GA GO na selo seo se bonagalago se sa kgone go itirela selo go swana le lesea. Ge re belegwa, re be re ithekgile ka mo go feletšego ka batswadi ba rena gore ba re šireletše. Ge re be re ithuta go sepela, re be re kopana le batho bao re sa ba tsebego bao ba re fetago ka botelele ba etša dinatla. Re be re ba tšhoga ntle le ge batswadi ba rena ba be ba le kgauswi. Lega go le bjalo, re be re ikwa re šireletšegile ge re kakatlela mma goba tate ka seatla.

Ge re sa le bana, go phela ga rena gabotse go be go ithekgile ka gore batswadi ba rena ba re rate le go re kgothatša. Go lemoga gore batswadi ba rena ba a re rata go be go dira gore re ikwe re šireletšegile le go feta. Ge ba be ba re kgonthišetša gore re dira gabotse, re be re ikwa re ikholofela le go feta e bile re ntšha ka ga tšhwene.

Ge re dutše re gola, bagwera ba kgauswi le bona ba be ba re dira gore re ikwe re šireletšegile. Re be re phuthologa ge re na le bona gomme ba be ba dira gore re se tšhoge ge re le sekolong.

Go ba gona, dikgopolo tšeo di hlalosa nako e kaonekaone ya bjaneng. Bafsa ba bangwe ba ba le bagwera ba sego kae ba kgauswi mola bana ba bantši kudu ba hwetša thekgo e nyenyane go batswadi ba bona. Melissa * o ipobola ka gore: “Ka mehla ge ke bona diswantšho tša malapa ao a nago le botee a dira dilo mmogo, ke fela ke nagana gore: ‘Ke duma eka nkabe ke ile ka thabela seo ge ke sa le ngwanenyana.’” Mohlomongwe le wena o ikwa ka mokgwa woo.

Mohlomongwe o be o sa ikholofele ge o be o sa gola. O ka ba o be o sa ratwe kudu le go kgothatšwa. Go ka direga gore o sa gopola ge batswadi ba gago ba be ba dula ba elwa, e lego selo seo se ilego sa senya lenyalo la bona, mohlomongwe ka phošo o ile wa ipea molato ka karogano ya bona. Goba se sebe le go feta, mohlomongwe yo mongwe wa batswadi ba gago o be a go goboša mmeleng goba ka mantšu.

Ngwana yo a ikwago a sa šireletšega a ka itshwara bjang? Ba bangwe ba diriša dihlaretagi goba ba nwa kudu bofseng bja bona. Ba bangwe ba tsenela dihlopha tša disenyi e le ge ba nyaka go ikwa ba amogelega. Bafsa bao ba ikwago ba sa šireletšega ba ka itahlela maratong, e le ge ba tsoma go ratwa le go swarwa ka borutho. Lega go le bjalo, gantši ditswalano tše bjalo ga di swarelele, e bile karogano e bakela motho gore a ikwe a sa šireletšega le go feta.

 Bafsa bao ba hlaselegago gabonolo bao ba phemago go dira diphošo tše bjalo tše dikgolo, ba ka no gola ba ikwa ba se bohlokwa gakaalo. Ana o hlalosa gore: “Ke be ke kgodišegile gore ga ke na mohola, ka ge mma a be a phela a mpotša seo. Ga ke gopole a ntheta goba a ntshwara ka lerato.”

Tsela yeo re godišitšwego ka yona ga se yona e nnoši e re bakelago go ikwa re sa šireletšega. Re ka ikwa re sa šireletšega ka baka la tlhalo e kwešago bohloko, diteko tša botšofadi goba go tshwenyega ka ponagalo ya rena ya ka ntle. Go sa šetšwe gore sebaki ke sefe, seo se ka re amoga lethabo le go senya tswalano ya rena le ba bangwe. Re ka dira’ng go fenya maikwelo ao?

