Адӕмӕй иуӕй-иутӕ сӕхи рӕдыдтытыл фӕахуыр кӕнынц. Мӕ хабар дӕр афтӕ уыд. Ӕз райгуырдтӕн ӕмӕ схъомыл дӕн Барселонӕйы, уый у Испанийы стырдӕр горӕттӕй дыккаг. Цардыстӕм Соморростройы, денджызы былмӕ хӕстӕг. Соморростро зындгонд уыди, бирӕ фыдракӕндтӕ дзы кӕй уыди ӕмӕ дзы наркотиктӕ кӕй уӕй кодтой, уымӕй.

 Мах уыдыстӕм фараст сывӕллоны, ӕмӕ ӕз уыдтӕн сӕ хистӕр. Тынг мӕгуыр кӕй цардыстӕм, уымӕ гӕсгӕ мӕ мӕ фыд кусынмӕ арвыста теннисы клубмӕ – уым чи хъазыд, уыдонӕн-иу сӕ пуртитӕ ӕмбырд кодтон. Уӕд мыл дӕс азы цыди ӕмӕ алы бон дӕр дӕс сахаты куыстон. Уымӕ гӕсгӕ иннӕ сывӕллӕттӕй уӕлдай ӕз скъоламӕ нӕ цыдтӕн. Цыппӕрдӕс азы мыл куы цыд, уӕд райдыдтон слесырӕй кусын, ӕфснӕйнӕгтимӕ кӕм куыстой, ахӕм цехы.

 1975 азы мӕм ӕфсадмӕ фӕсидтысты. Сабыр цард мӕ зӕрдӕмӕ нӕ цыд, ӕмӕ бацыдтӕн Испанийы фӕсарӕйнаг легионмӕ Мелильейы, уый уыди Испанийы территори Цӕгат Африкӕйы. Уыцы рӕстӕг наркотиктыл ӕмӕ нозтыл фӕцахуыр дӕн.

 Ӕфсадӕй ӕрыздӕхтӕн Барселонӕмӕ ӕмӕ бандӕ сарӕзтон. Мах давтам, нӕ бон цыдӕриддӕр ахӕссын уыди, уый. Стӕй-иу сӕ ауӕй кодтам ӕмӕ-иу уыцы ӕхцайӕ наркотиктӕ балхӕдтам. Ӕз райдыдтон ЛСД ӕмӕ амфетаминтӕ кӕнын, ӕмӕ мын царды ӕнӕгъдау митӕ, нуӕзт ӕмӕ наркотиктӕй сӕйрагдӕр ницыуал уыд. Ахӕм царды тыххӕй ӕгъатырӕй-ӕгъатырдӕр кодтон. Мемӕ алкӕддӕр хастон кард, фӕрӕт кӕнӕ мачете, ӕмӕ-иу исты мӕ зӕрдӕмӕ куы нӕ фӕцыд, уӕд-иу никӕуыл бацауӕрстон.

 Иухатт нӕ бандӕ машинӕ адавта ӕмӕ нӕ пъӕлицӕ расырдтой, раст кинойы куыд вӕййы, афтӕ. Иу-30 километры нӕ куы фӕсырдтой, уӕд нӕ ӕхсын райдыдтой. Ӕппынфӕстаг нӕ машинӕ ныппырх ӕмӕ алырдӕмты алыгъдыстӕм. Уый мӕ фыд куы базыдта, уӕд тынг смӕсты ӕмӕ мӕ хӕдзарӕй ратардта.

 Ӕмӕ фондз азы дӕргъы уынг уыди мӕ хӕдзар. Фынӕй кодтон подъездты, уӕзласӕн машинӕты, парчы бандӕттыл ӕмӕ уӕлмӕрдты. Суанг ма иу рӕстӕг лӕгӕты дӕр цардтӕн. Цӕмӕн цӕрын, уый не ’мбӕрстон ӕмӕ мӕм афтӕ каст, ӕмӕ удӕгас дӕн ӕви мард, уый никӕй ӕндавы. Наркотикӕ-иу куы скодтон, уӕд-иу ӕй ӕмбаргӕ дӕр нӕ бакодтон, афтӕмӕй-иу мӕ къухтӕ ныллыгтӕ кодтон. Абон дӕр сӕ ностӕ бӕрӕг дарынц.

