SAY BIBLIA ET ALIWAN LIBRO TUNGKOL ED SCIENCE, PERO WALA RAY NABASA DITAN YA MODERNO KOMPARAD ARUM YA SULSULAT ED PANAON TO. NIA RAY PIGARAN ALIMBAWA.

Kasin walay gapoan na uniberso?

Dati et manisia iray kabkabat ya scientist ya say ebat et anggapo. Natan balet et panisiaan la na karaklan ed sikara ya walay gapoan na uniberso. Abayag lan imbaga itan na Biblia.​—Genesis 1:1.

Antoy hugis na dalin?

Nensaman, iisipen na dakel ya totoo ya flat o plastado so dalin. Nen fifth century B.C.E., imbaga na saray Griegon scientist ya nayarin tibukel itan. Balet abayag ni antis na satan​—nen eighth century B.C.E.—​say nansulat na Biblia ya si Isaias et binitla to so “malimpek a dalin,” ya say salitan inusar to et nayari met ya ipatalos a “tibukel.”​—Isaias 40:22, paimanod leksab.

Kasin diad ilabas na panaon et naderal iray bengatlan walad tawen?

Say Griegon scientist a si Aristotle ya nambilay nen fourth century B.C.E. et imbangat to ya saray bengatlan walad dalin labat so naderal, pero agbalot kuno manguman o naderal so tawen. Nilibon taon ya ontan so papanisiaan na dakel. Balet nen 19th century, akabuo iray scientist na ideyan tatawagen ya entropy. Base ed satan, amin ya bengatla, dia man ed tawen o diad dalin, et nayarin naderal ed ilabas na panaon. Sakey ed saray scientist ya tinmulong pian nabuo iyan ideya et si Lord Kelvin. Impaimano to so imbaga na Biblia tungkol ed tawen tan dalin: “Amin da et singa kawes ya ondaan.” (Salmo 102:25, 26) Manisia si Kelvin ed ibabangat na Biblia ya sarag na Dios ya pigilan so ‘idaan’ o pakaderal na saray pinalsa To.​—Eclesiastes 1:4.

Antoy manusuporta ed saray planeta a singa say dalin?

Imbangat nen Aristotle ya amin a bengatla ed tawen et walad loob na saray kristal a globo, a kada sakey et walad loob na sakey nin globo, tan say walad sankadaleman et say dalin. Nen 18th century C.E., aawaten la na saray scientist so ideya ya saray bitewen tan planeta et anggapoy akabitinan da. Balet diad libro na Job ya insulat nen 15th century B.C.E. et nabasa tayo ya say Amalsa et “ibibitin toy dalin ed anggapo.”​—Job 26:7.

ANGGANO SAY BIBLIA ET ALIWAN LIBRO TUNGKOL ED MEDISINA, WADTAN SO PIGARAN PRINSIPYO YA PAKANENGNENGAN NA MODERNON KAKABATAN ED KONDISYON NA LAMAN.

Pangibiig ed mansasakit.

Base ed Mosaikon Ganggan, saray akating et nepeg ya ibiig. Naaralan labat iyan gawaen na saray doktor nen walay epidemya manga 700 taon lay apalabas, tan anggad natan et epektibo ni iyan paraan.​—Levitico, kapitulo 13 tan 14.

Panuras kayarin nadiwit so bangkay.

Anggad nen bandad sampot na 19th century, saray doktor et mamebemben na saray bangkay insan da i-check-up iray pasyente ya agda la uurasan so lima ra. Atan so sengegan na impatey na dakel. Balet base ed Mosaikon Ganggan, siopaman ya aniwit na bangkay et agmalinis tan agnayarin mibiang ed panagdayew. Ingganggan ni ingen na satan ya ipesak day kawes da tan manames ira pian magmaliw iran malinis. Sarayan ganggan et seguradon walay maong ya epekto tod laman.​—Numeros 19:11, 19.

Pangibantak na dutak na too.

Kada taon, masulok ya kapalduan milyon so ompapatey lapud diarrhea, tan say manunan sengegan et lapud dutak na too ya agnibantak ed dugan paraan tan pasen. Ibabaga na Mosaikon Ganggan ya say dutak na too et nepeg ya ikotkot ed pasen ya arawi ed panaayaman na totoo.​—Deuteronomio 23:13.

Panaon na pampasegat.

Espisipikon imbaga na Ganggan na Dios ya say ugaw a laki et nepeg ya segaten diad komawalon agew manlapud inkiyanak to. (Levitico 12:3) Diad saray kapangiyanak, nasabi so normal ya level na ikigtel na dala kayari sakey simba. Diad panaon ya nisulat so Biblia, antis nin adiskobre iray modernon panagtambal, aprotektaan iray ugugaw lapud alagaren nin onlabas so sakey simba antis iran segaten.

Epekto na emosyon ed laman.

Ibabaga na saray medical researcher tan scientist ya saray positibon emosyon a singa say liket, ilalo, pisasalamat, tan mabulos ya pamerdona et maong so epekto tod laman. Ibabaga na Biblia: “Say maliket a puso et maong a tambal, balet say nagogonigon ya espiritu et mangupot na biskeg.”​—Proverbio 17:22.