Re swanetše go tseba gore thušo e a hwetšagala. Ka moka ga rena re na le motho yoo a ka re thušago, motho yo a nyakago go re thuša, e lego Modimo ka boyena.

Wo ke molaetša woo Modimo a o rometšego ka moporofeta Jesaya, o rego: “O se ke wa lealea [goba, “belaela”] gobane ke Modimo wa gago. Ke tla go matlafatša. Ruri ke tla go thuša. Ruri ke tla go swara ka go tia ka seatla sa ka sa le letona sa toko.” (Jesaya 41:10, 13) Go tloga go homotša go nagana gore ka tsela ya seswantšhetšo, Modimo o nyaka go re swara ka seatla! Ruri ga go nyakege gore re belaele!

Beibele e hlalosa ka barapedi ba Modimo bao ba bego ba na le dipelaelo eupša ba ithuta go kakatlela seatla sa Modimo. Hanna, e lego mmago Samuele, o ile a ikwa a paletšwe bophelong ka ge a be a sa belege. O be a fela a kwerwa ka boopa bja gagwe. Ka baka leo, Hanna o be a sa dume dijo gomme a dula a lla. (1 Samuele 1:6, 8) Eupša ka morago ga gore a tšhollele Modimo sa mafahleng, o ile a se sa ikwa a nyamile.—1 Samuele 1:18.

Mopsalme Dafida le yena o be a fela a ikwa a sa šireletšega. Kgoši Saulo o tšere mengwaga e mentši a mo tsoma a leka go mmolaya. Dafida o phologile maitekong a mantši a ge batho ba be ba leka go fediša bophelo bja gagwe, gomme o be a fela a ikwa eka o nwelela mathateng a gagwe. (Psalme 55:3-5; 69:1) Go sa šetšwe seo, o ngwadile gore: “Ke tla sekama ka ba ka robala ka khutšo, gobane wena Jehofa, ke wena o nnoši o dirago gore ke dule ka polokego.”—Psalme 4:8.

Hanna gotee le Dafida ba ile ba lahlela maima a bona go Jehofa, gomme ba ile ba hwetša gore o a ba thekga. (Psalme 55:22) Re ka dira bjang se se swanago lehono?

1. Ithute go bota Jehofa, o mo tšee e le Tate.

Jesu o re kgothaleditše gore re tsebe Tatagwe, yena “Modimo a nnoši wa therešo.” (Johane 17:3) Moapostola Paulo o re kgonthišetša ka gore: “Ga a kgole le yo mongwe le yo mongwe wa rena.” (Ditiro 17:27) Jakobo o ngwadile gore: “Batamelang Modimo gomme o tla le batamela.”—Jakobo 4:8.

Mogato o bohlokwa wa go fenya dipelaelo ke go tseba gore re na le Tatago rena wa legodimong yo a re ratago le go re hlokomela. Ke therešo gore go ka no tšea nako gore o mmote, eupša ba bantši ba hweditše gore go dira bjalo go tloga go thuša. Caroline o re: “Ge ke thoma go tšea Jehofa e le Tate, ke ile ka feleletša ke na le motho yo ke bego nka mo tšhollela sa mafahleng. Ruri se se ile sa nkimolla!”

Rachel o re: “Jehofa ke yena a nthušitšego gore ke ikwe ke šireletšegile ge ke be ke šetše ke nnoši ke se na batswadi. Ke be ke kgona go bolela le yena ke mo kgopela gore a nthuše ka mathata a ka, gomme o ile a nthuša.” *

2. Ikhweletše lapa la moya.

Jesu o rutile barutiwa ba gagwe gore ba swarane bjalo ka bana ba motho. O itše go bona: “Ka moka le . . . bana ba motho.” (Mateo 23:8) O be a nyaka gore barutiwa ba gagwe ba therešo ba ratane gomme e be seo re ka se bitšago lapa le legolo la moya.—Mateo 12:48-50; Johane 13:35.