 28 азы мыл куы цыд, уӕд мӕ мӕ мад ссардта ӕмӕ мын загъта, цӕмӕй хӕдзармӕ ӕрыздӕхтаин. Ӕз сразы дӕн ӕмӕ йын дзырд радтон, мӕ цард кӕй аивдзынӕн, фӕлӕ йӕ сӕххӕст кӕнын афтӕ ӕнцон нӕ уыд.

 Иу бон нын фӕссихор дыууӕ Йегъовӕйы Ӕвдисӕны нӕ дуар ӕрбахостой. Мемӕ куы ныхас кодтой, уӕд мӕ фыд мидӕгӕй рахъӕр кодта, цӕмӕй дуар сӕхгӕдтаин. Никуы уарзтон, исчи мын исты аразын кӕна, уый ӕмӕ йӕм нӕ байхъуыстон. Уыдон мын ӕртӕ гыццыл чиныджы радтой. Ӕз сӕ бафарстон, се ’мбырдтӕ кӕм вӕййынц, уымӕй ӕмӕ цалдӕр боны фӕстӕ Паддзахады залмӕ ацыдтӕн.

 Ӕппӕты фыццаг бафиппайдтон, иууылдӕр куыд рӕсугъд конд уыдысты, уый. Мӕнӕн та уыди даргъ сӕрыхъуынтӕ ӕмӕ боцъотӕ, стӕй ӕнӕпълан кӕндтытӕ уыдтӕн. Уымӕ гӕсгӕ залмӕ бахизын нӕ бауӕндыдтӕн. Мӕ дисӕн кӕрон дӕр нал уыд, раздӕр мемӕ иу бандӕйы чи уыд, уый костюмы лӕугӕ куы федтон, уӕд. Йӕ ном уыди Хуан. Фӕстӕдӕр базыдтон, иу азы размӕ Йегъовӕйы Ӕвдисӕн кӕй сси. Йӕ цуры фӕныфсджындӕр дӕн, залмӕ бацыдтӕн ӕмӕ фембӕлдмӕ байхъуыстон. Уыцы бон мӕ цард ивын райдыдта.

 Библи ахуыр кӕныныл сразы дӕн ӕмӕ цыбыр рӕстӕгмӕ бамбӕрстон: кӕд мӕ Хуыцауы хорзӕх ссарын фӕнды, уӕд хъуамӕ мӕстыгӕр мауал уон ӕмӕ ӕнӕгъдау цард мауал кӕнон. Уый ӕнцон хъуыддаг нӕ уыд. Ӕз базыдтон, цӕмӕй Йегъовӕ Хуыцауы зӕрдӕ рухс кӕнон, уый тыххӕй хъуамӕ мӕ «зонд ног кӕнон» (Ромӕгтӕм 12:2). Хуыцау фӕлмӕнзӕрдӕ кӕй у, уый мын мӕ зӕрдӕ тынг бацагайдта. Кӕд бирӕ рӕдыдтытӕ сарӕзтон, уӕддӕр мын Хуыцау уый фадат радта, цӕмӕй мӕ цард аивтаин. Йегъовӕ Хуыцауы тыххӕй цы базыдтон, уый мӕ зӕрдӕмӕ арф айстон. Бамбӕрстон ӕй, Сфӕлдисӕг мыл кӕй тыхсы (1 Петры 5:6, 7).

 Уый мын баххуыс кодта, цӕмӕй мӕ цард ивын райдыдтаин. Зӕгъӕм, Библийы ахуыры рӕстӕг тамако дымыны кой куы кодтам, уӕд мӕхицӕн загътон: «Кӕд Йегъовӕ Хуыцауы фӕнды, цӕмӕй сыгъдӕг уон ӕмӕ цыдӕриддӕр чъизи у, уымӕй мӕхи хизон, уӕд хъуамӕ ацы тамакотӕ аппарон» (2 Коринфӕгтӕм 7:1). Ӕмӕ сӕ бырӕтты ведрайы ныппӕрстон!

