IBhayibheli nalihlathulula i-Arimagedoni, aliyihlathululi njengento ethinta isifunda esithileko kwaphela kodwana njengepi yephasi loke ephakathi kwabo boke aborhulumende babantu noZimu.

•   ‘Amezwi aphefumulelwe madimoni . . . ayaphuma atjhinge emakhosini wephasi loke bona awabuthelele ndawonye epini yelanga elikhulu lakaZimu uMninimandla Woke. . . . Awabuthelela ndawonye endaweni ngesiHebheru ebizwa ngokuthi yi-Arimagedoni.’—IsAmbulo 16:14, 16.

 Ibizo elithi “Arimagedoni” livela ebizweni lesiHebheru elithi Har Meghid·dohnʹ, elitjho ukuthi “iNtaba yeMegido.” IMegido bekulidorobho lakwa-Israyeli wekadeni. Ngebanga lalokho, abanye abantu bakholelwa ukuthi i-Arimagedoni izokulwelwa e-Israel. Nanyana kunjalo, isifunda seMegido namkha nanyana ngiyiphi indawo esePumalanga ePhakathi ayisiyikulu kangako bona inganela ‘amakhosi wephasi loke’ namabuthwawo.

 Incwadi yesAmbulo yatlolwa “ngeembonakaliso,” namkha ngelimi elingokomfanekiso. (IsAmbulo 1:1) I-Arimagedoni ayikaqaliseli endaweni yamambala kodwana iqalisele ebujamweni bephasi loke, lapho iintjhaba zihlangana khona kwamaswaphela ziphikisana nokubusa kwakaZimu.—IsAmbulo 19:11-16, 19-21.