Éí kódaatʼéii yee áká adoolwoł

• tʼah hwiindzin

• tʼą́ą́ʼ óʼósin

• doo íizhnízin da ndi, binjilnish

• akééʼdóogo naʼízhdíltʼeʼ

Áłchíní tʼáá bí sizı̨́įgi yee ádaa áhályą́ągo éí doo yáʼádaatʼéehii yichʼįʼ haʼólní, azhą́ ayóó bóhoneedlı̨́ nahalin ndi, yidádínóolniiłgi yitsʼąą átʼée łeh. Éí ádaa áháyą́ bee ádingo

• ayóó báháchįʼ

• yínííł nilı̨́

• nátʼoh, tó índa azeeʼ tsiʼnaʼiiłáii choyoołʼı̨́

• chʼiyáán doo bá yáʼátʼéhígíí yiyą́ą łeh

Naʼaskáaʼgo éí áłchíní tʼáá bí sizı̨́įgi yee ádaa áhályą́ągo éí niyéehgo bitsʼíís, béeso, áádóó bee hazʼáanii hatíihgi doo ayóó bee bichʼįʼ anáhóótʼiʼ da łeh. Kótʼéego naaskáaʼgo binahjįʼ University of Pennsylvaniadóó Professor Angela Duckworth ání: “Ádaa áháyą́ągo éí tʼáadoo átʼéhí da.”

Dooda diiʼníi doo.

BINAHJĮʼ NAʼNITINII: ‘Aooʼ dohníigo, tʼóó Aooʼ doo; Dooda dohníigo, tʼóó Dooda doo.’—James 5:12.

Áłchíní tʼah áłtsʼísígo éí hasłą́ągida yichago náádiichǫǫhgo éí bizhéʼé dóó bimá yee nayínítaahgo átʼı̨́. Hweʼawééʼ tʼóó hakʼeh nídídleehgo éí kóshtʼı̨́įgo dooda jiníi ndi, aooʼ jididooniił nízin łeh.

Ndi azhéʼé dóó amá éí tʼáá íiyisíí dooda yee sizı̨́įgo hweʼawééʼ yee hináa dooleełii bee bínazhʼniłtin. Éí haʼátʼíí shı̨́ı̨́ niidzinii doo tʼáá áłahájįʼ nihaa nályéeh da. Dr. David Walsh ání: “Diné éí kótʼéii yíhoołʼą́ąʼgo ayóó bił dahózhǫ́. Nihaʼáłchíní tʼáá yinízinígíí biyaa nihiikáahgo éí doo bíká ánéilwoʼ da.” *

Neʼawééʼ tʼah kodą́ą́ʼ dooda bidiníigo éí neeyą́ągo tʼáá bí dooda hwiindzingi yee ádaa áhályą́ą doo. Éí azeeʼ tsiʼnaʼiiłáii, sex, doodaiiʼ atíʼdoolíiłii bidínéeshtah niizı̨́įʼgoda tʼáá bí dooda dínóozįįł.

 Yáʼátʼéehgo oodááł índa doo yáʼátʼééhgóó oodáałgo éí haaʼdoolíiłgi bínabiníłtin.

BINAHJĮʼ NAʼNITINII: “Diné tʼáá haʼátʼíhída kʼizhdííláhígíí tʼáá éí ałdóʼ áłah ázhdoolííł.”—Galatians 6:7.

Neʼawééʼ yee ááníiłii, índa doo yee ádaa áhályą́ągi doo bá yáʼátʼéeh daaígi yaa ákonízingo bá íinisin. Niyáazhda ayóó bánáháchįįhgi, łahdę́ę́ʼ bitsʼąą ádaatʼée doo. Niyáázh éí baa náhátʼı̨́į ndi doo yikééʼ bánáháchįįhgóogo, doodaiiʼ łaʼda yáłtiʼgo bíniʼdii áłtsé yáłtiʼ nízingo yibaʼ átʼéego éí łahdę́ę́ʼ doo bitsʼą́ąjįʼ ádaatʼée da łeh. Neʼawééʼ éí tʼáadoo leʼé yichʼįʼ tʼą́ą́ʼ ádólzingi bee nanítingo éí yáʼátʼéehgo dínóoyééł.

Ílíinii ádaatʼéii aląąjįʼ óolzingo bee naʼnítin.

BINAHJĮʼ NAʼNITINII: “Ílíinii ádaatʼéii alą́ąjįʼ ádeínóhsin.”—Philippians 1:​10, New World Translation.

Ádaa áháyą́ągi éí doo yáʼátʼéhígi áʼdoolníiłgi doo tʼóó bichʼįʼ tʼą́ą́ʼ ídlı̨́į da. Éí ádoolníiłii ádiilníiłgi doo íiniidzin da ndi, íiʼníiłgo ánihósin. Áłchíní éí ílíinii ádaatʼéii ałkééʼ yisnilgi áádóó tʼáadoo nahjįʼ kwííléhígo ałkééʼ áyoolíiłgo áyósingi bee naʼnítingo yáʼátʼééh. Daʼílíinii ádaatʼéii bíniʼdii áłtsé łaʼdeileʼ. Éí homework áłtsé, daaneʼé éí akééʼdóó óolzin doo.

Tʼáá ni hazhóʼó binááł ánítʼé.

BINAHJĮʼ NAʼNITINII: “Bikʼehgo dooleełígíí nihinááł áshłaa, nihá ásdzaaígíí nihí ałdóʼ tʼáá éí bikʼehgóó ádaahtʼı̨́į dooleeł.”—John 13:15.

Tʼáá bikééʼ áhoochįįh ádaatʼéii éí bikééʼ éʼétʼéiigi neʼawééʼ yee hanihisííd. Kódaatʼéii bichʼįʼ ádaa áhojilyą́ągo neʼawééʼ yaa ákonízingo íinisin. Neʼawéeʼda doo ákǫ́ǫ́ áátʼįįdgóogo tʼóósh bikééʼ náhodoochįįł doodaiiʼ tʼóósh hazhóʼó ánítʼée łeh?