• Pinili na Dios. “Siak a mismo so angipasen na arik . . . ipatawir kod sika iray nasyon tan iter kon kayarian mo so interon dalin.”​—Salmo 2:6, 8.

• Tomatawir nen Arin David. “Sakey ya ugaw so niyanak ed sikatayo, sakey ya anak a laki so niiter ed sikatayo . . . Say ilaknab na pananguley to tan say kareenan et agmangangga, diad trono nen David tan diad panarian to pian malet a niletneg.”​—Isaias 9:6, 7.

• Inyanak ed Betlehem. “O Betlehem . . . , ompaway ed sika imay turoen kon magmaliw a manuley . . . Onsabi anggad saray sampot na dalin so pakapanyari to.”​—Miqueas 5:2, 4.

• Impulisay na totoo tan pinatey. “Sikatoy abalawbalaw, tan impasen min anggapoy kakanaan. . . . Sikatoy dinuyok lapud kasalanan mi; sikatoy apairap lapud saray lingo mi.”​—Isaias 53:3, 5.

• Binilay lamet tan inggloria. “Agmo ak itilak ed Lubok. Samay matoor ed sika et agmo abuloyan a nanengneng toy abot. . . . Diad nikawanan mo et walay liket ya anggad angga.”​—Salmo 16:10, 11.

Diad amin ya toon nambilay, saksakey labat so toon walad sikato so amin ya pakapatnagan na sankaabigan ya Manuley, anggapo lay arum noag si Jesu-Kristo. Diad tua, oniay imbaga na sakey ya anghel ed ina nen Jesus ya si Maria: “Iter nen Jehova a Dios ed sikato so trono nen David ya ama to, . . . tan agmangangga so Panarian to.”​—Lucas 1:31-33.

Agbalot nanuley ed dalin si Jesus. Imbes, uleyan to ray totoo manlapud tawen bilang Ari na Panarian na Dios. Akin et sikato so sankaabigan ya Manuley? Imanoen iray ginawa to legan ya wadiad dalin.

•   Inar-aro nen Jesus iray totoo tan inasikaso to ra. Tinulongan nen Jesus iray lalaki tan bibii, ugugaw tan mamatatken, antokaman so kipapasen da ed bilay. (Mateo 9:36; Marcos 10:16) Nen akikasi so sakey ya akating: “No labay mo, sarag mo ak a linisan,” sikatoy akasian nen Jesus tan pinaabig to.​—Marcos 1:40-42.

• Imbangat nen Jesus no panon tayon napaliket so Dios. Imbaga to: “Agyo nayarian so manpaaripen ed Dios tan ed Kayamanan.” Imbaga to met ya nepeg tayon tratoen so kapara tayon too ed paraan ya labay tayon tratoen da tayo​—satan imay prinsipyo a tinawag ya Golden Rule. Tan impanengneng to ya iimanoen na Dios no antoy iisipen tan nalilikna tayo, aliwa labat ya saray mismon gagawaen tayo. Kanian pian napaliket tayoy Dios, nepeg tayon kontrolen iray nalilikna tayod puso tayo. (Mateo 5:28; 6:24; 7: 12) Indanet nen Jesus ya pian magmaliw tayon tuan maliket, kaukolan tayon aralen no antoy labay na Dios ya gawaen tayo insan tayo gawaen itan.​—Lucas 11:28.

• Imbangat nen Jesus no panon tayon aroen so arum. Saray imbaga tan ginawa nen Jesus et epektibo tan asabi so puso na saray ondedengel ed sikato. “Mandinayew iray totoo ed paraan na panagbangat to, ta binangatan to ra a singa panagbangat na sakey a toon walaay autoridad.” (Mateo 7:28, 29) Imbangat to ran ‘aroen iray mamubusol ed sikara.’ Impikasi to ni ingen iramay nampapatey ed sikato: “Ama, perdonam ira, ta agda amtay gagawaen da.”​—Mateo 5:44; Lucas 23:34.

Si Jesus so sankakualipikadoan ya magmaliw a Manuley ed mundo, sikatoy matulong tan maomaong. Balet kapigan onggapo ya manuley?