Bɛwole me wɔ Montreal mɔɔ wɔ Canada sua kpole Quebec azo la. Me awovolɛ mɔɔ bɛlɛ ɛlɔlɛ la a tetele me nee me mediema nsa ne wɔ Rosemont sua kɛnlɛma ne azo a. Ɛnee anzodwolɛ wɔ yɛ avinli.

 Ɛnee mele kakula nrenyia mɔɔ me nye die Baebolo ne anwo. Mekakye kɛ menyianle ɛvolɛ 12 la, mengengale Gyisɛse anwo edwɛkɛ wɔ Ngyekyeleɛ Fofolɛ ne anu na me nye liele nwolɛ kpalɛ. Awie mɔ mɔɔ ɔhulole bɛ na ɔzele bɛ anwunvɔne la hanle me ahonle kpalɛ, ɔti ɛnee mekulo kɛ mesukoa ye. Ɔyɛ alɔbɔlɛ kɛ, nganeɛdelɛ ɛhye minlinle ɔlua menli mɔɔ lɛ subane ɛtane mɔɔ me nee bɛ dule la ati.

 Ɛnee me papa fa saxophone bɔ edwɛne, ɔvale milahyinli ne ɔmaanle me, eza ɔmaanle me nye liele edwɛne ɛdolɛ nwo, ɔti yemɔ a menvale menyɛle me bodane a. Me nye liele edwɛne ɛdolɛ nwo kpalɛ, ɔti yeangyɛ menzukoale getaa ɛbɔlɛ. Yemɔ anzi, me nee me gɔnwo mɔ bie dele edwɛne ɛbɔlɛ eku na yɛbɔle edwɛne wɔ ɛleka bie mɔ. Menli mɔɔ boa edwɛndolɛma maa bɛdie duma la nwunle me na bɛyɛle kɛ bɛmaa mealie duma wɔ edwɛne ɛdolɛ nu. Me nee kɔmpɛlɛ kpole bie mɔɔ kye awie mɔ edwɛne na bɛadɔne ye bɛamaa bɛ la yɛle ngyehyɛlɛ. Menli dɔɔnwo anye raliele me edwɛne ne anwo, ɔti ɛnee bɛta bɛbɔ ye wɔ riledio zo wɔ Quebec.

 Ɔzɔho kɛ menyianle debie biala mɔɔ ɛnee me nye la zo la. Menliele duma wɔ me mgbavolɛ nu, menyianle ezukoa dɔɔnwo yɛɛ menyɛle mɔɔ mekulo la. Alehyenlɛ ne anu, mekɔkpundikpundi me agbɔkɛ nu, bɛbizebiza me edwɛkɛ, mefa me sa mewula ngɛlata bo, na mekɔyɛ gyimalilɛ wɔ tɛlevihyɛne zo. Ɔdwu nɔsolɛ nu a, mebɔ edwɛne yɛɛ mekɔ ɛkponledolɛ bo. Amaa meanze nyiane wɔ menli ne anyunlu la, membɔle ɔ bo kɛ meno nza wɔ me mgbavolɛ nu, nzinlii menonle nyile ɛtane. Ɛnee meyɛ basabasa yɛɛ membɔle nla nu ɛbɛlatane.

 Bie mɔ anye bolole me ɔluakɛ ɛnee bɛnwu me kɛ me nye die. Noko, ɛnee mete nganeɛ wɔ me nu kɛ debie ɛminli wɔ me ɛbɛlabɔlɛ nu, titili saa ɔka me ngome a. Me rɛle bɔle yɛɛ adwenleadwenle dɔle me nwo. Ɔyɛ alɔbɔlɛ kɛ, mɔɔ menliele duma kpole la, AIDS hunle menli mɔɔ yɛ me edwɛne ne anwo gyima la nwiɔ. Ɔzinle me nwo! Ɛnee mekulo edwɛne ɛdolɛ, noko ɛnee mengulo ɛbɛla mɔɔ bɛbɔ ye wɔ nu la anwo.

 Menliele duma ɛdeɛ, noko ɛnee meze ye kɛ mɔɔ ɛlɛkɔ zo wɔ ewiade ye la ɛnle kpalɛ fee. Duzu ati a nzisi ɛbu zo ɛ? Ɛnee mennwu deɛmɔti Nyamenle ɛtɛyɛle nwolɛ ɛhwee la. Nɔhalɛ nu, menyɛle asɔne fane dɔɔnwo kɛ mebanyia mualɛ ne. Mɔɔ mengɔle akpɔsa menwiele na melɛdie me menle la, membɔle ɔ bo kɛ mekenga Baebolo ne bieko. Meande mɔɔ mengengale la dɔɔnwo abo kpalɛ ɛdeɛ, noko menwunle kɛ ewiade awieleɛ ne ɛbikye.

