Suzu tɛnlabelɛ ɛhye anwo: Karen hɔle ɛkponledolɛ bie abo la, yeandwu mitini bulu yɛɛ ɔdele ɛnelɛ bie wɔ ɔ nzi a.

Karen hakyile ɔ nwo la ɔnwunle ɔ gɔnwo Jessica kɛ ɔlɛ nza adoba nwiɔ mɔɔ bɛbuke zo. Ɔze ye wienyi kɛ ɔle nza mɔɔ bo. Jessica dendenle nza ne ko wɔ Karen anyunlu na ɔhanle kɛ, “Ɛtɛde kakula mɔɔ ɛngulo kɛ ɛdie ɛ nye ekyi ɔ?”

Karen ɛngulo kɛ ɔbalie, noko Jessica le ɔ gɔnwo. Yɛɛ Karen ɛngulo kɛ ɔ gɔnwo ne te nganeɛ kɛ ɔ nye ɛtɛbukele. Tɛ yemɔ angome, Jessica le kakula kpalɛ. Yemɔti saa ɔlɛno nza a, ɔkile kɛ ɔnle debie ɛtane. Karen ka kile ɔ nwo kɛ, ‘Ɔle nza ala, ɔnle kɛ nyiletane ɛnlonlɛ la.’

Saa ɛdawɔ a ɛle Karen a, anrɛɛ boni a ɛbayɛ a?

Amaa wɔazi kpɔkɛ kpalɛ wɔ tɛnlabelɛ mɔɔ le kɛ ɛhye anu la, ɔwɔ kɛ ɛnwu kɛzi ɛde la. Kɛzi ɛde la le nganeɛdelɛ bie mɔɔ wɔ wɔ nu mɔɔ maa wɔ subane nee mɔɔ ɛdie ɛdi la da ali a. Saa ɛnwu ninyɛne ɛhye mɔ a, ɔmmaa awie ɛnzi kpɔkɛ ɛmmaa wɔ, emomu ɛdawɔ mumua ne ɛsi ɛ ti anwo kpɔkɛ.—1 Kɔlentema 9:26, 27.

Kɛ ɔkɛyɛ na wɔanyia anwosesebɛ ɛhye ɛ? Kpuya ne mɔɔ doa zo mɔɔ ɛbaye ɔ nloa la baboa wɔ.

Saa ɛnwu mɔɔ ɛkola ɛyɛ nee wɔ subane mgbalɛ ne a, yemɔ bamaa wɔava anwodozo wɔadu ɛ nwo.

BAEBOLO NU NEAZO: Ɛzoanvolɛ Pɔɔlo hɛlɛle kɛ: “Saa me nloa yɛɛ ɛtɛtele bɔbɔ a, tɛ nwoma nu ɔ.” (2 Kɔlentema 11:6) Kɛmɔ ɛnee Pɔɔlo te Ngɛlɛlera ne abo kpalɛ la ati, ɔgyinlanle kpundii wɔ mekɛ mɔɔ awie mɔ dwazole tiale ye la. Yeammaa adwenletane mɔɔ bɛlɛ la anzɛkye anwodozo mɔɔ ɛnee ɔlɛ la.—2 Kɔlentema 10:10; 11:5.

NEƐNLEA Ɛ NWO NU: Kɛlɛ ɛlolɛ ahyɛlɛdeɛ anzɛɛ ninyɛne mɔɔ ɛkola ye yɛ la.

Akee kɛlɛ subane titili mɔɔ ɛlɛ ye la. (Kɛ neazo la, ɛdwenle menli nwo ɔ? ɛle atiakunlukɛnlɛma ɔ? bɛkola bɛfa bɛ nwo bɛto ɛ nwo zo ɔ? ɛdi mekɛ zo ɔ?)

Saa ɛfa wɔ adwenle ɛsie mɔɔ ɛngola ɛnyɛ la azo a, kɛzi ɛde la bahola ahakyi na wɔ sinlidɔlɛ ne bavo ɛ nwo zo.

BAEBOLO NU NEAZO: Ɛnee Pɔɔlo ze ye sinlidɔlɛ ne mɔ. Ɔhɛlɛle kɛ: “Wɔ me nuhua a ɛnee me nye die Nyamenle mɛla ne anwo kpalɛ. Na menwu mɛla fofolɛ bie wɔ me sonlabaka ye nvɛyeba ne mɔ amuala anu. Mɛla ɛhye ko tia mɔɔ me adwenle kulo kɛ ɔyɛ la, na ɔmaa meyɛ kanranli memaa ɛtane mɛla ne mɔɔ ɛlɛdi gyima wɔ me sonlabaka ne anu la.”—Wulomuma 7:22, 23.

