АДӔЙМАГБӔЛ ӕ цардӕмбал гадзирахаттӕй ку рацӕуй, уӕд ин е устур маст ӕрхӕссуй. Фал кӕмӕндӕр ӕ бон исуй ӕ цардӕмбалӕн ниххатир кӕнун ӕма идарддӕр ӕ хӕццӕ, раздӕр куд цардӕнцӕ, уотӕ цӕрун *. Лӕг ӕма уосӕ фӕнди еумӕ байзайонцӕ, фӕнди нӕ, гадзирахаттӕй кӕбӕл рацудӕнцӕ, е хъӕбӕр устур зӕрдирист бавзаруй. Уӕхӕн хабар кӕбӕл ӕрцудӕй, уӕхӕн адӕймагӕн ци банхус кӕндзӕй?

Гадзирахаттӕй кӕбӕл рацӕунцӕ, етӕ устур маст бавзарунцӕ. Фал уӕддӕр беретӕ уодӕнцойнӕ иссерунцӕ Библий. Етӕ ’й базудтонцӕ, Хуцау син сӕ цӕстисугтӕ ке уинуй ӕма син сӕ рист ке лӕдӕруй (Малахи 2:13–16).

«Тухст сагъӕстӕ мин ӕнцойнӕ ку нӕбал лӕвардтонцӕ, уӕд мин дӕ зӕрдӕфедаргӕнӕн дзурдтӕ рӕвдудтонцӕ мӕ уод» (Псалом 94:19).

Билл загъта: «Аци стих кӕсгӕй мӕ цӕститӕбӕл уадӕй, цума мӕ Йеговӕ фӕлмӕнзӕрдӕ фиди хузӕн сабур кӕнуй».

«Еузӕрдон дӕбӕл ка ӕй, уонӕбӕл ду дӕр уодзӕнӕ еузӕрдон» (Псалом 18:25).

Ӕ цардӕмбал мӕйгӕйттӕ ке сайтта, еци силгоймаг Кармен загъта: «Мӕ цардӕмбал еузӕрдон н’ адтӕй. Фал Йеговӕ ба ӕй еузӕрдон ӕма ибӕл мӕ бон ӕй ӕууӕндун. Е мӕ некӕд ниууаддзӕй».

«Мӕтӕ мацӕбӕл кӕнтӕ, фал алли уавӕри дӕр Хуцаумӕ коветӕ, лигъстӕ ин кӕнтӕ... ӕма си уотемӕй коретӕ, ци уӕ гъӕуй, уой. Ӕма уин Хуцауи фарнӕ, зунд кӕбӕл нӕ хъӕртуй, еци фарнӕ... багъӕуай кӕндзӕй уӕ зӕрдитӕ» (Филиппӕгтӕмӕ 4:6, 7).

Еу силгоймаг Сашӕ загъта: «Аци дзурдтӕ еу ӕма дууӕ хатти нӕ бакастӕн. Хуцаумӕ куд фулдӕр кувтон, уотӕ мӕ зӕрди фарнӕ дӕр фулдӕр кодта».

Ке дзурдтӕ кастан, уони еуӕй-еухатт сӕ къохтӕ ӕруадзунмӕ берӕ нӕбал гъудӕй. Фал сӕ зӕрдӕ Йеговӕбӕл дардтонцӕ ӕма Библи ке кастанцӕ, е син хъауритӕ лӕвардта. Билл загъта: «Хуцауи фӕрци мин цард нӕуӕгӕй адӕ кӕнун райдӕдта, кӕд мӕбӕл уӕхӕн хабар ӕрцудӕй, уӕддӕр. Кӕд „талингӕ коми“ цудтӕн, уӕддӕр Хуцау мӕ хӕццӕ адтӕй» (Псалом 23:4).