Ɛnee me nye ɛnla kɛ mebaboda ahenle mɔɔ me nee ye ɛlɛko la zɔhane. Membɔle ɔ bonyi zo mɔɔ ɛnee me nye ɛnla a. Me adwenle buale me fɔlɛ na mendwenlenle nwo saa mengyakyi konle ɛhonlɛ a. Duzu ati a nvonleɛ ɛhye maanle membizale nwɔhoalilɛ ɛhye mɔɔ me nye die nwo na meva ɛvolɛ dɔɔnwo mezukoa la anwo kpuya a? Bɛmaa menlimoa mengilehile kɛzi ɔyɛle mɔɔ membɔle konle ɛhonlɛ bo la anu.

 Menyinle wɔ ɛleka bie mɔɔ bikye Buffalo, New York, U.S.A. la, na bɛtetele me wɔ Kateleke abusua bie mɔɔ anyelielɛ wɔ nu la anu. Mengɔle Katelekema sukulu na ɛnee meyɛ gyima meboa ɛsɔfo ne mɔ wɔ bɛ ɛzonlenlɛ nu. Ɛnee me awovolɛ kulo kɛ me nee me diema raalɛ ne nyia ɛbɛlabɔlɛ kpalɛ. Ɔti, saa ɛnee yɛkpɔne sukulu a bɛmaa me adenle bɛmaa medi nwɔhoa anzɛɛ meyɛ gyima, ɛnee mɔɔ hyia bɛ la a le kɛ mebayɛ deɛ wɔ sukulu. Ɛhye maanle menwunle kɛzi mebayɛ me ninyɛne pɛpɛɛpɛ la wɔ me ngakula nu.

 Mɔɔ menyianle ɛvolɛ 17 la, membɔle ɔ bo menzukoale konle ɛhonlɛ. Wɔ ɛvolɛ dɔɔnwo anu, menvale kenle nsia mentetele me nwo wɔ dapɛne ne anu, na ɛnee mefa dɔnehwele nsa a meyɛ ye kenle ko biala a. Dapɛne biala, ɛnee mefa dɔnehwele dɔɔnwo metete me adwenle wɔ kɛzi mebaho la anwo na menea vidio mɔɔ bamaa meanyia anyuhɔlɛ la. Ɛnee me nye die nwolɛ kɛ mebakyekye me nye na bɔbɔ meava ninyɛne mɔɔ yɛfa yɛko la bie meali gyima wɔ mekɛ mɔɔ melɛsukoa konle ne la. Ɛnee saa meto me sa ko a, mekola mebubu ndaboa anzɛɛ belekese. Membokale menli mɔɔ bɔ mɔdenle kpalɛ la anwo na menyianle amodinli dɔɔnwo. Konle ɛhonlɛ rayɛle debie titili wɔ me ɛbɛlabɔlɛ nu.

 Ɛnee mesuzu kɛ melɛdi boɛ wɔ ɛbɛlabɔlɛ nu. Kɛ mɔɔ membɔle mɔdenle wɔ yunivɛsiti la ati, mekɛ mɔɔ melɛwie la, bɛlile me eni kpole kpalɛ. Ɛnee mefa kɔmpita zo gyimalilɛ meyɛ gyima wɔ kɔmpɛlɛ kpole bie anu. Ɛnee kɔmpɛlɛ mɔɔ meyɛ gyima wɔ nu la maa me bonus, ɛnee melɛ me ti anwo sua yɛɛ melɛ girlfriend. Ɛnee ɔzɔho kɛ ninyɛne ɛlɛkɔ boɛ amaa me, noko ɛnee melɛ ɛbɛlabɔlɛ nu kpuya dɔɔnwo mɔɔ gyegye me a.

 Amaa meanyia me kpuya ne mɔ anwo mualɛ la, membɔle ɔ bo kɛ mekɔ asɔne fane nwiɔ wɔ dapɛne ne anu na menyɛle asɔne memkpondɛle Nyamenle moalɛ. Na kenle ko bie, adawu mɔɔ me nee me gɔnwo bie bɔle la hakyile me ɛbɛlabɔlɛ. Membizale ye kɛ, “Asoo wɔdwenle bodane mɔɔ ɛbɛlabɔlɛ lɛ la anwo ɛlɛ?” Na menganle kɛ: “Ngyegyelɛ nee nzisi dɔɔnwo ɛbu zo!” Ɔhanle ɔhilele me kɛ ɔbizale kpuya ko ne ala bie na mualɛ mɔɔ ɔnyianle ye wɔ Baebolo ne anu la ka ahonle. Ɔvale You Can Live Forever in Paradise on Earth a buluku ne ɔmaanle me. Ɔhanle kɛ ɔ nee Gyihova Alasevolɛ ne mɔ sukoa Baebolo ne. Alimoa ne, ɛnee mengulo kɛ medie meto nu, ɔluakɛ ɛnee mengulo kɛ mekenga ɛzonlenlɛ gyɛne buluku. Noko akee, ɛhulolɛ mɔɔ ɛnee melɛ kɛ mebanyia me kpuya ne mɔ anwo mualɛ la maanle meneanle saa mɔɔ Alasevolɛ ne mɔ ka la tɔ ɛzonlɛ nu a.