 Mɔɔ melɛkenga Baebolo ne la, menwunle kɛ mekɛ bie Gyisɛse hyele ɛhɔne kenle 40 wɔ fienemgbole ne anu. (Mateyu 4:​1, 2) Menyianle adwenle kɛ saa meyɛ zɔ a, bie a, Nyamenle baye ɔ nwo ahile me, ɔti menzile kenle mɔɔ mebabɔ ɔ bo la anwo kpɔkɛ. Ɔhale dapɛne nwiɔ na meabɔ ɛhɔnehyelɛ ne abo la, Gyihova Alasevolɛ nwiɔ bɔle me anlenkɛ ne anu, na menliele bɛ kɛ asɛɛ ɛnee me nye la bɛ ade la. Meneanle Alasevolɛ ne mɔ anu ko mɔɔ bɛfɛlɛ ye Jacques la anyunlu na membizale ye kɛ, “Kɛ ɔkɛyɛ na yɛanwu ye kɛ yɛwɔ ewiade ɛhye awieleɛ mekɛ ne anu ɛ?” Ɔgengale 2 Timote 3:​1-5 wɔ ye Baebolo ne anu ɔvale ɔbuale me kpuya ne. Membizale bɛ mu nwiɔ kpuya dɔɔnwo, na me nye liele mualɛ mɔɔ tɔ ɛnzolɛ nu mɔɔ menyianle ye la, ɛnee ɔmuala gyi Ngɛlɛlera ne azo. Nzinlii, menwunle ye kɛ ɛhɔnehyelɛ ne anwo ɛngyia.

 Membɔle ɔ bo kɛ me nee Alasevolɛ ne mɔ sukoa Baebolo ne dahuu. Nzinlii, mempepɛle me enrinli ndendenle ne na membɔle ɔ bo kɛ mekɔ debiezukoalɛ ne amuala wɔ Belemgbunlililɛ Asalo ɛkɛ. Kɛzi bɛliele me kɛnlɛma wɔ ayia ɛhye mɔ abo la maanle menyianle anwodozo bɔkɔɔ kɛ menwu nɔhalɛ ne.

 Nɔhalɛ nu, amaa meava mɔɔ melɛsukoa ye wɔ Baebolo ne anu meayɛ gyima la, ɛnee ɔwɔ kɛ meyɛ nzenzaleɛ dɔɔnwo wɔ me ɛbɛlabɔlɛ nu. Ɛnee ɔwɔ kɛ megyakyi nyiletane ɛnlonlɛ nee nla nu ɛbɛlatane ɛbɔlɛ. Ɛnee eza ɔwɔ kɛ megyakyi me angomedi subane ne na medwenle awie mɔ anwo kpalɛ. Kɛ wovolɛ ko la, ɛnee ɔwɔ kɛ mesukoa kɛ mebali me mra nwiɔ ne nganeɛdelɛ nee sunsum nu ngyianlɛ nwo gyima. Ɔti, mengyakyile edwɛne ɛdolɛ na menyɛle gyima mɔɔ bɛtua kakɛ ekyi la.

 Ɛnee ɔnla aze fee kɛ mebayɛ nzenzaleɛ ɛhye mɔ. Ɛnee ɔyɛ se kpalɛ kɛ mebagyakyi nyiletane ɛnlonlɛ, ɔdwu mekɛ ne bie a mesia meno bie. (Wulomuma 7:19, 21-24) Nla nu ɛbɛlatane ne ɛgyakyile bɔbɔ a ɛnee le ngyegyelɛ kpole a. Bieko, ɛnee me gyima fofolɛ ne maa mefɛ yɛɛ me ahatualɛ ekyi ne, to me sa nu. Ɔliele me siane nsa na meanyia ezukoa mɔɔ ɛnee mefa dɔnehwele nwiɔ pɛ a menyia ye kɛ edwɛndolɛnli la.

 Asɔneyɛlɛ boale me maanle menyɛle nzenzaleɛ ɛhye mɔ mɔɔ yɛ se la. Eza menwunle ye kɛ dahuu Baebolo ɛgengalɛ nwo hyia. Baebolo tɛkese titili bie mɔ maanle me anwosesebɛ kpalɛ. Ko a le 2 Kɔlentema 7:1, mɔɔ tu Kilisienema folɛ kɛ ‘bɛwowo bɛ nwo wɔ nwonane nee sunsum nu evinli biala anwo’ la. Ngɛlɛlera bieko mɔɔ boale me maanle menyianle anwodozo kɛ mebahola meagyakyi me subane ɛtane ne mɔ la a le Felepaema 4:​13 mɔɔ ka kɛ: “Melɛ anwosesebɛ wɔ debie biala anu ɔlua ahenle mɔɔ maa me tumi la ati.” Awieleɛ ne, Gyihova Nyamenle buale me asɔneyɛlɛ na ɔboale me ɔmaanle mendele Baebolo nu nɔhalɛ ne abo na menvale menyɛle gyima. Ɛhye maanle menyilale me nwo zo memaanle ye. (1 Pita 4:​1, 2) Bɛzɔnenle me kɛ Gyihova Alasevolɛ ne mɔ anu ko wɔ 1997.

 Medie medi bɔkɔɔ kɛ saa meanyɛ nzenzaleɛ ɛhye mɔ a, anrɛɛ ɛnɛ mende aze. Kɛkala, melɛ nɔhalɛ anyelielɛ wɔ ɛbɛlabɔlɛ nu! Me ye Elvie, mɔɔ mekulo ye kpalɛ la le nyilalɛ maa me. Yɛ nye die kɛ yɛbava yɛ mekɛ kɔsɔɔti yɛahilehile awie mɔ Baebolo ne. Ɛhye maa menyia anyelielɛ nee ahunlundwolɛ kpole. Meyɛ Gyihova mo somaa kɛ yehwe me yebikye ɔ nwo la.​—Dwɔn 6:​44.