Bɛwole me wɔ suakpole Calgary mɔɔ wɔ Alberta, Canada la azo. Me awovolɛ bɔle ewole na me nee me mame hɔdɛnlanle ye awovolɛ sua nu wɔ mekɛ mɔɔ ɛnee mele kakula ekyi kpalɛ la. Ɛnee me nenyia nee me nana kulo me nee me mame edwɛkɛ na ɛnee me nye die kpalɛ. Metɛkakye kɛzi ɛnee me nye die wɔ me ngakula nu la.

 Mekɛ mɔɔ menyianle ɛvolɛ nsuu la, ɛbɛlabɔlɛ ne yɛle ɛnwonle maanle me wɔ mekɛ mɔɔ me mame ziale gyale me papa na yɛdule yɛhɔle St. Louis, Missouri, mɔɔ wɔ United States la. Yeangyɛ, menwunle kɛ me papa ati yɛ se kpalɛ. Kɛ neazo la, mekɛ mɔɔ limoa mɔɔ mengɔle sukulu fofolɛ nu la, ngakula ne mɔ bɔle me apo, me papa nwunle kɛ me nee bɛ ango. Ɔvale ɛya kpole na ɔbɔle me kpole ɔdɛlale sukulu ngakula ne mɔ ɛdeɛ ne! Menvale ɛhye menziele me ti anu kpalɛ ɔti mɔɔ menlile ɛvolɛ nsuu la membɔle ɔ bo kɛ meko.

 Me papa ahonle kpole ne hanle me mame ɛya, ɔti ɛnee bɛta bɛdi butule. Menyianle ɛvolɛ 11 la, membɔle ɔ bo kɛ meno nyiletane nee nza dɔɔnwo. Me nye yɛle se kpalɛ na ɛnee meta meko wɔ gua zo. Mekawie sukunwiɔ la, ɛnee me basabasayɛlɛ ne ɛyɛ kpole.

 Mɔɔ menyianle ɛvolɛ 18 la, mengɔmbokale U.S. Marine Corps (sogyama) ne anwo. Ndetelɛ mɔɔ menyianle ye la maanle menwunle kɛzi bɛku sonla la. Ye ɛvolɛ nnu anzi, mengyakyile sogya gyima ne na menzukoale adwenle nee sonla nyɛleɛ nwo debie ɔluakɛ ɛnee mekulo kɛ meyɛ gyima wɔ Federal Bureau of Investigation anu. Mengɔle yunivɛsiti wɔ United States na mɔɔ menziale mengɔle Canada la, mendoale zo wɔ ɛkɛ.

 Mengɔle yunivɛsiti la, alesama nee ɛbɛlabɔlɛ nu edwɛkɛ maanle me sa nu dole bɔkɔɔ. Ɛnee ɔzɔho kɛ menli le angomedi, debie biala mɔɔ wɔ ewiade la le mgbane yɛɛ alesama ngyegyelɛ ɛnlɛ ye sɔbelɛ. Anyelazo mɔɔ ɛnee melɛ kɛ alesama bahola ayɛ ewiade ne boɛ la wiele.

 Ɔluakɛ ɛnee menlɛ bodane wɔ ɛbɛlabɔlɛ nu la ati, menvale me adwenle menziele nzanlonlɛ, nyiletane ɛnlonlɛ, ezukoa ɛkpondɛlɛ nee nla zo. Mengɔle ɛkponledolɛ ngakyile bo na me nee mraalɛ ngakyile lale. Ndetelɛ mɔɔ menyianle wɔ sogya gyima ne anu la maanle me anyesesebɛ ne yɛle kpole, ɔti ɛnee meta meko. Ɛnee mesuzu kɛ mebahola meazi mɔɔ le kpalɛ nee ɛtane la anwo kpɔkɛ, ɔti awie biala mɔɔ ɛnee mete nganeɛ kɛ ɔnli pɛlepɛle la, menva ɔ nwo mengyɛ ye. Noko akee, nɔhalɛ nu, ɛnee meyɛ akɛlɛ memaa basabasayɛlɛ.

