Kʼïy mul, le Biblia nuʼij chë Jesús ya riʼ «Rukʼajol Dios» (Juan 1:49). Ri tzij «Rukʼajol Dios» nukʼüt chqawäch chë yë Dios xbʼanö jontir chqä chë rkʼë ryä xtzʼuktäj wä pä ri kʼaslemal, reʼ nukʼüt chqawäch chë yë ryä xbʼanö Jesús chqä (Salmo 36:9; Apocalipsis 4:11). Dios jun wä rubʼanik xok tataʼaj, ma achiʼel ta rubʼanik yeʼok tataʼaj ri winäq. Ya riʼ nuʼij le Biblia.

 Le Biblia chqä nuʼij chë ri ángeles ye «ralkʼwal ri kʼaslïk Dios» (Job 1:6). Y nuʼij chë ri naʼäy achï, Adán, xok chqä «rukʼajol Dios» (Lucas 3:38). Ye kʼa le Biblia nuʼij chë Jesús ya riʼ ri más rejqalen xuʼän Dios, rma yë ryä naʼäy xuʼän chqä majun ta xtoʼö rchë taq xuʼän.

•  Taq Jesús xaläx chwäch le Ruwachʼlew, ¿xjeʼ yän komä chlaʼ chkaj?

•  ¿Achkë wä rusamaj Jesús taq majanä tpë chwäch le Ruwachʼlew?

 Jaʼ, xjeʼ yän. Taq Jesús majanä taläx chwäch le Ruwachʼlew, jun espíritu wä. Kan yë ryä xbʼin chë chlaʼ chkaj petenäq wä (Juan 6:38; 8:23).

 Jesús ya riʼ ri naʼäy xuʼän Dios. Rma riʼ le Biblia nuʼij ya reʼ chrij Jesús:

•   Yë ryä «ri naʼäy xbʼan chwäch jontir ri kʼo» (Colosenses 1:15).

•   «Ri naʼäy xuʼän Dios chwäch jontir ri kʼo» (Apocalipsis 3:14).

 Chrij Jesús xtzʼaqät ri profecía ri ntzjon chrij jun ri kan ojer chik kʼo pä (Miqueas 5:2; Mateo 2:4-6).

 Ryä kʼo wä jun nimaläj samaj pa ruqʼaʼ. Chrij reʼ xtzjon wä taq xuʼij reʼ che rä Rutataʼ: «Tat, tayaʼ qʼij chwä rchë njeʼ nqʼij [...] kan achiʼel ri nqʼij xjeʼ taq yïn kʼo wä awkʼë taq majajün ta le Ruwachʼlew» (Juan 17:5).

 Xtoʼ Rutataʼ rchë xuʼän ronojel ri kʼo. Jesús junan xsamäj rkʼë Dios kan achiʼel jun samajel (Proverbios 8:30). Le Biblia nuʼij reʼ chrij Jesús: «Rma rkʼë rutoʼik ryä xbʼan jontir ri ye kʼo chlaʼ chkaj chqä chwäch le Ruwachʼlew» (Colosenses 1:16).

 Jesús xtoʼ Dios rchë xuʼän jontir ri kʼo, achiʼel ri ángeles, ri kaj chqä le Ruwachʼlew (Apocalipsis 5:11). Ri rubʼanik xesamäj Jehová y Jesús ütz nqajnamaj rkʼë rusamaj jun arquitecto chqä jun albañil. Ri arquitecto nutzʼët achkë rubʼanik nbʼan che rä ri jay y ri albañil nuʼän qʼanäj ri jay.

 Yë wä ryä ri Chʼaʼäl. Taq Jesús majanä taläx chwäch le Ruwachʼlew, le Biblia nuʼij «ri Chʼaʼäl» che rä (Juan 1:1). Ya reʼ ntel chë tzij chë Dios xksaj Rukʼajol rchë xqʼaxaj rutzij chkiwäch ri nkʼaj chik ángeles.

 Achiʼel ta yë Jesús xqʼaxan ruchʼaʼäl Dios chkiwäch ri winäq chqä. Rkʼë jbʼaʼ Jehová yë ri Chʼaʼäl xksaj, ntel chë tzij Jesús, rchë xuʼij pä chkë Adán y Eva taq ye kʼo wä chwäch ri jardín de Edén achkë kʼo chë nkiʼän (Génesis 2:16, 17). Rkʼë jbʼaʼ Jesús ya riʼ chqä ri ángel ri xkʼwan kibʼey ri israelitas pa tzʼiran ilew chqä chë yë ri rutzij ryä ri kʼo chë nkinmaj (Éxodo 23:20-23). a