Ndalama zoyendeshela ntchito yasu zufumila kuli sewo a Mboni za Yehova ndipo tupeleka mwakufuna kwasu. a Tuyendesha lini mbale ya vopeleka pa misonkhano yasu koma soti tupeleka lini chakhumi. M’malo mwake, pamisonkhano yasu poikiwa mabokosi avopeleka kuti wamene ofuna kupeleka aponye mwane umo.

 Ndalama zatupeza zukwanisha kuyendesha ntchito yasu chifukwa tiliye abusa amene olipiliwa. (2 Akorinto 9:7) Chifukwa chiyakine ni chakuti, tulipiliwa lini kuti tikolalikila ng’anda na ng’anda, koma soti malo ŵasu olambilila omangiwa lini mu njila yakuti awononge ndalama zinyinji. Tuyendeshalini mbale olo kulipilisha pa misonkhano yasu, komasoti tulipilishalini ubatizo malilo maukwati olo misonkhano iyakine. Kuti tifwane ndalama tupikalini vitumbuwa, mabanzi, kugulisa walwa, mafilimu, olo vochitika viyakine volingana na vamene ivi ndipo tusengalini thandizo iliyonse. Ŵanthu ochita vopeleka olengezewalini kuli ŵanthu nacholinga chakuti aziŵike. (Mateyu 6:2-4) Mawebisaiti na vofalisa vasu ni malolini osengela ndalama olo ochitila bizinesi.

 Mpingo uliwose wa Mboni za Yehova upeleka lipoti ya ndalama mwezi uliwonse pa misonkhano yawo, zamene ŵanthu onse onkhala omasuka kupeleka mwakufuna kwawo. Malipoti ŵa akauti a mpingo uliwonse oŵelengewa nthawe na nthawe kuti asimikijile kuti ndalama zupelekewa zusamaliliwa luweme.—2 Akorinto 8:20, 21.

•   Mabokosi a vopeleka: Mungachite vopeleka va ndalama olo cheke m’mabokosi a vopeleka ku Ng’anda za Ufumu, ku Ng’anda za Misonkhano olo ku malo ayakine kwatuchitila misonkhano yasu.

•   Vopeleka vapaintaneti: Mvyalo vinyinji, mungakatishile ntchito pedji ililembe kuti “Donate to Jehovah’s Witnesses” kupeleka ndalama pokatishila ntchito ma credit cards, debit cards, bank transfers, komasoti njila ziyakine za makono. b Mboni ziyakine zusankha “kupatula kanthu kayakine” mwezi uliwonse mwa kupanga vopeleka moweleja-weleja pokatishila ntchito imozi mwanjila zamene izi.—1 Akorinto 16:2.

•   Kukonzekela pakali nthawe: Njila ziyakine zopelekela ndalama zufuna kukonzekela pakali nthawe. Kukonzekela kwamene uku kungakupaseni mwayi woyaŵa vinthu vamuli navo mukezemwalila. Ŵanthu anyinji apindula mwa kuziŵa luweme mphaso za chifundo zangapasiwe munthu akali moyo kapena zingazayamba kukata ntchito akamwalila. Pulizi konshani ofesi ya nthanbi ya Mboni za Yehova kuti muziŵe vinyinji keno mufuna kupeleka chopeleka chamene icho:

  •   ma akaunti yaku banki

  •   inshuwalansi na ndalama za penshoni

  •   ma ng’anda na vinthu viyakine

  •   ndalama zoyangijila olo ma bonasi

  •   wilo ya chuma na galantiya

 Kuti muziŵe vinyinji vokhuza njila zopelekela zamene zilipo mu dela yanu, onani pedji yakuti “Donate to Jehovah’s Witnesses.”