КӔД дӕуӕн дӕр, берӕ ке уарзтай, уӕхӕн адӕймаг рамардӕй, уӕд ӕй, ӕвӕдзи, зонис, уӕхӕн уавӕри куд фӕууй, уой. Адӕймаг фӕсмон кӕнун райдайуй ӕма ӕхемӕ еунӕг фӕккӕсуй, удта, ӕ бон гъуддаг исраст кӕнун ке нӕй, уобӕл фӕммаст кӕнуй, фӕммӕстгун кӕнуй, удта ма ӕхе дӕр фӕффудгин кӕнуй ӕма тӕрсун райдайуй. Ка ’й зонуй ма уотӕ дӕр сагъӕс кодтай, гъе нур ма мӕ цард ци ӕй, зӕгъгӕ.

Маст ке кӕнис, уоми дессагӕй неци ес. Е уобӕл дзорӕг ӕй, ӕма адӕймаги берӕ уарзтай. Фал дин цума дӕ рист фӕссабурдӕр кӕнунмӕ ци банхус кӕндзӕй?

Кӕд дӕумӕ дӕр уотӕ кӕсуй, ӕма дӕ рист некӕд ӕрсабур уодзӕй, уӕд дӕ нифс ма басӕттӕд. Ка ’й зонуй дин дӕлдӕр финст унаффитӕ банхус кӕндзӕнцӕ.

ГЪӔУАМА РӔСТӔГ РАЦӔУА, ЦӔМӔЙ ДӔ ЗӔРДИ РИСТ ӔРСАБУР УА

Адӕн ӕмхузӕн нӕ фӕммаст кӕнунцӕ ӕма син е ӕмхузӕн рӕстӕг нӕ рахӕссуй. Фал, адӕймаг кӕугӕ ку фӕккӕнуй, уӕд ин фенцондӕр уй. Ванессӕ, раздӕр ке кой кодтан, е зӕгъуй: «Ӕрмӕстдӕр кӕугӕ кодтон, уомӕн ӕма уотемӕй мӕ бон адтӕй мӕ рист фӕмминкъийдӕр кӕнун». Ӕ хуӕрӕ ӕвваст кӕмӕн ӕрбамардӕй, еци силгоймаг Софийӕ ба зӕгъуй: «Ци ’рцудӕй, уобӕл сагъӕс кӕнун мин хъӕбӕр зин адтӕй. Раст цума мӕ гъӕдгин райхалинӕ ӕма ’й кӕдзос кӕнинӕ, уотӕ. Еци рист зин исфӕразӕн ӕй, фал уой фӕрци гъӕдгин тагъддӕр дзӕбӕх кӕнуй».

 ДӔ САГЪӔСТӔ ӔМА ӔНКЪАРӔНТӔ ЕСКӔМӔН РАДЗОРӔ

Рӕстӕгӕй-рӕстӕгмӕ, гӕнӕн ес, ӕма дӕ фӕндӕуа, цӕмӕй дӕ маке хъор кӕна, ӕма уоми лӕгъузӕй неци ес. Зианбӕл маст кӕнун рабарӕн ес, дӕ рагъи ке хӕссай, уӕхӕн уаргъи хӕццӕ. Ӕ фидӕ кӕмӕн рамардӕй, еу уӕхӕн 17-анздзуд биццеу Джаред радзурдта: «Иннетӕн ме ’нкъарӕнтӕ дзурдтон. Ӕма мӕмӕ кӕд уотӕ кӕсидӕ, ӕма син мӕ зӕрди рист балӕдӕрун кӕнун мӕ бон нӕй, уӕддӕр мин фенцондӕр уидӕ». Фиццаг статьяй ке кой кодтан, еци силгоймаг Джанис ба загъта: «Иннети хӕццӕ ке дзурдтон, е мин устур уодӕнцойнӕ хаста. Ӕма мӕ ке лӕдӕрдтӕнцӕ, уой фӕрци мӕхемӕ еунӕг нӕ кастӕн».

