Ka Beibeleng, lentšu la mathomong la Segerika leo ka dinako tše dingwe le fetolelwago e le “potego,” ge e le gabotse le bolela “selo seo ka tlhago se lokilego.” Gape le ka hlalosa selo seo se lebelelwago se lokile go ya ka boitshwaro.

Bakriste ba tšeela godimo mantšu a buduletšwego a moapostola Paulo a rego: “Re rata go itshwara ka go botega dilong tšohle.” Seo se akaretša’ng?

Mesong e mengwe le e mengwe batho ba bantši ba itebelela seiponeng pele ba eya bathong. Ka baka la’ng? Ka gobane ba nyaka go bogega gabotse. Eupša go na le selo se bohlokwa kudu go feta go ba le meriri ya sebjalebjale goba diaparo tša fešene. Ruri motho yo re lego yena ka gare, a ka kaonefatša goba a senya ponagalo ya rena ya ka ntle.

Lentšu la Modimo le bolela ka go lebanya gore re sekametše go direng bobe. Genesi 8:21 e re: “Pelo ya ngwana wa motho e rata bobe go tloga bjaneng bja gagwe.” Ka go re’alo, e le gore re botege, re swanetše go lwantšha ditshekamelo tša rena tša tlhago tša go dira sebe. Moapostola Paulo o hlalositše gabotse ntwa ya gagwe ya go lwantšha sebe ge a re: “Ruri ke kgahlwa ke molao wa Modimo go ya ka motho yo ke lego yena ka gare, eupša mmeleng wa ka ke bona molao o mongwe woo o lwantšhanago le molao wa monagano wa ka gomme o ntira lethopša la molao wa sebe wo o lego dithong tša ka.”—Baroma 7:22, 23.

Ka mohlala, ge dipelo tša rena di re kgothaletša go dira bobe gomme re ikwa re sekamela go se botegeng, ga re gapeletšege go dira seo dipelo tša rena di se nyakago. Re sa na le kgetho tabeng yeo. Ge re kgetha go gana kgopolo e mpe, re ka dula re botega go sa šetšwe gore re dikologilwe ke batho ba go se botege.

Go nyakega gore re be le ditekanyetšo tše tiilego tša boitshwaro e le gore re botege. Ka manyami, batho ba bantši ba fetša nako e ntši ba šeditše ponagalo ya bona ya ka ntle go feta yeo ba e fetšago ba nagana ka ditekanyetšo tša bona tša boitshwaro. Ka baka leo, ba lokafatša tekanyo ya go se botege gore e sepedišane le maemo a bona. Puku ya The (Honest) Truth About Dishonesty e beile taba ka gore: “Ge e le gabotse, re bontšha go se botege ka tekanyo yeo e re dumelelago gore re šale re ipotša gore re a botega.” Lega go le bjalo, na go na le mothopo o ka botwago wo o ka re thušago go ikgethela gore ke tekanyo e kaakang ya go se botege yeo e amogelegago? Se se thabišago ke gore o gona.

Batho ba dimilione lefaseng ka bophara ba hweditše gore Beibele e kgotsofatša senyakwa seo gabotse. Beibele e na le ditekanyetšo tša boitshwaro tšeo di sa bapišwego. (Psalme 19:7) E nea tlhahlo yeo e ka botwago ditabeng tše bjalo ka tša bophelo bja lapa, mošomo, boitshwaro le go ba le segwera le Modimo.  E itlhatsetše e le e ka botwago. Melao le melao ya yona ya motheo e šoma ditšhabeng ka moka, merafong ka moka le ditšong ka moka. Re ka tlwaetša dipelo tša rena gore di botege ka go bala Beibele, go naganišiša ka seo e se bolelago le go diriša keletšo ya yona.

Lega go le bjalo, go fenya ntwa ya go lwantšha go se botege go bolela go gontši go feta go fo hwetša tsebo e nepagetšego ya Beibele. Go ba gona, re phela lefaseng leo le gobogilego boitshwarong leo le re tutuetšago go amogela ditekanyetšo tša lona tše di gobogilego. Ke ka baka leo re swanetšego go rapelela thušo le thekgo ya Modimo. (Bafilipi 4:6, 7, 13) Ka go dira bjalo, re ka ba le sebete sa go emela seo se lokilego le go botega dilong ka moka.

