Ka baka la thekinolotši, o ka boledišana le batho ba bantši gabonolo go feta nakong le ge e le efe historing. Lega go le bjalo, segwera sa gago le ba bangwe se ka bonagala se sa tia. Lesogana le lengwe le beile taba ka gore: “Ke kwa eka segwera sa ka le ba bangwe se ka fela. Ka lehlakoreng le lengwe, tate o na le bagwera ba bantši bao a nago le mengwaga e mentši kudu a kgomarelane le bona!”

Ke ka baka la’ng e tloga e le tlhohlo mehleng ye go thabela segwera seo se kgotlelelago le seo se nago le morero?

Thekinolotši e ka solwa ka tekanyo e itšego. Go romelana melaetša le go boledišana Inthaneteng go dirile gore go bonagale eka go a kgonega go kgomarela segwera le motho yo a sego kgauswi le wena. Dipoledišano tšeo di nago le morero di tšeetšwe legato ke melaetša ya difouno yeo e tsenago ka lebelo e latelana. Puku ya Artificial Maturity e re: “Batho ba boledišana ka sewelo ba lebantše difahlego. Barutwana ba fetša nako e ntši ba lebeletše dikhomphutha gomme ba fetša nako e nyenyane ba le gotee.”

Ka dinako tše dingwe, thekinolotši e ka dira gore go bonale eka segwera ke sa kgonthe go feta ka tsela yeo se tlogago se le ka yona. Brian * wa mengwaga e 22 o re: “Morago bjale, ke lemogile gore ke nna ke bego ke itapiša ka go romela bagwera ba ka melaetša ya go ba tsošetša. Ke moka ke ile ka tlogela go ba romela e le ge ke nyaka go bona gore ke ba bakae ba bona bao ba bego ba tla dira maiteko a go ikgokaganya le nna. Go bolela therešo, ke ba sego kae feela. Go bonagala gore bagwera ba bangwe e be e se ba kgauswi bjalo ka ge ke be ke nagana.”

Na go romelana melaetša le go boledišana Inthaneteng go ka se go thuše go boledišana le batho gomme ka go re’alo gwa tiiša segwera sa lena? Ee, go ka go thuša—kudukudu ge e ba segwera sa lena e se sa Inthaneteng feela. Lega go le bjalo, gantši go boledišana Inthaneteng go go thuša go bolela le batho ba bangwe go e na le go go batametša kgauswi le bona.

Lemoga segwera sa kgonthe. Beibele e hlalosa mogwera e le motho yoo a “kgomarelago motho go phala ngwanabo.” (Diema 18:24) Na wo ke mohuta wa mogwera yoo o mo nyakago? Na wo ke mohuta wa mogwera yo o lego yena? Go go thuša go araba dipotšišo tšeo, ngwala dika tše tharo tšeo o ka nyakago gore mogwera a be le tšona. Le gona, ngwala tše tharo tšeo wena o tsenago segwereng o na le tšona. Ipotšiše gore: ‘Ke bafe ba bagwera ba ka ba Inthaneteng bao ba bontšhago dika tše ke di tšeelago godimo go mogwera? Ke dika dife tšeo bagwera bao ba ka rego ke tsena segwereng ke na le tšona?’—Molao wa motheo wa Beibele: Bafilipi 2:4.

Kgetha dilo tšeo di tlago pele. Segwera sa Inthaneteng gantši se theilwe selong seo batho ba se ratago ka go swana. Lega go le bjalo, go ba le ditekanyetšo tša go swana go bohlokwa go feta go ba le dikgahlego tše swanago. Leanne wa mengwaga e 21 o re: “Nka no ba ke se na bagwera ba bantši, eupša bao ke nago le bona ba ntira gore ke nyake go ba motho yo kaone.”—Molao wa motheo wa Beibele: Diema 13:20.

Etšwa o kopane le batho. Ga go na selo seo se ka swanago le go boledišana le lebantše difahlego, moo wena le motho yo mongwe le kgonago go lemoga diphapano tše dinyenyane tša segalo sa lentšu, ponagalo ya sefahlego le boitšhišinyo bja mmele.—Molao wa motheo wa Beibele: 1 Bathesalonika 2:17.

Ngwala lengwalo. Le ge e ba go ngwala lengwalo go bonagala eka go šiilwe ke nako, mokgwa wo o bontšha motho gore wena o a mo kgahlegela moo e lego gore o lebiša šedi go yena ka mo go feletšego. Go nea motho šedi e bjalo go hwetšwa ka sewelo lefaseng la lehono leo go lona batho ba pataganyago dipshio tša tlou. Ka mohlala, Sherry Turkle o ngwadile ka pukung ya gagwe ya Alone Together ka lesogana leo le rego ga le gopole le kile la amogela lengwalo bophelong bja lona. Ge lesogana leo le bolela ka dinakong tša ge batho ba ngwala mangwalo, le re: “Ke hlologela matšatši ao le ge ke be ke se ka tšwa ke belegwa.” Ke ka baka la eng re sa diriše mokgwa wo, woo go thwego ke thekinolotši ya kgale go dira bagwera?

Therešo ke gore: Segwera sa kgonthe ga e fo ba go dula le boledišana. Se hloka gore wena le mogwera wa gago le bontšhane lerato, kwelobohloko, go se fele pelo le go lebalelana. Dika tšeo di feleletša ka go dira gore segwera e be seo se kgotsofatšago. Eupša go thata go di bontšha ge e ba le boledišana Inthaneteng feela.