Eclesiastes 1:1-18
1 Saray salita na managbangat,*+ say anak nen David, ya ari ed Jerusalem.+
2 “Talagan andi-kakanaan!”* kuan na managbangat,“Talagan andi-kakanaan! Amin a bengatla et andi-kakanaan!”+
3 Antoy nagunggona na too ed amin a kimeyA pansasagpotan to diad dalin?*+
4 Sakey a henerasyon so naaandi, tan sakey a henerasyon so onsasabi,Balet say dalin et mansiansia* ya anggad angga.+
5 Say agew et ombubutay,* tan onseselek;
Insan manaapuran ompawil* ed pasen a butayan to lamet.+
6 Say dagem et oonlad abalaten tan onliliber a paonlad amianen;Tuloytuloy itan ya onliliber; say dagem et paulit-ulit ya ontetelek.
7 Amin ya ilog* et onaagus ed dayat, balet say dayat et agnapapano.+
Saray ilog et ompapawil ed pasen a panlalapuan da pian onagus lamet.+
8 Makapakesaw so amin a bengatla;Anggapoy makapangisalaysay ed saratan.
Say mata et agnapepera ed inenengneng to;Tan say layag et agnapepenek ed idedengel to.
9 Samay agawa la et nagawa lamet,Tan samay agawaan la et gawaen lamet;Anggapoy antokaman a balo diad dalin.+
10 Wala kasi bengatla a nipaakar ed satan et nibaga na sakey, “Ni nengneng mo—balo ’ya”?
Wala la itan nensaman;Wala la itan antis na panaon tayo.
11 Anggapoy makakanonot ed saray totoon nambilay ed apalabas a panaon;Tan anggapoy siopaman a makanonot ed saramay onsabi ed arapen;Tan ag-ira nanonotan na saramay onsabi ed mabayag nin arapen.+
12 Siak a managbangat et nagmaliw ya ari ed Israel diad Jerusalem.+
13 Inteen koy pusok pian aralen tan usisaen tekep na karunongan+ so amin a bengatlan ginawa diad silong na tawen+—say makapadismayan kimey ya inter na Dios ed saray anak na totoo a pakakaokupadoan da.
14 Anengneng koy amin a kimey a gagawaen diad dalin,Tan amin a bengatla et andi-kakanaan, a panguusil ed dagem.+
15 Samay pikewet et agnipetek,Tan samay anggapo et agnayarin ibilang.
16 Kanian inkuan kod sarilik:* “Akagamor ak na mas baleg a karunongan nen say siopaman ya akauna nen siak diad Jerusalem,+ tan say pusok et akagamor na balbaleg a karunongan tan kakabatan.”+
17 Inteen koy pusok ed pangamtay karunongan tan ed pangamtay kaambagelan* tan ed pangamtay inkamakulangkulang,+ tan saya met et panguusil ed dagem.
18 Ta say dakdakel a karunongan et manreresulta ed dakdakel a pakadismayaan,Kanian siopaman a paparakelen toy kakabatan to et paparakelen toy pakasakitan to.+
Paimanod leksab
^ Odino “managtipon na totoo.”
^ Odino “kaapaan.”
^ Literal, “silong na agew.” Sayan balikas et 29 danay a nabasad Eclesiastes.
^ Literal, “akaalagey.”
^ Odino “onsisinag.”
^ Odino “ompapawil a manangos.”
^ Odino “kulos no panaoy ambetel.”
^ Literal, “pusok.”
^ Odino “alablabas ya inkamakulangkulang.”