Diphuthego tša Dihlatse tša Jehofa di leka e le ka kgonthe go bontšha borutho le tšhireletšego ya lapa la kgonthe la moya. (Baheberu 10:24, 25) Ba bantši ba hweditše gore diboka tša phuthego di swana le setlolo seo se fodišago dintho tša bona tša maikwelo.

Eva o re: “Phuthegong ya gešo ke be ke na le mogwera wa paale yo a bego a kwešiša bohloko bja ka. O be a ntheetša, a mpalela dingwalwa le go rapela le nna. O be a kgonthišetša gore ga ke be noši. O be a nthuša gore ke ntšhe sa mafahleng gore ke imologe. Ka thekgo ya gagwe, ke ile ka thoma go ikwa ke šireletšegile le go feta.” Rachel o oketša ka gore: “Ke ile ka ikhweletša mma le tate ka phuthegong. Ruri ba be ba ntira gore ke ikwe ke ratwa e bile ke šireletšegile.”

 3. Swara ba bangwe ka botho le lerato.

Go swara ba bangwe ka botho le lerato go aga segwera seo se swarelelago. Jesu o itše: “Go na le lethabo le legolo go neeng go feta go amogeleng.” (Ditiro 20:35) Ga go pelaelo gore re tla hwetša gore ge re tšwela pele re rata ba bangwe, le rena re tla ratwa. Jesu o boditše barutiwa ba gagwe gore: “Tlwaelang go fa gomme batho ba tla le fa.”—Luka 6:38.

Re ikwa re šireletšegile le go feta ge re swara ba bangwe ka lerato le go swarwa ka lerato. Go etša ge Beibele e bolela, “lerato le ka mohla ga le fele.” (1 Bakorinthe 13:8) María o dumela ka gore: “Ke a tseba gore dikgopolo tše di fošagetšego tšeo ke nago le tšona ka nna e tloga e se tša therešo. Ke fenya dikgopolo tša ka tše di fošagetšego ka go thuša ba bangwe gomme ka lebala ka nna. Ka mehla ke ikwa ke kgotsofetše ge ke direla ba bangwe se itšego.”

Re ka se re megato yeo go boletšwego ka yona ka mo godimo ke mohlolo wa go nea kimollo ya kapejana yeo e swarelelago. Eupša e ka dira phapano e kgolo. Caroline o dumela ka gore: “Ke sa fela ke tlelwa ke maikwelo a go se šireletšege. Lega go le bjalo, ga bjale ke ikwa ke le bohlokwa le go feta. Ke a tseba gore Modimo o na le taba le nna, e bile ke na le bagwera ba bantši ba kgauswi bao le bona ba ntirago gore ke ikwe ke šireletšegile.” Rachel o ikwa ka tsela e swanago. O re: “Ka dinako tše dingwe ke ikwa ke nyamile. Eupša ke na le bana bešo ka phuthegong bao ke kgonago go kgopela keletšo go bona, bao ba nthušago gore ke lebelele dilo ka tsela e nepagetšego. Ka godimo ga tšohle, ke na le Tate wa legodimong yoo ke kgonago go bolela le yena letšatši le letšatši. Seo se dira phapano e kgolo kudu.”

Gape go na le tharollo ya sa ruri. Beibele e hlalosa lefase le lefsa leo le tlago, moo yo mongwe le yo mongwe wa rena a tlago go ikwa a šireletšegile. Lentšu la Modimo le holofetša gore: “Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago.” (Mika 4:4) Ka nako yeo, ga go na motho yo a tlago go dira gore re ikwe re sa šireletšega goba yo a tlago go re gobatša. Gaešita le dilo tše di tšhošago tše di sa lebalegego tša nakong e fetilego “di ka se sa gopolwa.” (Jesaya 65:17, 25) Modimo le Morwa wa gagwe e lego Kriste Jesu, ba tla tliša “toko [ya kgonthe].” Mafelelo “e tlo ba khutšo le polokego go iša mehleng ya neng le neng.”—Jesaya 32:17.