Kɛ Ɔkɛyɛ Na Meayɛ Gyihova Alasevolɛ Ne Mɔ Anu Ko Ɛ?

BƆ

Gyisɛse hanle ninyɛne mɔɔ ɛhyia nwo na wɔayɛ Gyihova Alasevolɛ ne mɔ anu ko la anwo edwɛkɛ wɔ Mateyu 28:19, 20. Zɔhane edwɛkɛ ne maa yɛnwu mɔɔ ɔwɔ kɛ awie yɛ amaa yearayɛ Kelaese ɛdoavolɛ la, ninyɛne mɔɔ boka nwo la a le kɛ ɛbaha anzɛɛ ɛbali Gyihova anwo daselɛ.

Agyakɛdulɛ 1: Sukoa mɔɔ Baebolo ne kilehile la. Gyisɛse maanle ye ɛdoavolɛ ne mɔ mɛla kɛ “bɛmaa menli ɛrayɛ me ɛdoavolɛma. . . , bɛhilehile bɛ.” (Mateyu 28:19, 20) Edwɛkɛ mɔɔ bɛhile ɔ bo “ɛdoavolɛma” la kile “sukoavo.” Baebolo ne, titili Kelaese ngilehilelɛ ne mɔɔ wɔ nu la lɛ ninyɛne bie mɔ mɔɔ ɛhyia nwo amaa ɛ nye alie na wɔanyia asetɛnla kpalɛ la. (2 Temɔte 3:16, 17) Yɛ nye balie nwo kɛ yɛbaboa wɔ yɛamaa wɔazukoa mɔɔ Baebolo ne kilehile la ɔlua yɛ Baebolo ɛzukoalɛ nwo ngyehyɛleɛ mɔɔ bɛnlie ezukoa la azo.—Mateyu 10:7, 8; 1 Tɛsalonaekama 2:13.

Agyakɛdulɛ 2: Fa mɔɔ ɛlɛsukoa la yɛ gyima. Gyisɛse hanle kɛ menli mɔɔ sukoa la ɔwɔ kɛ ‘di debie biala mɔɔ yeha yehile bɛ la azo.’ (Mateyu 28:20) Ɛhye kile kɛ ɔnle kɛ wɔ Baebolo ɛzukoalɛ ne yɛ mɔɔ ɛfa wɔakpondɛ nwunu ala—ɔwɔ kɛ ɛyɛ nzenzaleɛ wɔ kɛzi ɛdwenle nee wɔ nyɛleɛ nu. (Gyima ne 10:42; Ɛfɛsɛsema 4:22-29; Hibuluma 10:24, 25) Menli mɔɔ di debie biala mɔɔ Gyisɛse ɛha la azo la si kpɔkɛ di ɔ nzi na bɛtu bɛ nwo bɛmaa Gyihova Nyamenle.—Mateyu 16:24.

Agyakɛdulɛ 3: Maa bɛzɔne wɔ. (Mateyu 28:19) Wɔ Baebolo ne anu, bɛfa ɛzɔnenlɛ bɛto ɛzielɛ nwo. (Fa toto Wulomuma 6:2-4 anwo.) Ɔkile kɛ ɛsie ɛbɛlabɔlɛ dɛba ne na wɔabɔ fofolɛ bo. Wɔ ɛzɔnenlɛ ne le bagua nu debie mɔɔ kile kɛ wɔyɛ ninyɛne nwiɔ mɔɔ limoa mɔɔ Gyisɛse hanle nwolɛ edwɛkɛ la na ɛlɛsɛlɛ Nyamenle kɛ ɔmaa wɔ adwenle mɔɔ nuhua te la.—Hibuluma 9:14; 1 Pita 3:21.

Kɛ ɔkɛyɛ na meanwu ye kɛ meziezie me nwo memaa ɛzɔnenlɛ ɛ?

Ɛ nee asafo nu mgbanyima ne mɔ ɛdendɛ. Bɛ nee wɔ bali adwelie na banlea kɛ ɛte mɔɔ zɔhane ninyɛne ne mɔ kile la abo na ɛlɛfa mɔɔ wɔzukoa la wɔali gyima yɛɛ wɔyila ɛ nwo zo wɔmaa Nyamenle.—Gyima ne 20:28; 1 Pita 5:1-3.

Asoo ɔwɔ kɛ ngakula mɔɔ bɛ awovolɛ le Alasevolɛ la noko yɛ ninyɛne ɛhye mɔ?

Ɛhɛe. Yɛkɔ zo yɛfa ‘Gyihova folɛdulɛ nee ye ngilehilelɛ yɛtete’ yɛ mra ne mɔ kɛ mɔɔ Baebolo ne ka la. (Ɛfɛsɛsema 6:4) Noko akee, wɔ mekɛ mɔɔ bɛlɛnyi la ɔwɔ kɛ bɛsi bɛ ti anwo kpɔkɛ kɛ bɛbazukoa, bɛalie bado nu na bɛava mɔɔ Baebolo ne kilehile la bɛayɛ gyima amaa bɛahola bɛafɛta bɛamaa ɛzɔnenlɛ. (Wulomuma 12:2) Awieleɛ bɔkɔɔ ne, ɔwɔ kɛ yɛ nuhua ko biala si ɔdaye mumua ne ye ɛzonlenlɛ nwo kpɔkɛ.—Wulomuma 14:12; Galeehyeama 6:5.