“Ge ke be ke sa le ngwana buti o be a mpetha e bile a ntlhaba ka mantšu letšatši le lengwe le le lengwe. Ka morago ga gore ke nyalwe mmatswale wa ka le yena o be a dula a nkgoboša. Yena le ratswale wa ka ba be ba ntshwara bjalo ka lekgoba. Ke be ke dula ke nyaka go ipolaya.”—Madhu, a India.

 World Health Organization e re: “Go gobošwa ga basadi ke selo se se tlwaelegilego lefaseng ka moka.” E re mo e ka bago mosadi o tee go ba bararo o kile a gobošwa mmeleng goba ka tša thobalano.

 Ge e ba seo se kile sa go diragalela o ka ikwa o sa šireletšega. O ka nagana gore gohle mo o yago gona o ka hlabja ka mantšu, wa bethwa goba wa gobošwa ka tša thobalano. Ka baka la seo o ka nagana gore batho ba bantšhi ba lebelela basadi ba se bohlokwa. Eupša na basadi ba bohlokwa go Modimo?

 Lengwalo: “[Modimo] a bopa monna le mosadi.”—Genesi 1:27.

 Seo lengwalo le le se bolelago: Modimo o bopile banna le basadi. O ba lebelela ba le bohlokwa ka moka. Le gona o letetše gore monna a ‘rate mosadi wa gagwe bjalo ka ge a ithata’ le gore a se ke a mo galefela goba go mo hlaba ka mantšu. (Baefeso 5:33; Bakolose 3:19) Ka nnete go šireletšega ga basadi go bohlokwa go Modimo.

 “Ge ke be ke sa le ngwana ba leloko ba ile ba nkgoboša ka tša thobalano. Ge ke be ke na le mengwaga e 17, mong mošomo o ile a mpotša gore ge e ba ke sa robale le yena o tla nthaka mošomong. Ge ke šetše ke le motho yo mogolo, monna wa ka, batswadi ba ka le baagišane ba be ba nnyatša. Mafelelong ke ile ka ithuta ka Jehofa, b e lego Mmopi. O hlompha basadi. Se se ile sa dira gore ke kgolwe gore o a nthata le gore ke bohlokwa go yena.”—Maria, Argentina.

 Lengwalo: “Go na le mogwera yo a go ratago kudu go feta ngwaneno.”—Diema 18:24.

 Seo lengwalo le le se bolelago: Mogwera wa nnete o tla go thekga. Ge e ba go kgonega o ka botša motho yo o mo tshepago kamoo o ikwago ka gona.

 “Ke feditše mengwaga e 20 ke sa botše motho gore ke ile ka gobošwa ka tša thobalano. Se se dirile gore ke dule ke sa thaba, ke ikwe ke gateletšegile le go dula ke belaela. Eupša ge ke be ke botša motho yo ke mo tshepago ka seo se ntiragaletšego, ke ile ka ikwa ke imologile kudu.”—Elif, Türkiye.

 Lengwalo: ‘Lahlelang dipelaelo tša lena ka moka go [Modimo], gobane o a le hlokomela.’—1 Petro 5:7.

 Seo lengwalo le le se bolelago: Modimo o a theetša ge o mo rapela. (Psalme 55:22; 65:2) A ka go thuša gore o bone gore o bohlokwa go yena ka ge a na le taba le wena.

 “Go ithuta ka Jehofa go ile gwa dira gore bohloko bjo ke bego ke bo kwa pelong bo kaonefale. Ga bjale ke kgona go rapela Modimo le go mmotša kamoo ke ikwago ka gona. O swana le mogwera yo a kwešišago kamoo ke ikwago ka gona.”—Ana, Belize.

 Lengwalo: “Jehofa . . . o tlo ahlolela ngwana yoo a se nago tatagwe a ba a ahlolela le bao ba nyamilego gore motho wa nama le madi a se sa ba tšhoša.” —Psalme 10:17, 18

 Seo lengwalo le le se bolelago: E se kgale Modimo o tlo fediša ditiro ka moka tša go hloka toka go akaretša le go swara basadi gampe.

 “Go tseba gore e se kgale Modimo o tlo fediša go swarwa gampe ga basadi le banenyana, go dira gore ke ikwe ke le kaone. Go dira gore ke be le khutšo ya monagano.” —Roberta, Mexico.

 E le gore o ithute ka mo go oketšegilego gore Beibele e nea batho kholofelo bjang, gore ke bjang o ka tshepago seo e se holofetšago le gore Dihlatse tša Jehofa di kgothatša batho bjang di diriša Beibele, Kgopela Thuto ya Mahala ya Beibele.

 Taonelouta sehlogo se.