 Mɔɔ menwunle mɔɔ Baebolo ne kilehile amgba la, ɔzinle me nwo. Menzukoale Nyamenle mɔlebɛbo bodane mɔɔ ɛnee ɔlɛ ɔmaa alesama kɛ bɛbadɛnla aze dahuu wɔ paladaese nee Ye bodane mɔɔ ɔtɛkakyile la anwo debie. (Gyɛnɛsese 1:28) Mɔɔ menwunle Nyamenle duma, Gyihova ne wɔ King James Baebolo ne mɔɔ melɛ anu, na menwunle kɛ duma ɛhye a meyɛ nwolɛ asɔne wɔ mekɛ mɔɔ melɛka Yɛ Ze Mɔɔ Wɔ Anwuma nzɛlɛlɛ ne la, ɔzinle me nwo. (Edwɛne 83:18; Mateyu 6:9) Akee mendele deɛmɔti Nyamenle ɛmaa adenle ɛmaa alesama ɛlɛnwu amaneɛ wɔ mekɛ ezinra nu la abo. Debie biala mɔɔ menzukoale la ɛnee tɔ ɛzonlɛ nu kpalɛ! Me nye liele kpalɛ.

 Me rɛle ɛnrɛvi kɛzi mendele nganeɛ wɔ kenle mɔɔ limoa mɔɔ mengɔle Gyihova Alasevolɛ ayia ne mɔ abo la ɛlɛ. Awie biala lale agɔnwolɛvalɛ subane ali, na ɛnee bɛkulo kɛ bɛnwu me duma. Wɔ ayia mɔɔ menlimoale mengɔle la abo, bɛmaanle ɛdendɛlɛ titili bie na ɛnee ɔfale asɔne mɔɔ Nyamenle tie la anwo. Me nye liele edwɛkɛtile ne anwo, ɔluakɛ ɛnee melɛyɛ asɔne meakpondɛ Nyamenle moalɛ. Yemɔ anzi, mengɔle Gyisɛse ewule Ngakyelɛlilɛ ne. Mɔɔ menwunle kɛ ngakula bɔbɔ buke bɛ Baebolo ne di ɛgengalɛ ne anzi wɔ ayia ɛhye mɔ abo la, ɔzinle me nwo. Alimoa ne, ɛnee menze kɛzi bɛkpondɛ ngɛlɛlera ne mɔ la, noko Alasevolɛ ne mɔ boale me maanle menwunle kɛzi bɛkpondɛ bɛ la.

 Mekɛ mɔɔ melɛkɔ ayia ɛhye mɔ abo dɔɔnwo la, menyianle anyezɔlɛ kpole memaanle ngilehilelɛ kpalɛ mɔɔ Alasevolɛ ne mɔ kilehile la. Ɛnee mekɔ debiezukoalɛ ko biala a mesukoa ninyɛne dɔɔnwo, na mebavi ɛkɛ la ɛnee menyia anwosesebɛmaanlɛ nee anyelielɛ dɔɔnwo. Akee bɛ nee me yɛle Baebolo ɛzukoalɛ nwo ngyehyɛleɛ.

 Ninyɛne mɔɔ menwunle ye wɔ Gyihova Alasevolɛ anwo la ɛnee le ngakyile bɔkɔɔ fi mɔɔ menwunle ye wɔ me asɔne ne anu la anwo. Menwunle ye kɛ koyɛlɛ wɔ Alasevolɛ ne mɔ avinli yɛɛ bɛka nɔhalɛ na bɛbɔ mɔdenle kɛ bɛbabɔ ɛbɛla mɔɔ sɔ Nyamenle anye la. Menwunle ye wienyi kɛ bɛdabɛ a bɛda sɛkɛlɛneɛ mɔɔ maa bɛnwu nɔhalɛ Kilisienema la ali a, bɛkulo bɛ nwo.​—Dwɔn 13:35.

 Mekɛ mɔɔ ɛnee melɛsukoa Baebolo ne la, menyɛle nzenzaleɛ dɔɔnwo amaa me ɛbɛlabɔlɛ nee Baebolo ngyinlazo ayɛ ko. Noko akee, mendele nganeɛ kɛ menrɛhola menrɛgyakyi konle ɛhonlɛ ɛlɛ. Ɛnee me nye die nwo kɛ mebatete me nwo na meaho. Mɔɔ menganle ɛhye mengilele Dasevolɛ ne mɔɔ ɔ nee me sukoa Baebolo ne la, ɔvile atiakunlukɛnlɛma nu ɔzele me kɛ, “Wɔmɔ kɔ zo sukoa na meze kɛ ɛbazi kpɔkɛ kpalɛ.” Edwɛkɛ mɔɔ ɛnee mekulo kɛ mete la ɛne. Mekɛ mɔɔ ɛnee melɛsukoa dɔɔnwo la, ɛnee mekulo kɛ me ɛbɛlabɔlɛ sɔ Gyihova Nyamenle anye.

