Imbaga nen Jesus: “Manlalaban iray bansa, ontan met ed saray panarian. Wala ray maksil a yegyeg, tan diad nanduruman pasen et wala ray eras tan salot.” (Lucas 21:10, 11) No panon ya say fingerprint so pakabidbiran na sakey ya espisipikon too, saratan ya nagawa ed saksakey a panaon so pakabidbiran met ya “asingger lay Panarian na Dios.” Kasin amin iratan et nagagawa la diad interon mundo? Ikonsidera iray ebidensya.

1. SARAY GUERRA

Nen 1914, ginmapo so guerra ya angapekta ed mas dakdakel ya totoo tan lugar nen say kapiganman! Mabetbet ya ibabaga na saray historian ya say 1914 et taon na balbaleg ya pananguman lapud agawa ed satan so sankaunaan ya sankamundoan ya guerra. Diad satan ya guerra et first-time ya inusar ed dakdakel ya lugar iray tangki, saray bomba ya ipepelag na saray eroplano, saray machine gun, makasamal iran gas, tan arum nin makapatey ya armas. Sinublayan itan na komaduan sankamundoan ya guerra, tan diad satan ginmapo ya inusar iray atomic bomb. Manlapu la nen 1914 et tuloytuloy nin manlalaban iray totoo ed saray guerra, tan minilyon la so inatey.

2. SARAY YEGYEG

Kada taon, manga 100 ya maksil iran yegyeg so manreresulta ed “graben deral,” so kuan na Britannica Academic. Tan inreport na United States Geological Survey ya “base ed saray rekord (manlapu la nen manga 1900), ilaloan tayo ya manga 16 a maksil iran yegyeg so nagawa ed ontumbok iran taon.” Wala ray arum ya scientist ya iisipen dan say rason no akin ya dakel so bilang na saray yegyeg et lapud mas nade-detect la iratan natan. Balanglan atan so rason odino andi, saray maksil ya yegyeg ed interon mundo et manreresulta ed mas graben paniirap tan ipapatey na totoo natan.

 3. ERAS

Kaslakan ya walay eras lapud guerra, kurapsion, problema ed ekonomya, makapuy ya panangasikaso ed agrikultura, odino ag-impamparaan parad aliwan marakep iran kipapasen na panaon. Oniay imbaga na The World Food Programme’s “2018 Year in Review”: “Diad interon mundo, 821 milyon ya totoo so nakukulangan na naakan tan 124 milyon ed saratan so talagan naeerasan.” Manga 3.1 milyon ya ugugaw so ompapatey kada taon lapud malnutrisyon. Nen 2011, atan so rason na impatey na manga 45 porsiento na amin ya inatey ya ugugaw diad interon mundo.

4. SARAY SAKIT TAN EPIDEMYA

Oniay imbaga na sakey ya publikasyon na World Health Organization: “Manlapu la nen 2001, wala la ray agawan graben epidemya. Pinmawil iray dati lan sakit a singa say cholera, say salot ya black death, tan yellow fever, tan wala ray balon sakit ya linmesa a singa say SARS, pandemic influenza, MERS, Ebola tan Zika.” Say sankabaloan et say COVID-19 pandemic. Anggano dakel lay naaralan na saray scientist tan doktor no panon ya tambalen iray sakit, agda nin siansia natambal so amin ya sakit tan agda napatunda iray epidemya.

5. SAY PANAGPULONG ED INTERON MUNDO

Wala ni sakey ya kabiangan na tanda ya impasakbay nen Jesus: “Sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.” (Mateo 24:14) Anggano dakdakel so mauges ya nagagawa ed mundo natan, masulok ya waloran milyon a totoo diad nanduruman bansa so mangipupulong ed maong a balita na Panarian na Dios ed 240 a dalin tan diad masulok ya 1,000 a lenguahe. Agnin balot itan agawa ed kapiganman.

Nagagawa la natan so amin ya kabiangan na tanda ya imbaga nen Jesus. Akin et nepeg ya interesado tayo ed satan? Lapud imbaga nen Jesus: “No nanenengneng yon nagagawa la irayan bengatla, amtaen yo ya asingger lay Panarian na Dios.”​—Lucas 21:31.

Say pakakagawa na tanda ya imbaga nen Jesus, tan say rekord na Biblia nipaakar ed saray pantutumbokan na saray nagawa, et ontulong ed sikatayon natalosan ya inletneg na Dios so Panarian ed tawen nen 1914. a Diad satan ya taon et introno to so Anak to, si Jesu-Kristo, bilang Ari. (Salmo 2:2, 4, 6-9) Asingsingger lan manuley so Panarian na Dios ed dalin, tan ekalen na satan iray arum ya gobierno tan gawaen ton paraiso so dalin ya panayaman na totoo ed andi-anggaan.

Asingger lan nagawa iray binitla nen Jesus diad pikakasi ya imbangat to: “Onsabi la komon so Panarian mo. Nagawa komon so linawam, a singa ed tawen, ontan met diad dalin.” (Mateo 6:10) Anto la balet so gagawaen na Panarian manlapu la nen niletneg itan nen 1914? Tan antoy talaranan tayon nagawa sano uleyan la na Panarian iray totoo?