NEƐNLEA Ɛ NWO NU: Wɔ sinlidɔlɛ boni a ɔwɔ kɛ ɛbɔ mɔdenle ɛdi zo konim a?

Asoo ɛbavo kale na wɔaha wɔahile delava ne kɛ ɔbɔ mgbɔlɔka kɔkpula kɛ ye patulo ne bawie ɔ? Nrɛlɛbɛ ɛnle nu yɛɛ ɔle kakɛ ɛbɔlɛ mgbane!

Ɛzukoalɛdeɛ ne a le boni? Bodane kile wɔ adenle wɔ ɛbɛlabɔlɛ nu yɛɛ ɔmmaa ɛmbɔ mgbɔlɔka. Ɛlɛ bodane gyi ɛ nye zo a ɔmaa ɛyɛ ngyehyɛleɛ mɔɔ baboa wɔ yeamaa wɔadwu nwo a.

BAEBOLO NU NEAZO: Pɔɔlo hɛlɛle kɛ: “Me ɛnriandilɛ ne gyi kpɔkɛ zo.” (1 Kɔlentema 9:26) Pɔɔlo ammaa ninyɛne andwehwe ye wɔ ɛbɛlabɔlɛ nu, ɔvale bodane ɔziele ɔ nye zo na ɔbɔle mɔdenle ɔdwule nwo.—Felepaema 3:12-14.

NEƐNLEA Ɛ NWO NU: Kɛlɛ bodane nsa mɔɔ ɛkulo kɛ ɛdwu nwo wɔ ɛvolɛ bieko la wɔ ɛke.

Ɛnze mɔɔ ɛdie ɛdi la a, ɛnrɛhola ɛnrɛzi kpɔkɛ kpalɛ. Ɛbayɛ kɛ akakyibɛdanlɛ la, ɛbahakyi wɔ subane amaa ɛ nee ɛ gɔnwo mɔ ayɛ ko—debie mɔɔ kile kɛ amgba ɛnze kɛzi ɛde la.

Mɔɔ le ngakyile la, saa yɛ nyɛleɛ gyi mɔɔ yɛdie yɛdi la azo a, ɔnrɛmaa yɛnrɛhakyi kɛzi yɛde la—ɔnva nwo kɛzi mɔɔ menli bayɛ yɛ biala la.

BAEBOLO NU NEAZO: Ɔbayɛ kɛ ɛnee ngapezonli Daneɛle le kakula la yɛɛ ɔyɛle “ye adwenle” kɛ ɔbali Nyamenle mɛla ne mɔ azo a, ɔnva nwo kɛ ɛnee yevi ye abusua ne anwo la. (Daneɛle 1:8) Ɔlua ɛhye ati, ɔlile nɔhalɛ ɔmaanle ɔ nwo. Daneɛle bɔle ye ɛbɛla maanle ɔ nee mɔɔ ɔdie ɔdi la yɛle ko.

NEƐNLEA Ɛ NWO NU: Boni a ɛdie ɛdi a? Kɛ neazo la: Asoo ɛdie Nyamenle ɛdi? Saa ɔle zɔ a, nzɔne ati ɔ? Daselɛ boni a maa ɛdie ɛdi kɛ ɔwɔ ɛkɛ a?

Asoo ɛdie ɛdi kɛ wɔ kpalɛyɛlɛ ti a Nyamenle ɛva ɛbɛlabɔlɛ nwo ngyinlazo ɛmaa la ɔ? Saa ɔle zɔ a, nzɔne ati ɔ?

Boni a ɛbahulo kɛ ɛbayɛ a—nya mɔɔ anwoma kola bɔ ye kɔ ɛleka biala mɔɔ ɔkulo la anzɛɛ baka mɔɔ kola gyinla ahumu kpole nloa la? Nwu kɛzi ɛde la kpalɛ, na ɛbayɛ kɛ baka zɔhane la. Ɛhye baboa wɔ yeamaa wɔaye kpuya ne mɔɔ se, Kɛzi mede ɛ? la anloa.