 Kenle ko bie mɔɔ ɛnee me nee me gɔnwo bie ɛkeka nyiletane ne bie kpalɛ wɔ me sua nu ɛkɛ na eza yɛlɛhyehyɛ mɔɔ yɛkadɔne ye la, me gɔnwo ne bizale me saa medie Nyamenle medi a. Membuale ye kɛ, “Saa Nyamenle a ɛmaa amaneɛnwunlɛ ɛlɛkɔ zo wɔ ewiade anu a, ɛnee mengulo kɛ menwu ye bɔbɔ!” Ye alehyenlɛ nu mɔɔ mengɔle me gyima fofolɛ ne anu ala la, me gɔnwo gyimayɛvo bie mɔɔ ɔle Gyihova Dasevolɛ la bizale me kɛ, “Ɛsuzu kɛ Nyamenle a ɛmaa amaneɛnwunlɛ ɛlɛkɔ zo wɔ ewiade ye anu ɔ?” Ɔzinle me nwo kɛ ɔbizale mualɛ ne mɔɔ menvale memaanle me gɔnwo ne la anwo kpuya la, ɔti ɛnee mekulo kɛ mesukoa nwolɛ debie dɔɔnwo. Ɔ nee me zuzule ninyɛne dɔɔnwo anwo wɔ siane nsia anu, na ɔmaanle menyianle ɛbɛlabɔlɛ nu kpuya mɔɔ yɛ me ɛse la anwo mualɛ wɔ Baebolo ne anu.

 Ɛnee raalɛ mɔɔ me nee ye de la ɛngulo kɛ meka ninyɛne mɔɔ melɛsukoa la anwo edwɛkɛ mekile ye. Molɛ bie, menganle mengilele ye kɛ medo ɛsalɛ mevɛlɛ Alasevolɛ ne mɔ kɛ bɛ nee yɛ ɛrazukoa Baebolo ne wɔ yɛ sua nu. Ye alehyenlɛ nu, mekavi gyima meara la, ɛnee yesesa sua ne anu ninyɛne amuala yehɔ yegyakyi me. Mengɔnzunle kpalɛ wɔ alienwo. Eza menzɛlɛle Nyamenle, memkpale ye kyɛlɛ kɛ ɔboa me. Mekɛ zɔhane a menlimoale menvale Nyamenle duma Gyihova, menlile gyima wɔ asɔneyɛlɛ nu a.​—Edwɛne 83:18.

 Ye kenle nwiɔ anzi, me nee Alasevolɛ agyalɛma bie bɔle Baebolo ɛzukoalɛ bo. Bɛhɔle la, mengɔle zo mengengale You Can Live Forever in Paradise on Earth buluku ne, na menwiele ye kenga nɔsolɛ zɔhane. a Mɔɔ menzukoale ye wɔ Gyihova Nyamenle nee ɔ Ra, Gyisɛse Kelaese anwo la hanle me ahonle kpalɛ. Menwunle kɛ Gyihova se anwunvɔne, ɔti saa yɛlɛnwu amaneɛ a ɔdi nyane. (Ayezaya 63:9) Ɛlɔlɛ mɔɔ Nyamenle lɛ maa me yɛɛ afɔle mɔɔ ɔ Ra ne bɔle maanle me la hanle me ahonle kpalɛ. (1 Dwɔn 4:10) Menwunle kɛ Gyihova lɛ me nwo abotane “ɔluakɛ ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.” (2 Pita 3:9) Menwunle kɛ Gyihova ɛlɛtwe me.​—Dwɔn 6:44.

 Membɔle debiezukoalɛ ɛhɔlɛ bo wɔ dapɛne zɔhane anu. Ɛnee me enrinli ne le ndendenle, mewula asomadeɛ yɛɛ me anwoziezielɛ ka ɛzulolɛ, noko Alasevolɛ ne mɔ liele me kɛ bɛ busuanli bie mɔɔ bɛnwunle ye ɛhyɛ la. Bɛyɛle bɛ debie kɛ nɔhalɛ Kilisienema. Mendele nganeɛ kɛ mewɔ me nenyia nee me nana sua nu, noko ɛnee ɛke tɛnlabelɛ ne tɛla yemɔ.