 Debie mɔɔ maanle mengakyile me adwenle la a le ahenle mɔɔ ɛnee me nee ye ɛlɛko mɔɔ meannwu ye membɔle ɔ bonyi zo mɔɔ melimoa meha nwolɛ edwɛkɛ la. Esiane zɔhane maanle mendwenlenle nwolɛ kpalɛ kɛ saa meangyakyi konle ɛhonlɛ ne a, menrɛhola menrɛyɛ Kelaese ɛdoavolɛ mɔɔ kulo anzodwolɛ la. Ɛnee megenga ye wɔ Ayezaya 2:3, 4 kɛ, bɛdabɛ mɔɔ bɛdi Gyihova adehilelɛ zo la ‘ɛnrɛzukoa konle ɛhonlɛ bieko.’ Yɛɛ Gyisɛse hilehilele awie mɔ kɛ, ɔnle kɛ bɛyɛ basabasa saa bɔbɔ bɛ nee bɛ ɛnli ye boɛ a. (Mateyu 26:52) Ɛhye ati, mengyakyile nwɔhoalilɛ ne mɔɔ ɛnee me nye die nwo kpalɛ la.

 Akee menlile Baebolo folɛdulɛ mɔɔ se, “fa nyamenlezonlenlɛ kpalɛ tete ɛ nwo kɛ wɔ bodane” la azo. (1 Timote 4:7) Kɛkala, menva me mekɛ nee me anwosesebɛ menzukoa konle ɛhonlɛ kɛ mɔɔ ɛnee meyɛ ye dɛba la, melɛfa meazonle Nyamenle. Ɛnee me girlfriend ne anye ɛnlie mɔɔ melɛsukoa ye wɔ Baebolo ne anu la anwo, ɔti yɛgyakyile. Bɛzɔnenle me kɛ Gyihova Alasevolɛ ne mɔ anu ko wɔ January 24, 1987. Yemɔ anzi, menvale me nwo menwulale dahuu ɛzonlenlɛ gyima ne anu na memboale awie mɔ memaanle bɛzukoale Baebolo ne. Mengɔle zo menyɛle dahuu ɛzonlenlɛ gyima ne na bɔbɔ menzonlenle wɔ Gyihova Alasevolɛ ewiade amuala gyima ne ati mɔɔ wɔ New York, U.S.A. la.

 Kɛkala, menwu Nyamenle anwo nɔhalɛ ne, debie mɔɔ ɛnee yeminli wɔ me ɛbɛlabɔlɛ nu la. Mende nganeɛ kɛ meminli debie. Emomu, melɛ bodane kpalɛ wɔ ɛbɛlabɔlɛ nu, melɛ kenle bie nwo anyelazo kɛnlɛma yɛɛ me nye die kpalɛ. Me nye tɛdie agbɔkɛ nu ɛkpundilɛ nwo, noko tɛ yemɔ a anwo hyia me kpalɛ wɔ ɛbɛlabɔlɛ nu kɛkala a. Gyihova Nyamenle mɔɔ melɛsonle ye la a le debie mɔɔ anwo hyia me kpalɛ wɔ ɛbɛlabɔlɛ nu a.

 Mekɛ mɔɔ ɛnee meko la, ɛnee dahuu memaa me nye da ɛkɛ wɔ menli mɔɔ ɛbɔ me ɛyia la anwo amaa saa bɛ nuhua bie ba me nwo zo a, me nee ye azie ye zo. Ɛnɛ noko, memaa me nye da ɛkɛ wɔ menli mɔɔ ɛbɔ me ɛyia la anwo, noko ɔlua ndelebɛbo gyɛne ti​—kɛ meboa bɛ. Baebolo ne ɛboa me ɛmaa meyɛ sonla mɔɔ yɛ nyele na meyɛ kunli kpalɛ memaa me ye, Brenda.

 Ɛnee me nye die konle ɛhonlɛ nwo. Noko, meva debie kpalɛ mezie ɔ gyakɛ anu. Baebolo ne ka kɛ: “Agbɔkɛ nu ɛkpundilɛ zo nvasoɛ le ekyi, noko nyamenlezonlenlɛ kpalɛ zo lɛ nvasoɛ wɔ ninyɛne kɔsɔɔti anu, ɔluakɛ ɔlɛ ngoane ɛhye nee ngoane ne mɔɔ bara la anwo ɛwɔkɛ.”​—1 Timote 4:8.