Кӕцыдӕр лӕвар нын зынаргъ вӕййы, исты стыр хицау кӕнӕ, тынг кӕмӕн аргъ кӕнӕм, ахӕм адӕймаг нын ӕй кӕй скодта, уый тыххӕй. Иннӕ лӕвар та кӕд зынаргъ нӕ вӕййы, уӕддӕр нӕ зӕрдӕйӕн адджын вӕййы, нӕ бинонтӕй чидӕр кӕнӕ нын ӕй нӕ хорз хӕлар кӕй балӕвар кодта, уый тыххӕй. Фыццаг статьяйы куыд федтам, афтӕмӕй Рассел Джорданӕн цы лӕвар скодта, уымӕн дӕр йӕ хабар афтӕ уыд. Фӕлӕ цымӕ уый куыд баст у, Хуыцау нын цы лӕвар скодта, ома ахӕсты аргъ кӕй бафыста, уыимӕ?

Фыццаджыдӕр, Библи зӕгъы: «Хуыцау... йӕ иунӕг Фырты дунемӕ рарвыста, цӕмӕй уый фӕрцы цардӕй хайджын уӕм» (1 Иоанны 4:9). Уымӕ гӕсгӕ нын уыцы лӕвар тынг зынаргъ у. Дун-дунейы Хуыцауӕй стырдӕр хицау нӕй. Хуыцауы тыххӕй дзуттаг псаломзарӕггӕнӕг ныффыста: «Ды, йӕ ном Йегъовӕ кӕмӕн у, ӕрмӕстдӕр ды... дӕ Иунӕг Стыр Хуыцау, Хицау ӕгас зӕххӕн» (Псалом 83:18). Уымӕй бӕрзонддӕр хицау нын исты лӕвар ракӕна, уымӕн гӕнӕн нӕй.

Дыккаджыдӕр та уый, ӕмӕ Хуыцау у «нӕ Фыд» (Исай 63:16). Уый куыд ӕмбаргӕ у? Хуыцау нын цард радта, ӕмӕ ныл тыхсы, ӕнувыд фыд йӕ сывӕллӕттыл куыд фӕтыхсы, афтӕ. Рагзаманты Хуыцау йӕ адӕмы хуыдта Ефрем, ӕмӕ загъта: «Ефрем мӕ зынаргъ фырт, мӕ буцхаст хъӕбул нӕу? [...] Йӕ тӕригъӕдмӕ кӕсгӕйӕ мӕ зӕрдӕ скъуыдтӕ кӕны. Ӕз ын ӕнӕмӕнг фӕтӕригъӕд кӕндзынӕн» (Йереми 31:20). Ахӕм зӕрдӕ дары Хуыцау абон дӕр йӕ лӕггадгӕнджытӕм. Уый ӕрмӕст нӕ хъомысджын Сфӕлдисӕг нӕу, фӕлӕ ма не ’нувыд Фыд дӕр ӕмӕ нӕ Хӕлар дӕр. Уӕдӕ нын Хуыцау цы балӕвар кӕна, уый нын ӕппӕт лӕвӕрттӕй дӕр зынаргъдӕр куыннӕ уыдзӕн?

Иуӕй-иутӕ нын лӕвар скӕнынц, сӕхи хӕсджыныл кӕй фӕнымайынц, уый тыххӕй нӕ, фӕлӕ нӕ бирӕ кӕй уарзынц, уый тыххӕй. Лӕвар нын зӕрдӕйӕ чи скӕны, уый нын ӕй уый тыххӕй не скӕны, цӕмӕй йын йӕ хорздзинад истӕмӕй бафидӕм.

Хуыцау дӕр йӕ Фырты мах тыххӕй уымӕн радта, ӕмӕ нӕ бирӕ уарзы. Библийы фыст ис: «Хуыцау нӕ кӕй уарзы, уый уымӕй равдыста, ӕмӕ йӕ иунӕг Фырты дунемӕ рарвыста». Цӕмӕн? «Цӕмӕй уый фӕрцы цардӕй хайджын уӕм» (1 Иоанны 4:9). Цымӕ Хуыцау афтӕ уый тыххӕй бакодта, ӕмӕ хӕсджын уыди? Нӕ! Йесо Чырысти нӕ кӕй балхӕдта, уый Хуыцауы «стыр хорзӕхыл» дзурӕг у (Ромӕгтӕм 3:24).

Цӕмӕн ис афтӕ зӕгъӕн, ӕмӕ нын Хуыцау уыцы лӕвар йе «стыр хорзӕхмӕ» гӕсгӕ скодта? Библийы кӕсӕм: «Хуыцау нӕ кӕй уарзы, уый та ӕвдисы, Чырысти нӕ сӕрвӕлтау, тӕригъӕдджынтӕ ма куы уыдыстӕм, уӕд кӕй амард, уымӕй» (Ромӕгтӕм 5:8). Хуыцау нӕ тынг кӕй уарзы, уымӕ гӕсгӕ батыхст лӕмӕгъ, ӕххуысхъуаг ӕмӕ тӕригъӕдджын адӕмыл. Афтӕ зӕгъӕн нӕй, ӕмӕ нӕ Хуыцау уый аккаг нӕ хорз хъуыддӕгты тыххӕй скодта. Стӕй йын уыцы хорздзинад нӕ бон бафидын дӕр никуы бауыдзӕн. Йӕ лӕвар нын йе стыр уарзондзинадыл дзурӕг у. Ахӕм уарзтӕй никуы ничи уарзта ӕмӕ нӕдӕр уарздзӕн.

