27 JANUARY, 2022
RUSSIA

Abale Awiri Anaona Kuti Yehova Anawathandiza Kuti Akhalebe Olimba Mtima

YAMBANI

Khoti la m’boma la Kirsanovskiy m’chigawo cha Tambov, posachedwa lipereka chigamulo chake pa mlandu wa M’bale Anton Kuzhelkov ndi M’bale Nikolay Prokhorov. Loya wa boma sananene kuti abalewa apatsidwe chilango chotani.

Nthawi Komanso Zimene Zinachitika

21 December, 2020

Apolisi anatsegulira mlandu M’bale Anton Kuzhelkov ndi Nikolay Prokhorov chifukwa chowaganizira kuti akutsogolera gulu lochita zinthu zoopsa.
24 December, 2020

Apolisi anakafufuza zinthu m’malo 19 kuphatikizapo kunyumba kwa M’bale Anton Kuzhelkov. M’bale Kuzhelkov anawatengera ku malo ena a pamtunda wa makilomita 350 kuti akawafunse mafunso. Pambuyo pake, anawauza kuti sakuyenera kupanga ulendo wochoka m’dera lawo
25 December, 2020

M’bale Anton Kuzhelkov sanaloledwe kuti abwerenso kunyumba ndipo anamutsekera m’ndende podikira kuzengedwa mlandu
30 August, 2021

M’bale Kuzhelkov anamusamutsira kundende ina

Zokhudza Abalewa

Anton Kuzhelkov

Chaka chobadwa: 1993 (Ku Sortavala, M’dziko la Karelia)

Mbiri yake: M’banja mwawo anabadwa ana atatu aamuna ndipo wamkulu ndi iyeyo. Ali mwana, ankakonda kupha nsomba komanso kuchita masewera oyenda pa sinowo. Anaphunzira ntchito ya zomangamanga kwa bambo ake

Anabatizidwa mu 2007. Mu 2015, anakwatira Alyona

Zomwe Mkazi Wake Alyona, a Ananena

Mwakumanapo ndi mavuto otani mukafuna kukaona mwamuna wanu?

Kuti andilole kuti ndikaonane ndi mwamuna wanga kwa kanthawi kochepa, ndinkafunika kukatenga kaye chilolezo chomwe chinkangoperekedwa kawiri pa mwezi. Zimenezi zinkandidetsa nkhawa kwambiri. Chinanso n’chakuti, kuti ndilowe komwe amamusungirako, ndinkafunika kusonyeza chikalata chotsimikizira kuti ndayezedwa ndipo ndilibe COVID-19. Ndipo kuyezetsako ndikodula kwambiri.

Panopo, maulendo okaona anthu anaimitsidwa kaye ndipo zimenezi ndi zomvetsa chisoni kwambiri. Panopo, mlandu wake unayamba kukhoti ndipo amandilola kukapezeka m’khoti. Komabe, mlanduwo akuwuweruzira kumzinda wina womwe uli pamtunda wa makilomita 100 kuchokera kwathu.

N’chiyani chikuthandiza mwamuna wanu kuti akwanitse kupirira komwe akumusungako?

Amapemphera mochokera pansi pa mtima ndipo nthawi zina amachita zimenezi akulira. Pachilichonse, amazindikira kuti Yehova ali naye. . . . Amasangalalanso kwambiri akamaona zinthu zachilengedwe. Mwachitsanzo, amakonda kuyang’anitsitsa mbalame akapita kowongola miyendo kundendeko. . . . Amaganizira mozama za nzeru za Mlengi komanso za fanizo la mpheta lomwe Yesu ananena. . . . Zimenezi zimamuthandiza kuti azikhalabe wosangalala.

Nikolay Prokhorov

Chaka chobadwa: 1964 (Ku Morshan, M’chigawo cha Tambov)

Mbiri yake: Anagwirapo ntchito ya usilikali. Amakonda kusambira komanso kuyenda n’kumaona malo

Mu 2008, anakwatira Yelena ndipo ali ndi ana awiri, wamwamuna ndi wamkazi. Anayamba kuphunzira Baibulo atachita chidwi ndi makhalidwe a Mboni za Yehova ndipo anabatizidwa mu 2008

Zimene Ananena

Pali nthawi ina yake yomwe munaona kuti Yehova anakuthandizani?

Yehova wakhala akundithandiza nthawi zonse ngakhalenso pa nthawi yovutayi. . . . Nthawi zambiri ndinkakhala ndekhandekha ndi apolisi omwe anali ndi cholinga choti ndigonje n’kuvomera kuti “ndinaphwanya malamulo.” . . . Ndimakumbukira nthawi ina pamene ndinali ndi mantha kwambiri ndipo ndinkakayikira ngati ndikanakhalabe wokhulupirika. Ndinapemphera kwa Yehova kuti andipatse mphamvu komanso kuti ndikhale ndi mtendere wamumtima. Wapolisi wina atandiona kuti ndagwetsa nkhope yanga ndikupemphera, anandifunsa kuti: “Ukupempherera nkhani yanji?” Ndinamuuza kuti: “Ndikupemphera kuti ndisayambe kudzimvera chisoni.” Zitatero, ndinakumbukira lemba la Yesaya 54:17. Ndinazindikira kuti palibe chilichonse chomwe akanandichita. Zimenezi zinandithandiza kukhala wolimba mtima ndipo ngakhale asilikali otilondera anaonanso zimenezi. Pamapeto pake anasiya kundiopseza moti mpaka anandiuza kuti ndisawasungire chidani.

Akhristu anzanu akuthandizani bwanji limodzi ndi mkazi wanu?

Abale ndi alongo akuchita zambiri potithandiza. Amayesetsa kulankhulana nafe, ngakhale kuti kuchita zimenezi kukhoza kuwaika m’mavuto. Komanso abale ndi alongo a m’dziko lonse la Russia komanso a m’mayiko ena, amatiimbira mafoni.

Aliyense anatithandiza pa nthawi yovutayi. Ngakhale pa nthawi imene khoti linkamvetsera mlandu wathu, abale ndi alongo anabwera kudzatithandiza. . . Chikondi chomwe Akhristuwa anasonyeza, chinali ngati umboni kwa onse okhudzidwa ndi mlanduwu. Zimenezi zinandithandiza limodzi ndi mkazi wanga kuti tikhalebe okhulupirika pa nthawi yovutayi.

Sitikukayikira kuti Yehova apitiriza kuthandiza abale ndi alongo athu okondedwa omwe akuzunzidwa.—Miyambo 1:33.

a M’bale Kuzhelkov adakali m’ndende podikira kuzengedwa kwa mlandu wake moti sitinathe kucheza naye.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI