Algun mayor ta haci sigur cu nan yiunan ta yuda cu trabou di cas, y e yiunan ta haci esey sin keha. Pero tin mayornan cu no ta spera dje hopi ey di nan yiunan, y e yiunan ta keda masha contento cu esey. Esaki ta pone cu yiunan asina ta yuda cu casi nada mas den cas.

Investigadornan ta ripara e tendencia aki den hopi pais caminda e muchanan ta custumbra di haya y no di duna. Un mayor cu yama Steven a bisa: “Awendia, mayornan ta laga nan yiunan nan so na cas ta hunga video game, surf riba Internet y wak television. Mayornan ta spera masha poco di nan.”

Kico abo ta pensa? Trabou di cas ta importante djis pa mantene cas so of pa un yiu su desaroyo tambe?

Algun mayor no ta duna nan yiunan trabou di cas pa haci pasobra nan yiunan tin hopi huiswerk y actividad despues di scol. Pero ban wak kico ta e beneficionan.

Trabou di cas ta yuda mucha madura. Mucha cu haci trabou di cas tin mas chens di bay bon na scol. Dicon? Pasobra nan ta haya net e cualidadnan cu nan tin mester, esta, nan ta bira mas sigur di nan mes, mas disciplina y mas determina.

Trabou di cas ta prepara mucha pa yuda y sirbi hende. Algun hende a ripara cu ora mayornan ta verwacht pa nan yiunan yuda den cas, tin mas chens cu e yiunan aki lo ofrece nan mes pa yuda den comunidad ora nan bira adulto. Esaki no ta nada straño pasobra trabou di cas ta train nan pa pensa riba necesidad di otro hende tambe y no riba nan so. Di otro banda, Steven cu nos a menciona anteriormente a ripara lo siguiente: “Ora nada no ta ser spera di mucha, nan ta cuminsa pensa cu hende mester sirbi nan, y nan ta crece cu un pensamento robes tocante bida, responsabilidad y trabou duro.”

Trabou di cas ta uni famia. Ora yiunan ta haci esfuerso pa yuda den cas, nan ta realisa cu no solamente nan ta un parti importante di e famia sino tambe cu nan tin cu corda riba e famia. Pero yiunan por keda sin siña e les aki ora mayornan ta duna prioridad na actividadnan despues di scol en bes di duna prioridad na trabou di cas. Puntra bo mes: Ki bal si mi yiu tin un bon relacion cu su team di futbol pero e no tin un bon relacion cu su famia?

Cuminsa ora nan ta chikito. Algun hende ta bisa cu mayornan mester duna mucha trabou di haci den cas ora nan haci tres aña. Otronan ta recomenda pa cuminsa cu dos aña of hasta mas trempan. E punto ta cu ora mucha ta hopi chikito, nan ta gusta traha hunto cu nan mayornan y nan ta imita nan mayornan.—Principio di Bijbel: Proverbionan 22:6.

Duna bo yiunan cos di haci cu ta pas pa nan edad. Por ehempel, un mucha di tres aña por ruim op su co’i hunganan, e por haci algo limpi cu a basha abou of separa e pañanan cu por laba cu otro. Muchanan mas grandi por stofzuig cas, laba auto of hasta cushina. Duna bo yiu trabou segun su habilidad. Lo bo keda sorprendi con entusiasma e ta bira pa cumpli cu su trabounan di cas.

Duna prioridad na trabou di cas. Esaki por bira dificil ora bo yiu tin hopi huiswerk tur dia. Sinembargo, segun e buki The Price of Privilege, ora mayornan no duna nan yiunan trabou di cas pa haci djis pa e yiunan haya bon punto na scol, esey “ta un señal cu a pone prioridad robes.” Manera nos a menciona caba, ora un mucha haci trabou di cas, esey ta yud’e bira un mihor studiante na scol. Y e lesnan cu abo ta siña nan ta prepara nan pa ora nan tin nan mes famia.—Principio di Bijbel: Filipensenan 1:10.

Enfoca riba loke bo kier logra y no riba e resultado. Maske lo bo desea pa bo yiu caba lihe cu trabou di cas, un mucha ta tuma mas tempo pa caba cu su trabou. Lo bo ripara tambe cu e calidad di trabou por ta mihor. Ora esey sosode, no cuminsa hacie bo mes. Corda: Bo meta no ta pa bo yiu haci e trabou manera un adulto, sino pa yud’e bira responsabel y descubri cu trabou por duna bo goso.—Principio di Bijbel: Eclesiastes 3:22.

Wak kico ta e berdadero recompensa. Algun hende ta bisa cu si bo paga bo yiu pa haci trabou, esey lo siñ’e bira responsabel. Otronan ta bisa cu esey ta yuda mucha focus riba loke nan por haya for di e famia en bes di riba loke nan por duna e famia. Tambe nan ta spierta mayornan cu un mucha por nenga di haci trabou di cas ora e tin suficiente placa, locual ta mustra cu e mucha no a compronde e motibo pakico e mester haci trabou di cas. Kico ta e conclusion? Cu ta mihor pa mayornan tene trabou di cas y zakgeld separa for di otro.