 Yeangyɛ, ninyɛne mɔɔ ɛnee melɛsukoa ye wɔ Baebolo ne anu la bɔle ɔ bo kɛ ɔkakyi me ɛbɛlabɔlɛ. Mempepɛle me enrinli ne, mengyakyile adwɔmanebɔlɛ, nyiletane ɛnlonlɛ yɛɛ nza dɔɔnwo ɛnlonlɛ. (1 Kɔlentema 6:9, 10; 11:14) Ɛnee mekulo kɛ meyɛ mɔɔ sɔ Gyihova anye la. Ɔti, ɛnee saa menwu ye kɛ ɔngulo debie bie mɔɔ melɛyɛ la a, menva debie biala menye me nloa. Emomu, ɛnee meta medi nwolɛ nyane. Meka mekile me nwo kɛ, ‘Menrɛhola menrɛhɔ zo menrɛyɛ ɛhye.’ Na ɛkɛ ne ala, mebɔ mɔdenle mekakyi me adwenle nee me nyɛleɛ. Ɛhye ati, yeangyɛ yɛɛ menwunle nvasoɛ mɔɔ wɔ Gyihova ɛhulolɛdeɛyɛlɛ zo a. Membɔle Baebolo ɛzukoalɛ bo la, ye siane nsia anzi wɔ July 29, 1989, bɛzɔnenle me kɛ Gyihova Alasevolɛ ne mɔ anu ko.

 Baebolo ne ɛboa me ɛmaa mehakyi me subane. Mekɛ bie mɔɔ ɛze la, ɛnee saa awie ka me a menva ɔ nwo mengyɛ ye. Noko kɛkala, mebɔ mɔdenle kɛ ‘me nee menli kɔsɔɔti badɛnla anzodwolɛ nu.’ (Wulomuma 12:18) Menlie ɛhye anwo nganvolɛ, emomu meda Gyihova ase kɛ ɔluale tumi mɔɔ wɔ ye Edwɛkɛ ne anu yɛɛ ye sunsum nwuanzanwuanza ne azo ɔhakyile me la.​—Galeehyeama 5:22, 23; Hibuluma 4:12.

 Kɛkala, kɛ anrɛɛ mebayɛ akɛlɛ meamaa nyiletane ɛnlonlɛ, basabasayɛlɛ yɛɛ ɛbɛlatane ɛbɔlɛ la, mebɔ mɔdenle meyɛ mɔɔ sɔ Gyihova Nyamenle anye na meyɛ biala mɔɔ mebahola la wɔ ye ɛzonlenlɛ nu. Bie a le awie mɔ mɔɔ meboa bɛ meamaa bɛanwu ye la. Bɛzɔnenle me la, ye ɛvolɛ ekyi anzi, mengɔnyɛle daselɛlilɛ gyima ne wɔ maanle mɔɔ bɛhyia nolobɔlɛma dɔɔnwo wɔ nu la azo. Wɔ ɛvolɛ dɔɔnwo mɔɔ ɛze la anu, menli mɔɔ mehilehile bɛ na menwu ye kɛ Baebolo ne ɛmaa bɛdabɛ noko bɛnyia ɛbɛlabɔlɛ kpalɛ la maa medi fɛlɛko kpalɛ. Eza ɔyɛ me fɛ kpole kɛ me mame rayɛle Gyihova Dasevolɛ la, ɔluakɛ ɔnwunle nzenzaleɛ kpole mɔɔ menyɛle wɔ me subane nee me nyɛleɛ nu la.

 Menwiele sukulu ne mɔɔ ɛnɛ bɛfɛlɛ ye Belemgbunlililɛ Edwɛkpakavolɛma Sukulu ne la wɔ 1999, wɔ El Salvador. Sukulu zɔhane tetele me na ɔboale me ɔmaanle menyɛle neazo kpalɛ wɔ edwɛkɛhanlɛ gyima ne anu na menyɛle kilehilevolɛ nee mboaneneavolɛ wɔ asafo ne anu. Wɔ ɛvolɛ zɔhane ala anu, mengyale me kulovolɛ, Eugenia. Yɛ mu nwiɔ yɛlɛyɛ dahuu ɛzonlenlɛ gyima ne wɔ Guatemala.

 Kɛkala, kɛ anrɛɛ ɛbɛlabɔlɛ ne bamaa me sa nu ado la, me nye die kpalɛ. Baebolo ngilehilelɛ mɔɔ mefa meyɛ gyima la ɛmaa mehwe me nwo mevi nla nu ɛbɛlatane nee basabasayɛlɛ nwo na yemaa menyia nɔhalɛ ɛlɔlɛ nee anzodwolɛ.