EMINYEETO NIBABUUZA
Baibuli Neebaasa Kumpwera Eta?—Ekicweka 1: Manya Gye Baibuli Yaawe
“Niinteeraho kushoma Baibuli, kwonka nindahuka kutamwa ahabw’okugira ngu erimu bintu bingi!”—Briana, 15.
Naiwe nikwo orikwehurira? Ekicweka eki nikibaasa kukuhwera!
Ahabw’enki oine kushoma Baibuli?
Torikukunda kushoma Baibuli? Kyaba nikwo kiri, nikyetegyerezibwa. Noobaasa kureeba Baibuli nk’ekitabo ky’empapura nyingi, ekitarimu bishushani, kandi ekitarimu ebirikushemeza nk’ebya tiivi nari vidiyo!
Kwonka kiteekateekyeho omu muringo ogu: Ka tugire ngu waabona ekibokusi kirimu eby’omuhendo, torikugira ekihika ky’okureeba ebiri omunda?
Baibuli eri nk’ekibokusi ekyo. Erimu eby’omuhendo by’obwengye ebirikubaasa kukuhwera
Omu kucwamu gye
Kukoragana gye n’abazaire baawe
Kugira abanywani barungi
Kwemera amaganya
Ekitabo eki ekya ira nikibaasa kita kubamu obuhabuzi oburikukora n’obunaku obu? N’ahabw’okugira ngu ‘ebyahandiikirwe byona, bikahandiikisibwa omwoyo gwa Ruhanga.’ (2 Timoseo 3:16) Eki nikimanyisa ngu obuhabuzi oburi omu Baibuli niburuga ahari Ruhanga.
Nimbaasa kushoma nta Baibuli?
Omuringo gumwe n’okushoma Baibuli yoona. Waakora otyo noija kumurikirwa obutumwa bwa Baibuli. Hariho emiringo mingi y’okushoma Baibuli. Yetegyereze ebiri ahariyo:
Noobaasa kushoma ebitabo 66 orikubikuratanisa, kuruga aha Okutandika kuhika Okushuuruurwa.
Noobaasa kushoma ebyabaireho orikukuratanisa nk’oku byabaireho.
Akakoryo: Ebyongyeirweho A7 ebiri omu New World Translation nibikuratanisa gye obuheereza bwa Yesu omu nsi.
Omuringo gwa kabiri gw’okushoma Baibuli n’okutoorana ebitabo ebirikugamba aha buremeezi obu orikurabamu. Nk’eky’okureeberaho:
Nooyenda kutunga abanywani abeesigwa? Shoma ebirikukwata ahari Yonasaani na Daudi. (1 Samueli, eshuura 18-20) Reero okorese ebiri ahansi y’omutwe “How to Find Loyal Friends” kutungamu amashomo.
Nooyenda kwongyera kwangira okwohibwa? Shoma aha ku Yosefu yaayangire okwohibwa. (Okutandika, eshuura 39) Reero okorese ebiri ahansi y’omutwe “How to Resist Temptation . . . Yosefu—Ekicweka 1” na “Falsely Accused! Yosefu—Ekicweka 2” kutungamu amashomo.
Nooyenda kumanya oku okushaba kurikubaasa kukuhwera? Shoma ebirikukwata ahari Nehemia. (Nehemia, eshuura 2) Reero oshome ebiri ahansi y’omutwe “God Answered His Prayer” kutungamu amashomo.
Akakoryo: Kubaasa kushoma Baibuli otaireho omutima, hamya ngu ori omu mwanya gucureire.
Omuringo gwa kashatu gw’okushoma Baibuli, toorana ekitabo nari zaaburi bwanyima y’okushoma oreebe oku orikubaasa kubigyenderaho. Waaheza kushoma, yebuuze ebibuuzo nk’ebi:
Ahabw’enki ebi Yehova yaabitaire omu Baibuli?
Nibyoreka bita oku Yehova arikutwaza nari oku arikukora ebintu?
Nimbaasa kubigyenderaho nta?
Akakoryo: Koresa Baibuli ey’okwegyesa eya New World Translation kureeba vidiyo, maapu, n’ebindi ebirikubaasa kukuhwera kwongyera kukunda kushoma Baibuli.