Psalme 10:1-18
ל [Lamed]
10 Wena Jehofa, o re’ng o ema kgole?
O reng o ikuta dinakong tša ge ke le tlalelong?
2 Boikgogomošo bja yo mobe bo dira gore a rakediše motho yo a sa kgonego go itwela,Eupša yo mobe o tla tanywa ke maanomabe a gagwe.
3 Ka gobane yo mobe o ikgantšha ka dikganyogo tša gagwe tšeo di fošagetšego,E bile o šegofatša motho yo a nago le megabaru.*נ [Nun]Ga a hlomphe Jehofa.
4 Motho yo mobe ga a nyakišiše ka gobane o a ikgantšha.O dula a ipotša gore: “Ga go na Modimo.”
5 Selo se sengwe le se sengwe seo a se dirago se a atlega.Eupša ga a lemoge melao ya Modimo,O ikgogomošetša manaba a gagwe ka moka.
6 O ipotša gore: “Nka se tsoge ke diragaletšwe ke dilo tše mpeE bile nka se tsoge ke wetšwe ke mathata.”
פ [Pe]
7 Molomong wa gagwe go tletše maroga le bofora e bile o tšhošetša batho ba bangwe.Leleme la gagwe le baka mathata le dilo tše di gobatšago.
8 O lalela batho kgauswi le metse.O tšwa mo a ikutilego gona gore a bolaye motho yo a se nago molato.
ע [Ayin]
O nyakana le yo a ka mmolayago.
9 O ikutile lefelong la gagwe go swana le tau yeo e lego lefelong la yona.
O laletše gore a sware yoo a sa kgonego go itwela.
O diriša nete ya gagwe gore a kgone go swara motho yo a sa kgonego go itwela.
10 Motho yo a sa kgonego go itwela o a fenywa e bile o a gatelelwa,Gomme ba madimabe ba wela diatleng tša yo mobe.
11 O ipotša gore: “Modimo o lebetše.
Modimo ga a ne taba,*
E bile ga a bone selo.”
ק [Qoph]
12 Ema hle Jehofa. Emiša letsogo la gago o lwele bao ba sa kgonego go itwela hle Modimo.
O se ke wa lebala bao ba sa kgonego go itwela.
13 Wena Modimo, ke ka baka la’ng yo mobe a go nyaditše?
O ipotša gore: “Modimo a ka se nkahlole.”
ר [Resh]
14 Eupša wena o bone yo a bakago mathata le manyami.
O bona dilo ka moka tšeo di diregago ke moka wa gata mogato.
Batho bao ba sa kgonego go itwela ba tšhabela go wena.O thuša ngwana yo a se nago tatagwe.
ש [Shin]
15 Roba letsogo la motho yo mobe le yo šoro,E le gore ge o nyakišiša dilo tše mpe tšeo a di dirilegoO se sa di hwetša.
16 Jehofa ke Kgoši ya go ya go ile.
Ditšhaba di fedišitšwe e bile di tlošitšwe lefaseng.
ת [Taw]
17 Wena Jehofa, o tla kwa thapelo ya batho ba boleta,
O tla ba matlafatša gomme wa ba theetša.
18 O tlo ahlolela ngwana yoo a se nago tatagwe a ba a ahlolela le bao ba nyamilegoGore motho wa nama le madi a se sa ba tšhoša.
Mengwalo ya tlase
^ Goba, “motho yo a nago le megabaru o a itšhegofatša.”
^ Goba, “Modimo o utile sefahlego sa gagwe.”