Hitoshi yo a tsopotšwego sehlogong sa mathomo, o ile a holwa ke go tsebja e le mošomi yo a botegago. Ga bjale o šomela mothwadi yo a thabelago go botega ga gagwe. Hitoshi o re: “Ke leboga gore ke ile ka kgona go hwetša mošomo wo o ntumelelago gore ke dule ke na le letswalo le le hlwekilego.”

Ba bangwe ba hweditše gore go botega go a hola. Ela hloko mehlala e itšego ya bao ba hotšwego ke go diriša molao wa motheo wa Beibele wa go “itshwara ka go botega dilong tšohle.”

• Letswalo le le Hlwekilego

  “Ke tlogetše sekolo ke na le nywaga 13 e le gore ke yo šoma le mahodu. Ka baka leo, ke be ke hwetša diperesente tše 95 tša mogolo wa ka ka ditiro tša go se botege. Ka morago, ke ile ka nyalwa gomme nna le monna wa ka ra thoma go ithuta Beibele le Dihlatse tša Jehofa. Re ile ra ithuta gore Jehofa * Modimo o hloile ditiro tša go se botege gomme ra phetha ka gore re fetoše tsela ya rena ya go phela. Ka 1990 re ile ra neela maphelo a rena go Jehofa gomme ra kolobetšwa ra ba Dihlatse tša Jehofa.”—Diema 6:16-19.

  “Nakong e fetilego, ntlo ya ka e be e tletše ka dilo tše di utswitšwego, eupša ga bjale ga e sa na dilo tšeo gomme se se ntira gore ke be le letswalo le le hlwekilego. Ge ke nagana ka mengwaga yeo ke e feditšego ke sa botege, ke leboga Jehofa ge a nkgaugetše kudu. Ke kgotsofala kudu ge ke yo robala bošegong bjo bongwe le bjo bongwe ke tseba gore ga bjale ke kgahla Jehofa.”—Cheryl, Ireland.

  “Ge mong wa ka a be a ekwa gore ke ganne go amogela tsogo-le-kobong go moreki, o ile a re go nna: ‘Ruri Modimo wa gago o go dira gore o be motho yo a ka botwago kudu! E tloga e le tšhegofatšo go ba le wena khamphaning ye.’ Go botega dilong ka moka go dira gore ke be le letswalo le le hlwekilego pele ga Jehofa Modimo. Le gona go mpha sebaka sa go thuša ba lapa la ka gotee le ba bangwe gore ba dire se se swanago.”—Sonny, Hong Kong.

• Khutšo ya Monagano

  “Ke šoma ke le mothuši wa mookamedi pankeng ya ditšhabatšhaba. Kgwebong ye, gantši go huma go tšewa go le bohlokwa go feta go botega. Pono e tlwaelegilego ke ya gore, ‘Bothata bo kae ge e ba motho a sa botege go se nene gomme seo se mo humiša le go kaonefatša ikonomi?’ Eupša ke na le khutšo ya monagano ka ge ke botega. Ke ikemišeditše go dula ke botega le go lebeletšana le ditlamorago le ge e le dife tšeo di ka tšwelelago. Bathwadi ba ka ba a tseba gore nka se ba botše maaka goba ka ba bolelela maaka.”—Tom, United States.

• Tlhompho

  “Mookamedi wa ka kua mošomong o ile a nkgothaletša gore ke bolele maaka ka dilo tšeo di bego di timetše eupša ke ile ka gana. Ge mafelelong mahodu a be a swarwa, mothwadi wa ka o ile a nteboga ka ge ke botega. Go nyakega sebete gore o botege lefaseng le la batho bao ba sa botegego. Eupša mafelelong, batho ba bangwe ba ka re bota le go re hlompha.”—Kaori, Japane.

Letswalo le le hlwekilego, khutšo ya monagano le tlhompho—meputso yeo e bontšha gore go botega go tloga go na le mehola. Na o a dumela?