 Уымӕй уӕлдай ма хъуамӕ наркотиктӕ кӕнгӕ дӕр мауал кодтаин ӕмӕ уӕй дӕр. Фӕлӕ мӕ уымӕн фылдӕр рӕстӕг ӕмӕ хъарутӕ бахъуыд. Цӕмӕй уый мӕ къухы бафтыдаид, уый тыххӕй мын хъуамӕ мӕ раздӕры ӕмбӕлттимӕ иумӕйагӕй мацыуал уыдаид. Уыдон мын мӕ уырнындзинад фидар кӕнынӕн къуылымпыйы хос йеддӕмӕ ницы уыдысты. Рӕстӕг куы рацыд, уӕд мӕ ныфс тынгдӕр дарын райдыдтон Хуыцауыл, ӕмӕ мын ӕмбырды цы ’мбӕлттӕ фӕзынд, уыдоныл. Уыдоны хуызӕн мӕ раздӕр никуы ничи уарзта ӕмӕ мыл ничи тыхсти. Цалдӕр мӕйы фӕстӕ мӕ бон сси наркотиктӕ ныууадзын ӕмӕ мӕ «удыхъӕд ногмӕ раивын» (Ефесӕгтӕм 4:24). Уый фӕрцы мӕ бон уыдаид Хуыцауы хорзӕх ссарын. 1985 азы августы донаргъуыд райстон ӕмӕ Йегъовӕйы Ӕвдисӕн сдӕн.

 Библийы фӕрцы мӕ цард хуыздӕрырдӕм аивта. Ныууагътон, ме ’нӕниздзинадӕн зиан чи хаста ӕмӕ мӕхицӕн аргъ кӕй тыххӕй нал кодтон, уыцы цардыуаг. Мӕ раздӕры ӕмбӕлттӕй 30 адӕймагӕй фылдӕр ӕрыгонӕй амардысты СПИД-ӕй кӕнӕ наркотикты тыххӕй цы низтӕ фӕзыны, уыдонӕй. Ӕз та амондджын дӕн, уымӕн ӕмӕ Библийы уагӕвӕрдтӕм гӕсгӕ кӕй цӕрын, уый фӕрцы удӕгас дӕн.

 Ӕрыгонӕй ӕгъатыр уыдтӕн ӕмӕ мемӕ кӕрдтӕ ӕмӕ фӕрӕттӕ хастон, фӕлӕ уыцы хъуыддӕгтӕ фӕстейӕ баззадысты. Раздӕр хъуыды дӕр никуы акодтаин, Библи мӕ къухы кӕй хӕсдзынӕн ӕмӕ афтӕмӕй адӕмӕн кӕй ӕххуыс кӕндзынӕн. Абон мӕ бинойнагимӕ нӕ рӕстӕгӕн йӕ фылдӕр хай Йегъовӕйӕн лӕггад кӕнӕм.

 Мӕ ныййарджытӕ Йегъовӕйы Ӕвдисӕнтӕ не систы. Фӕлӕ стыр аргъ кодтой, Библийы фӕрцы хуыздӕрырдӕм кӕй аивтон, уымӕн. Мӕ фыд-иу Ӕвдисӕнты сӕрыл рахӕцыд, йе ’мкусджытӕ-иу сӕ ныхмӕ куы дзырдтой, уӕд. Уымӕн ӕмӕ зыдта, мӕ дин мын мӕ цард хуыздӕрырдӕм цӕхгӕр кӕй фӕивта. Мӕ мад-иу арӕх загъта, Библи ахуыр кӕнын райдайын мӕ раздӕр кӕй хъуыд. Ӕмӕ йемӕ разы дӕн!

 Мӕхицӕй йӕ зонын, ӕнӕзонд ми кӕй у афтӕ хъуыды кӕнын, ӕмӕ наркотиктӕ ӕмӕ ӕндӕр ахӕм хъуыддӕгты фӕрцы амондджын уыдзынӕ. Ныр ӕцӕг амондджын дӕн, уымӕн ӕмӕ Хуыцауы Ныхасы цы ахуырӕдтӕ ис, уыдон иннӕтӕн амонын – уыцы ахуырӕдты фӕрцы мӕ цард бахъахъхъӕдтон.