Psalme 36:1-12
Ditaelo tšeo di yago go mohlahli. Koša ya Dafida mohlanka wa Jehofa.
36 Dilo tšeo di lego pelong ya motho yo mobe di mo hlohleletša go dira dilo tše mpe,Ga a boife Modimo.
2 Ka gobane o ipotša gore o bohlokwa kudu.Ga a lemoge sebe sa gagwe e bile ga a tlogele go se dira.
3 O bolela dilo tšeo di kwešago bohloko le tša bofora.Ga a sa na bohlale bja go mo thuša go dira dilo tše dibotse.
4 O loga maanomabe le ge a robetše mpeteng wa gagwe.
O ikemišeditše go sepela tseleng e mpe.Ga a gane go dira dilo tše mpe.
5 Wena Jehofa, lerato la gago le le botegago le fihla magodimong,Gomme potego ya gago e fihla marung.
6 Go loka ga gago go bjalo ka dithaba tše dikgolo,Dikahlolo tša gago di bjalo ka bodiba bjo bogolo.
Wena Jehofa, o phološa batho le diphoofolo.
7 Wena Modimo, ruri lerato la gago le le botegago le bohlokwa kudu!
Bana ba batho ba tšhabela moriting wa maphego a gago.
8 Ba nwa dilo tše dibose tša ntlong ya gago go fihlela ba kgolwa,E bile o ba fa dilo tše dintšhi tše dibotse bjalo ka ge eka o ba nweša meetse a mabose ao a elelago dinokaneng.
9 Bophelo bo tšwa go wena,Re kgona go bona seetša ka baka la seetša sa gago.
10 Tšwela pele o bontšha bao ba go tsebago lerato la gago le le botegago,Gomme o bontšhe go loka ga gago go ba dipelo tše dibotse.
11 O se ke wa dumelela leoto la yo a ikgogomošago le nkgata,Goba wa dumelela yo mobe a nthaka.
12 Bona moo batho bao ba dirago dilo tše mpe ba wetšego gona,Ba fentšwe e bile ga ba kgone go tsoga.
