Ipapanengneng na kronolohiya na Biblia ya niletneg so Panarian na Dios ed tawen nen 1914. Naamtaan tayo iya ed sakey a propesiya diad kapitulo 4 na libro na Biblia ya Daniel.

 Say propesiya. Impakugip na Dios ed si Arin Nabucodonosor ya ari na Babilonia so pasingawey nipaakar ed binatang ya atagtagey a maong ya kiew. Binariberan so sengeg to pian ag-ombaleg diad loob na “pitoran panaon,” balet kayari na satan et ontubo lamet so kiew.—Daniel 4:1, 10-16.

 Say unonan impakasumpal na propesiya. Irerepresenta na balbaleg a kiew si Arin Nabucodonosor. (Daniel 4:20-22) Simbolikon binatang si Arin Nabucodonosor nen naandi so kalakal to tan agmakapanuley ed loob na pitoran taon. (Daniel 4:25) Nen impawil na Dios so kalakal to, nanuley lamet tan binidbir toy uley na Dios.—Daniel 4:34-36.

 Say ebidensya ya walay mas baleg ya impakasumpal na propesiya. Say talagan gagala na propesiya et “pian naamtaan na mabilay a totoo a say Sankatagyan so Manuley ed panarian na totoo tan iter to itan ed siopaman a labay to, tan turoen ton manuley ed satan anggan samay sankaabebaan ed saray totoo.” (Daniel 4:17) Kasin say mapaatagey ya si Nabucodonosor so labay na Dios ya pangiteran na panuley? Andi, ta wala lay akaunan propesiya ya impakugip na Dios ed sikato ya mangipapanengneng ya aliwan sikato odino anggan siopan manuuley ed politika so makanepegan ed satan ya posisyon. Imbes, say Dios et “mangiletneg na panarian ya agbalot naderal.”—Daniel 2:31-44.

 Nensaman, angiletneg lay Dios na panarian ya angirepresenta ed uley to diad dalin: say nasyon na Israel nensaman. Inabuloyan na Dios ya magmaliw a “geray” itan ya panarian lapud agnanmatoor iray manuuley, balet impasakbay to ya iter toy inkaari ed samay “makankanepegan.” (Ezequiel 21:25-27) Ipapaamta na Biblia ya si Jesu-Kristo so legal ya makankanepegan ya mangawat na sayan agmanganggan panarian. (Lucas 1:30-33) Aliwan singa si Nabucodonosor, “mapaabeba” si Jesus, ya singa nipropesiya.—Mateo 11:29.

 Antoy irerepresenta na kiew ed Daniel kapitulo 4? Diad Biblia, no maminsan et irerepresenta na saray kiew so panuley. (Ezequiel 17:22-24; 31:2-5) Diad mas baleg ya impakasumpal na Daniel kapitulo 4, isisimbolo na balbaleg ya kiew so uley na Dios.

 Antoy labay ya ibaga na binatang ya kiew? Irerepresenta na binatang ya kiew so apatundan uley nen Nabucodonosor, irerepresenta met na satan so apatundan uley na Dios ed dalin. Agawa itan nen dineral nen Nabucodonosor so Jerusalem, say syudad no iner yinmurong ed “trono nen Jehova” iray ari na Israel ya angirepresenta ed Dios.—1 Awaran 29:23.

 Antoy irerepresenta na “pitoran panaon”? Irerepresenta na “pitoran panaon” so panaon ya inabuloyan na Dios iray nasyon ya manuley ed dalin tan ag-akibabali so anggan anton panarian ya inletneg to. Base ed kronolohiya na Biblia, ginmapo so “pitoran panaon” nen Oktubre 607 B.C.E. nen dineral na saray taga Babilonia so Jerusalem. a—2 Arari 25:1, 8-10.

 Panon karukey so “pitoran panaon”? Aliwa itan ya basta pitoran taon labat ya singa agawad si Nabucodonosor. Impaamta nen Jesus so ebat nen imbaga ton “say Jerusalem [ya mangirerepresenta ed uley na Dios] et igatin-gatin na saray nasyon, anggad nasumpal iray aturon panaon na saray nasyon.” (Lucas 21:24) Say “aturon panaon na saray nasyon,” say panaon ya inabuloyan na Dios ya “igatin-gatin na saray nasyon” so uley to, et aman lanlamang imay “pitoran panaon” diad Daniel kapitulo 4. Kanian agni sirin anampot so “pitoran panaon” nen wadiad dalin si Jesus.

 Angiter so Biblia na paraan pian naamtaan tayo so karukey na samay impropesiyan “pitoran panaon.” Ibabaga na Biblia ya say talora tan kapalduan “panaon” et 1,260 ya agew, kanian say “pitoran panaon” et doble na satan ya bilang, odino 2,520 ya agew. (Apocalipsis 12:6, 14) No tumboken tayoy panagkuenta parad saray propesiya ya “sakey agew parad sakey taon,” say 2,520 ya agew sirin et irerepresenta toy 2,520 ya taon. Kanian say “pitoran panaon” odino 2,520 ya taon et anampot nen Oktubre 1914.—Numeros 14:34; Ezequiel 4:6.