ИННЕТИ ӔНХУСБӔЛ АРАЗИ КӔНӔ

Еу дохтир загъта: «Зиан кӕбӕл ӕрцудӕй, еци адӕймаг фиццаг бӕнтти е ’мбӕлтти ӕма ӕ хӕстӕгути ӕнхусбӕл ку исарази уй, уӕд ин ӕнцондӕр фӕууй ӕ маст исфӕразун». Де ’мбӕлттӕн зӕгъисӕ, сӕ бон дин банхус кӕнун цӕмӕй ӕй, уой. Ӕвӕдзи сӕ фӕндуй, цӕмӕй дин банхус кӕнонцӕ, фал куд, уой ба нӕ зонунцӕ (Ӕмбесӕндтӕ 17:17).

ХУЦАУМӔ БАХӔСТӔГ УО

Тинӕ загъта: «Мӕ лӕг ӕвваст раккӕй ку фӕссӕйгӕ ’й ӕма ку фӕззиан ӕй, уӕд мӕ фарсмӕ нӕбал адтӕй, мӕ сагъӕстӕ ӕма мӕ тухститӕ кӕмӕн дзоринӕ, еци адӕймаг, ӕма сӕ ӕз дӕр Хуцауӕн дзурдтон. Алли бон дӕр имӕ кувтон, цӕмӕй мин еци бон цӕрунмӕ хъауритӕ равардтайдӕ. Ӕма мин алкӕддӕр ци си коринӕ, уомӕй фулдӕр раттидӕ». Таршӕбӕл 22 анзи ку цудӕй, уӕд ӕ мадӕ фӕззиан ӕй. Е загъта: «Алли бон дӕр Библи ке кастӕн, е мин уодӕнцойнӕ хаста. Уой фӕрци сагъӕс кодтон, ци мӕ федар кодта, уобӕл».

ДӔ ЦӔСТИТӔБӔЛ УАЙУН КӔНӔ, КУД РАЙГАС УОДЗӔЙ, УОЙ

Тинӕ ма радзурдта: «Райгасдзийнади нифс мин фиццӕгти уодӕнцойнӕ нӕ хаста, уомӕн ӕма мӕ сувӕллӕнтти фидӕ, мӕн ба сӕрихецау гъе уӕд гъудӕй. Фал нур цуппар анзи рацудӕй ӕма мӕ еци нифс хъӕбӕр федар кӕнуй. Е мин ӕй, нихъулгӕ ка кӕнуй, еци адӕймагӕн ке ниггӕлдзунцӕ, уӕхӕн бӕттӕни хузӕн. Мӕ цӕститӕбӕл уайун кӕнун, нӕуӕгӕй бабӕй ӕй куд фӕууиндзӕн, ӕма мин е устур цийни хуасӕ ӕй!»

Ка ’й зонуй, дӕ зӕрди рист уайтагъд не ’рсабур уодзӕй. Фал ди Ванесси цӕветтон нифс бауадздзӕй. Е зӕгъуй: «Адӕймагмӕ уотӕ фӕккӕсуй, ӕма ӕ рист некӕд ӕрсабур уодзӕй, фал рӕстӕг рацӕуй ӕма ин фенцондӕр уй».

Дӕ гъудий дарӕ, кӕд дин ӕнӕ еци адӕймагӕй зин ӕй, уӕддӕр дӕ идарддӕр цӕрун гъӕуй. Хуцауи фӕлмӕн уарзти фӕрци дӕ бон уодзӕй идарддӕр дӕр де ’мбӕлтти хӕццӕ фӕрнӕй цӕрун ӕма дӕмӕ дӕ цард дзӕгъӕли нӕ кӕсдзӕй. Тагъд рӕстӕги Хуцау, ка рамардӕй, уони райгас кӕндзӕй. Фӕндуй ӕй, цӕмӕй бабӕй, берӕ ке уарзис, еци адӕймаги дӕ хъури ракӕнай. Уӕд дӕ зӕрди рист ӕносмӕ фесӕфдзӕй!