Кӕцыдӕр лӕварӕн уый тыххӕй фӕаргъ кӕнӕм, ӕмӕ нын ӕй чи скодта, уымӕн лӕвар скӕнын тынг зынаргъ слӕууыд. Кӕд ӕй йӕхицӕй ратыдта, уӕд нын уыцы лӕвар уӕлдай зынаргъдӕр вӕййы.

Хуыцау «радта йӕ иунӕг Фырты» (Иоанны 3:16). Ӕппӕты зынаргъдӕр ын чи уыд, уый мах тыххӕй радта. Хуыцау Дун-дуне куы фӕлдыста, уӕд ӕппӕт уыцы ӕнусты дӕргъы Йесо уыд йӕ фарсмӕ ӕмӕ уыд «йе стыр цин» (Ӕмбисӕндтӕ 8:30). Йесо у йӕ «уарзон Фырт» ӕмӕ у, «цӕстӕй фенӕн кӕмӕн нӕй, уыцы Хуыцауы хуызӕн» (Колоссӕгтӕм 1:13–15). Уыдон кӕрӕдзийыл куыд ӕнувыд уыдысты, афтӕ никуы ничи.

Фӕлӕ Хуыцау «йӕ Фырты нӕ бавгъау кодта» (Ромӕгтӕм 8:32). Йегъовӕ мах тыххӕй радта, ӕппӕты хуыздӕрӕй йӕм цы уыди, уый. Уыцы лӕвар ын куыд зынаргъ слӕууыд, афтӕ ницы.

Кӕцыдӕр лӕвӕрттӕ нын зынаргъ сты, уымӕн ӕмӕ нӕ ӕнӕмӕнг чи хъуыди, ахӕмтӕ сты. Зӕгъӕм, куыд тынг бузныг уаис, исчи дын куы балхӕнид, дӕ цард кӕмӕй кӕнгӕ у, фӕлӕ дӕхи бон балхӕнын кӕй нӕу, ахӕм хос! Уыцы лӕвар абарӕн дӕр ницӕимӕ уаид, афтӕ нӕу?

«Адамы аххосӕй адӕм иууылдӕр куыд мӕлынц, афтӕ Чырыстийы фӕрцы та иууылдӕр райгас уыдзысты» (1 Коринфӕгтӕм 15:22). Адамы байзӕддӕгтӕ кӕй стӕм, уымӕ гӕсгӕ иууылдӕр «мӕлӕм», ӕмӕ нӕ бон нӕу, цӕмӕй низтӕй ӕмӕ мӕлӕтӕй нӕхи бахизӕм кӕнӕ Хуыцауимӕ бафидауӕм ӕмӕ нӕхи нӕ тӕригъӕдтӕй ссыгъдӕг кӕнӕм. Мах зӕххон адӕймӕгтӕ йеддӕмӕ ницы стӕм, ӕмӕ нӕ бон нӕу нӕдӕр нӕхи «райгас кӕнын», нӕдӕр ӕндӕр искӕй. Библийы фыст ис: «Уыдонӕй иуӕн дӕр йӕ бон нӕу йе ’фсымӕры балхӕнын... Ӕмӕ йӕ ӕнусты дӕргъы ничима бафыста» (Псалом 49:7, 8). Мах ӕнӕмӕнгӕй хъӕуы ӕххуыс, уымӕн ӕмӕ ахӕсты аргъ бафидын нӕ бон нӕу. Иунӕгӕй нӕ бон ницы бауыдзӕн.

Йегъовӕ нӕ тынг кӕй уарзы, уымӕ гӕсгӕ нӕ бӕсты бафыста, нӕ цард кӕмӕй кӕнгӕ у, уыцы хосы аргъ, цӕмӕй Чырыстийы фӕрцы «иууылдӕр райгас уой». Чырыстийы нывонд уыимӕ куыд баст у? «[Хуыцауы] Фырт Йесойы туг сыгъдӕг кӕны ӕппӕт тӕригъӕдтӕй дӕр». Йӕ туг мах тыххӕй кӕй ныккалдта, ууыл кӕй ӕууӕндӕм, уый руаджы нӕ тӕригъӕдтӕ хатыргонд цӕуынц ӕмӕ нын ис ӕнустӕм цӕрыны ныфс (1 Иоанны 1:7; 5:13). Чи нын амард,  уыдонӕн та Чырыстийы нывонд цы пайда у? «Мӕлӕт адӕймаджы аххосӕй куыд фӕзынд, афтӕ мӕрдтӕ дӕр адӕймаджы [Йесойы] фӕрцы ӕгас кӕнынц» (1 Коринфӕгтӕм 15:21).

Чырыстийы нывонд стыр лӕвар у, уымӕн ӕмӕ нын ӕй радта, ӕгас Дун-дунейы ӕмбал кӕмӕн нӕй, уыцы Хуыцау. Ӕмӕ уыцы лӕвар скӕнынмӕ Хуыцауы цы уарзондзинад сразӕнгард кодта, уымӕй стырдӕр уарзондзинадӕн скӕнӕн дӕр нӕй. Йегъовӕ Хуыцау мах тыххӕй цы сарӕзта, уый ничи. Чырыстийы нывонд у, ӕппӕты тынгдӕр нӕ чи хъӕуы, ахӕм лӕвар – уый нӕ сӕрибар кӕны тӕригъӕд ӕмӕ мӕлӕтӕй. Уыцы нывонд ахӕм зынаргъ у, ӕмӕ йемӕ иу лӕварӕн дӕр абарӕн нӕй.