paña y cosnan di cas. Despues pone cuanto placa bo ta pensa di gasta pa cada categoria. Si bo gasta di mas pa un categoria, coy placa for di un otro categoria pa cubri loke falta. Por ehempel, si bo gasta mas di loke bo a pensa na gasoline, uza e placa cu bo a aparta pa cosnan menos importante, manera por ehempel, pa come na un restaurant.

• Evita di haci debe. Si ta posibel, evita di haci debe. Mas bien, spaar placa pa cumpra loke bo mester. Si bo tin credit card, purba di paga full bo debe tur luna pa evita di paga interes. Y si bo tin un debe caba, traha un budget con pa paga bek y pega na bo plan.

  Un estudio a indica cu ora di paga cu credit card, hende tin tendencia di gasta mas placa. Pesey, si bo tin credit card, uz’e cuidadosamente.

PRINCIPIO DI BIJBEL: “Den herfst e floho no ta ploeg; pesey e ta pidi den tempo di cosecha, ma e no ta haya nada.”—Proverbionan 20:4.

LOKE ESAKI TA ENCERA: Flohedad por hiba na pobreza. Pesey, sea un bon trahador, y maneha bo placa bon pa bo por tin loke bo mester den futuro.

LOKE BO POR HACI:

• Traha duro. Ora bo ta traha duro y ta responsabel, ta mas facil pa keda cu un trabou. Hefenan ta balora persona responsabel.

• Sea honesto. Tene cuidou cu hortamento. Ora bo ta deshonesto, bo ta daña bo reputacion y ta bira dificil pa bo haya un otro trabou despues.

• Evita golosidad. Si semper bo ta purba di haya mas y mas placa, cu tempo lo bo daña bo salud y bo amistad cu otro hende. Corda, placa no ta e cos di mas importante den bida.

NO GASTA BO TEMPO Y PLACA NA BICIO.

“Pasobra e burache y e hende golos lo bira pober, y cabishamento lo haci un hende bisti paña kibra.”​—PROVERBIONAN 23:21.

NO PREOCUPA DEMASIADO CU PLACA.

“Stop di ta ansha pa boso bida, esta, kico boso lo come of kico boso lo bebe, of pa boso curpa, esta, kico boso lo bisti.”​—MATEO 6:25.

NO ENVIDIA.

“Hende haragan [of, “cu ta envidia”, NW] ta kore tras di rikesa, sin sa ku pobresa ta ward’é.”​—PROVERBIONAN 28:22, BPK.