Абони беретӕ ковӕн бунӕттӕмӕ нӕбал цӕунцӕ, уомӕн ӕма си уодӕнцойнӕ нӕ ерунцӕ, удта син сӕ царди ӕхсидзгӕдӕр фарстатӕбӕл дзуапп неке дӕттуй. Мадта уӕд Йегови Ӕвдесӕнти ӕмбурдтӕмӕ ба цӕун цӕмӕн гъӕуй?

Уодзӕнӕ, иннети ка уарзуй, уӕхӕн хӕларзӕрдӕ адӕми астӕу. Фиццаг ӕноси киристӕнттӕ дӕр еумӕ ӕмбурд кодтонцӕ, цӕмӕй Хуцауи Дзурд ахур кодтайуонцӕ ӕма кӕрӕдзей нифсбӕл нифс ӕфтудтайуонцӕ (Дзиуиттӕгтӕмӕ 10:24, 25). Уонӕн сӕ астӕу адтӕй ӕцӕг уарзондзийнадӕ ӕма лимӕндзийнадӕ (2 Фессалоникӕгтӕмӕ 1:3; 3 Иоанни 14). Абони мах дӕр кӕрӕдзей хӕццӕ уотӕ ан, ӕма нин е цийнӕдзийнадӕ хӕссуй.

Ахур кӕндзӕнӕ Библий унаффитӕмӕ гӕсгӕ цӕрун. Раги дзамани Хуцауи лӕггадгӕнгутӕ куд кодтонцӕ, уотӕ абони мах дӕр нӕлгоймӕгтӕ, силгоймӕгтӕ ӕма сувӕллӕнттӕ еумӕ ӕрӕмбурд уӕн, ӕма нин хестӕр нӕлгоймӕгтӕ фӕййамонунцӕ, нӕ бон куд ӕй Библий унаффитӕмӕ гӕсгӕ цӕрун, уой (Дуккаг закъон 31:12; Нееми 8:8). Ести фарстабӕл ку фӕдздзубанди кӕнӕн, уӕд алкӕмӕн дӕр фӕууй барӕ ӕ гъуди зӕгъун. Уой фӕрци нин фӕууй фадуат, цӕмӕй нӕ нифси туххӕй «ӕргом... дзорӕн» (Дзиуиттӕгтӕмӕ 10:23).

Уоми де ’ууӕндундзийнадӕ федар кӕндзӕнӕ. Апостол Павел фиццаг ӕноси ӕмбурдтӕй еуемӕ ниффинста: «Хъӕбӕр бӕллун уӕ фӕууинунмӕ... цӕмӕй кӕрӕдзей ӕууӕндундзийнадӕй бафедар уӕн – ӕз сумах ӕууӕндундзийнадӕй, сумах ба мӕн ӕууӕндундзийнадӕй» (Ромӕгтӕмӕ 1:11, 12). Мах дӕр ӕмбурдти нӕ хуӕртӕ ӕма не ’нсувӕрти хӕццӕ ке фембӕлӕн, уой фӕрци не ’ууӕндундзийнадӕ бафедар уй, ӕма нӕ никки хъӕбӕрдӕр фӕффӕндуй нӕ цард Библий унаффитӕмӕ гӕсгӕ аразун.

Зӕрдиагӕй дӕ ӕмбурдмӕ хонӕн, цӕмӕй си куд фӕууй, уой дӕхе цӕститӕй фӕууинай. Уоми дӕбӕл зӕрдиагӕй бацийнӕ кӕндзӕнцӕ. Ӕмбурдмӕ алке бон дӕр ӕй ӕрбацӕун. Ӕхца федун си нӕ гъӕуй.

• Йегови Ӕвдесӕнтӕ ӕмбурдтӕ ке уадзунцӕ, уомӕй ке фӕнзунцӕ?

• Ӕмбурдтӕмӕ ку цӕуай, уӕд дин е ци пайда ӕрхӕсдзӕй?